ކާމިޔާބް ގިނަ ފިލްމްތަކެއް ޑައިރެކްޓްކޮށް މިހާރު އެ ދާއިރާގައި ދުރުގައި ހުރި މަހޭޝް ބަޓްގެ ޑައިރެކްޝަނެއްގައި ވަރަށް ބޮޑަށް މަސައްކަތް ކުރަން ބޭނުންވާ ކަމަށް މަހޭޝްގެ ހަގު އަންހެން ދަރިފުޅު އަދި މިހާރު ވިދަމުން އަންނަ ބަތަލާ އާލިއާ ބަޓް ބުނެފި އެވެ.
ކަރަން ޖޯހަރުގެ "ސްޓޫޑަންޓް އޮފް ދި އިޔާ" އިން މިދިޔަ އަހަރު ބޮލީވުޑަށް ނިކުތް އާލިއާ ބުނީ، އޭނާ ބައްޕަގެ ޑައިރެކްޝަނެއްގައި މަސައްކަތް ކުރަން ކިތަންމެ ބޭނުން ވިޔަސް، ބައްޕަ އަލުން ފިލްމެއް ޑައިރެކްޓް ކުރާނެ ކަމާ ދޭތެރޭ ޝައްކު ކަމަށެވެ.
"އަދި އަހަރެން ބޭނުން ފެމިލީގެ ޕްރޮޑަކްޝަން ހައުސް ވިޝޭޝްގެ ފިލްމުތަކެއްގައި ވެސް މަސައްކަތް ކުރަން،" އުމުރުން 20 އަހަރުގެ އާލިއާ ބުންޏެވެ. "އުންމީދު ކުރަން ކައިރި މުސްތަގުބަލެއްގައި އެ ފުރުސަތު ވެސް ލިބޭނެ ކަމަށް."
"އާތު"، "ނާމް" "ހަމް ހެ ރަހީ ޕިޔާރް ކޭ"، "އާޝިގީ" އަދި "ޒަހަމް" ފަދަ ކާމިޔާބް ފިލްމްތައް ޑައިރެކްޓް ކުރި މަހޭޝް، ޑައިރެކްޓް ކުރުން ހުއްޓާލީ 1999 ވަނަ އަހަރު އެވެ.
އެހެން ނަމަވެސް އޭނާއަކީ މިހާރު ވެސް ވިޝޭޝްގެ މައި ސިކުނޑި އެވެ. ފިލްމްތައް ޕްރޮޑިއުސް ކުރުމުގެ އިތުރަށް އެ ކުންފުނީގެ ގިނަ ފިލްމްތަކެއްގެ ވާހަކަ މަހޭޝް ލިޔެފައިވެ އެވެ.
ބައްޕަގެ ޑައިރެކްޝަނެއްގައި މަސައްކަތް ކުރަން ފުރުސަތު ނުލިބުނު ނަމަވެސް، އާލިއާ އަށް ރަނގަޅު އޮފާތަކެއް އަންނަނީ ލިބެމުންނެވެ.
އޭނާގެ ކުރިއަށް ހުރި ފިލްމްތަކުގެ ތެރޭގައި އިމްތިއާޒް އަލީ ޑައިރެކްޓް ކުރާ "ހައިވޭ" އާއި ކަރަން ޖޯހަރު ޕްރޮޑިއުސް ކުރާ "2 ސްޓޭޓްސް" އާއި "ހަމްޕްޓީ ޝަރްމާ ކީ ދުލްހަނިއާ" ހިމެނެ އެވެ.