ރައްޔިތުންގެ މަޖިލީހުގެ ރައީސްގެ މަގާމުން އިސްތިއުފާ ދޭންޖެހޭ ސަބަބެއް ނެތްކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
އިނގިރޭސިވިލާތުގައި ހުންނަވާ ނޫސްވެރިންނާ ބައްދަލުކުރައްވާ ވާހަކަ ދައްކަވަމުން ރައިސް ނަޝީދު ވިދާޅުވީ އެމަނިކުފާނަށް ކުރިމަތިވެފައިވާ ހާލަތު ހުރިހާ ފަރާތްތަކަކަށްވެސް އެނގޭނެކަމަށެވެ. އަދި މިއީ އެމަނިކުފާނު އަމިއްލަފުށަށް ކުރިމަތި ކުރުވި ހާލަތެއް ނޫންކަންވެސް އެނގޭނެކަމަށް ވިދާޅުވިއެެވެ.
ރައިސް ނަޝީދު ރާއްޖެއިން ބޭރުގައި ހުންނެވުމުން މަޖިލިސް ރައީސް ކަމުން އިސްތިއުފާ ދެއްވުމަށް އިދިކޮޅުން ގޮވާލާފައިވާއިރު އެކަމާ ގުޅޭގޮތުން ސުވާލު ކުރުމުން ރައީސް ނަޝީދު ވިދާޅުވީ އެމަނިކުފާނު މަޖިލީހުގެ ރައީސްގެ މަގާމުން އިސްތިއުފާދޭން ނުޖެހޭކަމަށެވެ. އަދި އެމަނިކުފާނު ބޭރުގައި ހުންނެވި ނަމަވެސް މަޖިލީހުގެ މަސައްކަތްތައް ކުރިއަށްދާނެކަމަށް ވިދާޅުވިއެވެ.
މީގެއިތުރުން މަޖިލީހުގެ ރައީސްގެ މަގާމުގެ މުސާރަ ނަންގަވަންތޯ ނޫސްވެރިއަކު ސުވާލު ކުރުމުން ރައީސް ނަޝީދު ވިދާޅުވީ އެ މުސާރަ ނަންގަވާކަމަށެވެ. އަދި އެ މުސާރަ ނަންގަވަނީ އިތުރު ގޮތެއް ނެތީމާކަމަށާއި، އެމަނިކުފާނަށް އިތުރު އާމްދަނީއެއް ލިބޭނެ ގޮތެއް ނެތްކަމަށެވެ.