އެމްޑީޕީގެ އިސްތިއުނާފުގެ ފަނޑިޔާރު މަޖިލީހުގެ ރައީސްގެ މަގާމަށް އަނަސް އަބްދުއްސައްތާރު އިންތިހާބުކޮށްފި އެވެ.
އެމްޑީޕީގެ އިސްތިއުނާފުގެ ފަނޑިޔާރު މަޖިލީހުގެ ރައީސްގެ މަގާމަށް އަނަސް އަބްދުއްސައްތާރު އިންތިހާބުކޮށްފި އެވެ.
ފިނޭންސް މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި އަނަސް އެ މަގާމަށް އިންތިހާބުވީ ގައުމީ މަޖިލީހުން އަލަށް އިންތިހާބުކުރި އިސްތިއުނާފު ފަނޑިޔާރު މަޖިލީހުގެ އާ ދައުރުގެ މެންބަރުންގެ ފުރަތަމަ ބައްދަލުވުމުގަ ނެގި ވޯޓުންނެވެ.
އިސްތިއުނާފުގެ ފަނޑިޔާރުންގެ މަޖިލީހަށް އެމްޑީޕީގެ ގައުމީ މަޖިލީހުން މެމްބަރުން އިންތިހާބުކުރީ މިރޭ ބޭއްވި ޖަލްސާގައި އެވެ. މި ޖަލްސާގައި 124 މެންބަރުން ބައިވެރިވެވަޑައިގެންނެވި އެވެ. އިސްތިއުނާފު ފަނޑިޔާރުންގެ މަޖިލީހަށް އިންތިހާބުކުރަން ޖެހޭ 9 މެމްބަރުންގެ މަޖިލހަށް 18 މެމްބަރުން ކުރިމަތިލި އެވެ. އޭގެ ތެރެއިން ކޮމެޓީއަށް އިންތިހާބުވެފައިވަނީ:
1. އަހްމަދު ރިޝްވާން
2. ފާތިމަތު އިނާޝާ
3. ހުސެއިން ރަޝީދު
4. އިބްރާހިމް މުހައްމަދު ދީދީ
5. އަހްމަދު މައުރޫފު
6. ނައުޝާދު އަބްދުލް އަޒީޒް
7. އަހްމަދު ނިޝާދު
8. އާދަމް މާހިރު
9. އަނަސް އަބްދުއް ސައްތާރު
އެމްޑީޕީގެ އަސާސީ ގަވައިދުގައި ބުނެފައިވާ ގޮތުން އިސްތިއުނާފު ފަނޑިޔާރުންގެ މަޖިލީހުގެ ރައީސަކީ ގާނޫނީ ވަކީލަކަށްވާން ޖެހެ އެވެ. އެ މަޖިލީހަށް އިންތިހާބުކުރި ނުވަ މެމްބަރުންގެ ތެރެއިން ހަތަރު މެމްބަރުންނަކީ އެ މަޖިލީހުގެ ރައީސްގެ ޝަރުތު ހަމަވާ ގާނޫނީ ވަކީލުންނެވެ.
އިސްތިއުނާފުގެ ފަނޑިޔާރުންގެ މަޖިލީހަށް ވާދަކުރީ އެމްޑީޕީގެ ރައީސް، ރައީސް މުހައްމަދު ނަޝީދާއި އެ ޕާޓީގެ އެންމެ އިސް ލީޑަރު ރައީސް، އިބްރާހިމް މުހައްމަދު ސޯލިހު ތާއީދުކުރައްވާ ކެންޑިޑޭޓުންތަކެއް ކަމަށް ބުނެ އަޑު ފެތުރުނެވެ. އަދި އޭގެ ތެރެއިން އެ މަޖިލީހަށް ހޮވިވަޑައިގެންނެވީ ރައީސް ސޯލިހް ތާއީދުކުރެެއްވި ބޭފުޅުންކަމަށް ވެސް ގައުމީ މަޖިލީހުގައި ތިއްބެވި ރައީސް ސޯލިހަށް ތާއީދުކުރައްވާ ބޭފުޅުން ވިދާޅުވި އެވެ.
މާލޭގެ މޭޔަރުކަމަށް ކުރިމަތިލައްވައިގެން ނާކާމިޔާބާ ކުރިމަތިލެއްވި އަނަސް ވަނީ މީގެ ކުރިން އެ ޕާޓީގެ ސެކްރެޓަރީޖެނަރަލްކަންވެސް އަދާ ކުރައްވާފައި އެވެ.