އެމްޑީޕީގެ އެތެރޭގެ އިންތިހާބުގައި ޔޫތު މިނިސްޓަރު އަހްމަދު މަހްލޫފަށް ފުރުސަތު ނުދޭން ނިންމާފައިވާ މައްސަލަގައި އެމްޑީޕީން އިލެކްޝަންސް ކޮމިޝަނަށް ދިން ޖަވާބު އެ ކޮމިޝަނުގެ ގާނޫނީ ޓީމާއެކު ދިރާސާ ކުރަން ފަށައިފި އެވެ.
އިލެކްޝަންސް ކޮމިޝަނުގެ މެމްބަރު ފުއާދު ތައުފީގު އައްޑޫލައިވް އަށް ވިދާޅުވީ މަހްލޫފު ހުށައަޅާފައިވާ ޝަކުވާއާ ގުޅިގެން އެމްޑީޕީން އެކަމާމެދު ދެކޭ ގޮތް ކޮމިޝަނަށް އަންގައިދޭން އެދުނުނު ކަމަށެވެ. އަދި ފުއާދު މިއަދު މިއަދު ވިދާޅުވީ އެމްޑީޕީން އެކަމާ ގުޅިގެން ދިން ޖަވާބު އެ ކޮމިޝަނަށް ލިބިފައިވާ ކަމަށާއި އެކަން އެ ކޮމިޝަނުން ގާނޫނީ ޓީމާއެކު ދިރާސާކުރަމުންދާ ކަމަށެވެ.
މަހްލޫފު ވަނީ އިލެކްޝަން ކޮމިޝަނާ ބައްދަލުކޮށް އެމްޑީޕީގެ އެތެރޭގެ އިންތިހާބުގައި ބައިވެރިނުވެވޭނެ ކަމަށް ނިންމި ގޮތާ ގުޅޭ ގޮތުން ޝަކުވާ ހުށައަޅާފައި އެވެ.
މި މަހު އޮންނަ އެމްޑީޕީގެ އެކި ދާއިރާތަކުގެ އިންތިހާބުގައި މަހްލޫފުގެ އިތުރުން ހައުސިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީނަށް ވެސް ބައިވެރިނުވެވޭނެ ކަމަށް ނިންމި އެވެ. ނަމަވެސް އެ ޕާޓީގެ ޝަކުވާ ކޮމިޓީއަށް އަކްރަމް ހުށަހެޅި މައްސަލަ ބަލައި ފަހުން ވަނީ ފުރުސަތު ދީފަ އެވެ.
މަހްލޫފް ވާދަކުރައްވަން ހުށަހެޅުއްވީ ކ، އއ. އދ. ވ ހިމެނޭ މެދު އުތުރު ޕްރޮވިންސަށެވެ. މަހުލޫފަށް ވާދަ ނުކުރެވޭނެ ކަމަށް އެ ޕާޓީން ނިންމީ ބޮޑެތި ކުށްތަކުގައި ތުހުމަތުވާ މީހުންނަށް، އެތެރޭގެ އިންތިހާބުގައި ވާދަ ނުކުރެވޭނެ ކަމަށް އެ ޕާޓީގެ ގައުމީ ހިންގާ ކޮމިޓީން އޮތީ ފާސްކޮށްފައިވާތީ ކަމަށް ބުނެ އެވެ. ނަމަވެސް މަހްލޫފަށް ވާދަ ނުކުރެވޭނެ ކަމަށް ނިންމާފައިވަނީ ޑިމޮކްރެޓިކް މުޖުތަމައުގައި އަމަލުކުރާ އުސޫލުތަކާ ހިލާފަށް ކަމަށް އޭނާ ދެކެ އެވެ.