އައްޑޫ ސިޓީގެ ހުޅުދޫ އަދި މީދޫ މޮނިޓަރިންގއަށް ލުމާއެކު، އެއަވަށްތަކުގެ ސްކޫލްތައް ބަންދުކުރުމަކީ ޙައްލެއް ނޫންކަމަށް އެ ދެ އަވަށުގެ ސިއްހީ މަރުކަޒުގެ މެނޭޖަރު އިބްރާހިމް ދީދީ ވިދާޅުވެއްޖެއެވެ.
އިބްރާހިމް ދީދީ މިހެން ވިދާޅުވެފައިވަނީ އޭނާ ކޮށްފައިވާ ފޭސްބުކް ޕޯސްޓެއްގައެވެ.
އެ ޕޯސްޓުގައި އޭނާ ވިދާޅުވީ، ކޮވިޑުގެ 24 ކޭސް ހުޅުދޫ އަދި މީދޫގައި އޮތުމަކީ ބޮޑު ސްޕްރެޑެއްކަމުގައި ނުބެލެވޭކަމަށާއި، އެވަރުގެ އާބާދީއެއްގައި 24 ކޭސް އޮތަކަސް ސްކޫލް ބަންދުކުރާކަށް ނުޖެހޭ ކަމަށެވެ. މީގެ އިތުރުން އޭނާ ވިދާޅުވީ ހުޅުދޫ-މީދޫގެ ކޮވިޑް މިހާރު އޮތް ޙާލަތަކީ ސްކޫލް ބަންދުކުރަންޖެހޭ ޙާލަތެއްކަމަށް އޭނާ ނުދެކޭކަމަށެވެ.
އައްޑޫގެ ސްކޫލްތައް ބަންދުކުރުމާއި ގުޅިގެން ޝަރަފުއްދީން ސްކޫލްގެ ކުރީގެ ޕްރިންސިޕަލް ޑރ.އަޙްމަދު ޢަދީލް ނަސީރު ވިދާޅުވީ، ސްކޫލް ބަންދުކުރުމުން ހުރިހާ ގެއްލުމެއް ލިބެނީ ދަރިވަރުންނަށް ކަމަށާއި، އައްޑޫގައި ކޮވިޑް ނެތްއިރުވެސް އައްޑޫގެ ސްކޫލްތައް ބަންދުކުރި ކަމަށެވެ. އަދި ކޮވިޑު ފެތުރެނީ ސްކޫލަކުން، މިސްކިތަކުން ނުވަތަ ރެސްޓޯރެންޓަކުން ނޫންކަމަށާއި، މިއީ މެނޭޖްކުރަންޖެހޭ ކަމެއްކަމަށް ޑރ.ޢަދީލް ވިދާލުވިއެވެ. މީގެ އިތުރުން، މީހުންގެ ހިތުތެރޭގައި ބިރުވެރިކަން އުފެއްދުމަކީ ކަންކަން މެނޭޖުކުރުމުގެ އެންމެ ބޭނުންތެރި އިސްތިރާޖުތޯ އޭނާ ވަނީ ސުވާލު އުފައްދާފައެވެ.
އައްޑޫ ސިޓީގެ ހުރިހައި އަވަށެއްގެ ގްރޭޑް 9 ކުން ފެށިގެން ދަށުގެ ކުދިންނަށް ސްކޫލުވަނީ ބަންދުކޮށްފައެވެ. މިކަމުގެ ސަބަބުން ދަރިވަރުންގެ ނަފްސާނީ ދުޅަހެޔޮކަމަށް ނޭދެވޭ އަސަރުތަކެއް ކުރަމުން އަންނައިރު، ބައެއް ބެލެނިވެރިން ދެކޭގޮތުގައި ދަރިވަރުންގެ ޖިސްމާނީ ދުޅަހެޔޮކަން އިސްކުރަންޖެހެއެވެ.