ކޮވިޑް-19އާ ގުޅިގެން އައްޑޫ ސިޓީގެ ހުޅުދޫ އަދި މީދޫ އަވަށުގައި ކާފިއު ހިންގައި، ސްކޫލުތައް ބަންދުކުރަން އައްޑޫ ސިޓީ ކައުންސިލުން ނިންމައިފިއެވެ.
އައްޑޫ ސިޓީ ކައުންސިލުން ކޮށްފައިވާ އިޢުލާނެއްގައި ބުނެފައިވަނީ ހުޅުދޫ އަދި މީދޫ އަވަށް މޮނިޓަރިންއަށްލުމާއެކު ރައްކާތެރިކަމުގެ ގޮތުން ގިނަ ފިޔަވަޅުތަކެއް އަޅަން ނިންމާފައިވާ ކަމަށެވެ. އެގޮތުން:
1. އާންމު އެއްވުންތަކާއި ޕާޓީތައް ބޭއްވުން މެދުކަނޑާލުން
2. ހުޅުދޫ އަދި މީދޫ ސްކޫލްތަކުގެ ގްރޭޑް 9 އަކުން މަތީގެ ގްރޭޑްތަކުގެ ކިޔެވުން ރައްކާތެރިކަމުގެ ފިޔަވަޅުތަކާއެކު ކުރިއަށް ގެންދިއުމާއި، ކުދިން އެއްކޮށްގެން ސްކޫލުގައްޔާއި، ސްކޫލުން ބޭރުގައި ހިންގާ ހަރަކާތްތައް މެދުކަނޑާލުން
3. އައްޑޫގެ ހުރިހާ އަވަށްތަކެއްގައި ޤުރުއާން ކްލާސްތަކާއި ޓިއުޝަން ކްލާސްތައް މެދުކަނޑާލުމާއެކު ސްކޫލް ކުުދިން ބައިވެރިކޮށްގެން ހިންގާ އެންމެހާ ހަރަކާތްތައް ހުއްޓާލުން
4. 2021 ސެޕްޓެމްބަރު 4ކުން ފެށިގެން ކޮންމެ ދުވަހަކު 21:00 އިން 04:00 ގެ ނިޔަލަށް، ކާފިއު ވަގުތު ކަމުގައި ހަމަޖައްސައި، މި ވަގުތުތަކުގައި ބޭރަށް ނިކުތުން މަނާވުން. އަދި ކޮންމެހެން ބޭރަށް ދާންޖެހޭނަމަ، އެ އަވަށެއްގެ އެސް.އެސް.ޑީއެއްގެ ހުއްދައާއެކު ބޭރަށް ދިއުން
5. ގާޑިޔާ، ހޮޓާ، ކެފޭ ރެސްޓޯރެންޓްފަދަ ކާބޯތަކެތީގެ ޚިދުމަތްދޭ ތަންތަނުން 21:00 ގެ ނިޔަލަށް ހުޅުވައިގެން ޚިދުމަތް ދިނުމާއި، އަދި 00:00 އާ ހަމައަށް، ދެންނެވުނު ތަންތަނުން ޑެލިވަރީގެ ޚިދުމަތް ދިނުމާއެކު،
6. ފިހާރަތަކުން 21:00ގެ ނިޔަލަށް ހުޅުވައިގެން ޚިދުމަތް ދިނުމާއި، އަދި 22:00 ގެ ނިޔަލަށް ޑެލިވަރީގެ ޚިދުމަތް ދިނުން ހިމެނެއެވެ.
މީގެ އިތުރުން، 2021 ސެޕްޓެމްބަރު 4 ވަނަ ދުވަހުން ފެށިގެން ހުޅުދޫ އަދި މީދޫ އިން ފުރާ އެންމެންގެ ޕީ.ސީ.އާރު ނެގެޓިވް ނަތީޖާއަކާއެކު ފުރުމުގެ ހުއްދަ ދިނުމާއި، ޒަރޫރީ ބޭނުމަށް ދަތުރުކުރާ އެންމެހައި ފަރާތްތައް އެޅިފައިވާ އެންމެހައި ފިޔަވަޅުތަކާ އެއްގޮތަށް އަމަލުކުރުމަށް ހެލްތު ޕްރޮޓެކްޝަން އޭޖެންސީން އަންގަވާފައިވާކަމަށް ކައުންސިލްގެ އިއުލާނުގައި ވެއެވެ. އަދި މި ހާލަތުގައި އައްޑޫއިން ދަތުރުކުރުވޭނީ އީއޯސީގެ ހުއްދަ ލިބިގެންކަމަށްވެސް ބުނެފައިވެއެވެ.
އައްޑޫގެ ގުޅިފައިވާ ރަށްތައް މޮނިޓަރިންގެ ހާލަތަށް މީގެ ކުރިން ގެނެސްފައި އޮތްނަމަވެސް ހުޅުދޫ އަދި މީދޫ މޮނިޓަރިންގެ ހާލަތަށް ލާފައިވަނީ މިއަދުގެ ވަގުތެއްގައެވެ. އައްޑޫގައި ކޮވިޑު ހަލުވިކަމާއެކު ފެތުރެމުން އަންނައިރު، އިއްޔެވެސް މި ބައްޔަށް ވަނީ ގިނަ ބަޔަކު ޕޮޒިޓިވް ވެފައެވެ.