އުންމީދަކީ ކުރިއަށް އޮތް ރަމަޟާންމަހުގެ ކުރިން ސަލްމާން މިސްކިތް ހުޅުވުންކަމަށް އިސްލާމިކް މިނިސްޓަރ ޑރ.ޒާހިރު ވިދާޅުވެއްޖެއެވެ.
ރާއްޖޭގެ އޮންލައިން ނޫހަކަށް ދެއްވި ބަސްތީގަތުމެއްގައި ޑރ.ޒާހިރު ވިދާޅުވީ ސަލްމާން މިސްކިތް ހުޅުވުމާ ގުޅޭގޮތުން މަޝްވަރާކުރުމަށް ރާއްޖެއަށް އައި ސައުދީގެ ވަފްދު މިހާރު ފުރާފައިވާ ކަމަށެވެ. އަދި ސަލްމާން މިސްކިތް ހުޅުވުމަށް ސައުދީގެ ވަފުދެއް އަންނަން ހަމަޖެހިފައިވާ ކަމަށްވެސް ޑރ.ޒާހިރު ވިދާޅުވިއެވެ. ހަމައެހެންމެ، ރޯދައިގެ ކުރިން އެމިސްކިތް ހުޅުވޭތޯ ބަލަމުން ގެންދާކަމަށްވެސް މިނިސްޓަރ ޒާހިރު ވިދާޅުވިއެވެ.
ކިންގް ސަލްމާން މިސްކިތަކީ ރައީސް ޔާމީނުގެ ވެރިކަމުގައި ސައުދި އަރަބިޔާގެ ފަރާތުން ހިލޭ އަޅާދީފައިވާ މިސްކިތެކެވެ. މި މިސްކިތުގައި އެއްފަހަރާ 6000 މީހުންނަށް ނަމާދުކުރެވޭނެ ޖާގަ ހުރެއެވެ.
މި މިސްކިތް ހުޅުވުމުގެ ކަންތައްތައް އެކިއެކި ސަބަބުތަކާހުރެ އަންނަނީ ފަސްވަމުންނެވެ.