ސ.ހިތަދޫ އިހުގެ ބަނދަރު ތަރައްގީކުރުމަށް ބޭނުންވާ އެއްގަމު ތޮށީގެ ދެވަނަ ޝިޕްމެންޓް ގެނެސްފިއެވެ.
އެމް.ޓީ.ސީ.ސީން ހާމަކޮށްފައިވާ ގޮތުގައި 29 އޮގަސްޓުގައި މި ޝިޕްމެންޓްވަނީ ޕްރޮޖެކްޓް ސައިޓަށް ގެންދެވިފައެވެ.
އެކުންފުނިން ހާމަކޮށްފައިވާ ގޮތުގައި ހިތަދޫ އިހުގެ ބަނދަރު ތަރައްގީކުރުމުގެ މަޝްރޫޢަށް 52.4 މިލިއަން ރުފިޔާ ހޭދަވެގެންދާނެއެވެ. އެގޮތުން، މި މަޝްރޫޢުގެ ދަށުން 234,297 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 800 މީޓަރުގެ ސަރަހައްދެއްގައި ބޭރުތޮށި ލުމާއި، 284 މީޓަރުގެ ސަރަޙައްދެއްގައި އެއްގަމުތޮށި ލުމުގެ މަސައްކަތް ހިމެނޭކަމަށް އެކުންފުނިންވަނީ ބުނެފައެވެ. އަދި 1420 އަކަ މީޓަރުގެ ސަރަހައްދެއްގައި ޕޭވްމަންޓް ހަދައި، ބަނދަރު ބައްތި އާއި ނެރުބައްތި ހަރުކުރުމުގެ މަސައްކަތްވެސް ހިމެނޭކަމަށް އެމް.ޓީ.ސީ.ސީން ވަނީ ހާމަކޮށްފައެވެ.
މި މަޝްރޫޢަކީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެކުންފުންޏާ ހަވާލުކޮށްގެން ކުރިއަށްގެންދާ ތަރައްގީގެ މަޝްރޫޢެކެވެ.