އިސްލާމީ ހޭލުންތެރިކަން އިތުރުކުރަން ކުރީގެ އިސްލާމިކް މިނިސްޓަރ ޑރ. މުހައްމަދު ޝާހީމް އަލީ ސައީދު އަތޮޅުތެރެއަށް ދަތުރުތައް ކުރައްވަން ނިންމައިފި އެވެ.
ޑރ.ޝަހީމްގެ ފޭސްބޫކް ޕޭޖްގައި ލިޔުއްވާފައިވަނީ އިސްލާމީ ހޭލުންތެރިކަން އިތުރުކުރަން އަތޮޅު ތެރެއަށް ދަތުރުތައް ކުރައްވަން ނިންމެވީ އަތޮޅުތަކުގެ ވަރަށް ގިނަ ރައްޔިތުންނާއި ކައުންސިލްތަކާއި އިސްލާމީ ޖަމިއްޔާތަކުން އެދެމުންދާތީ ކަމަށެވެ. އެހެންވެ އެ ދަތުރުތައް ފައްޓަވަން ނިންމެވީ އިސްލާމީ ހޭލުންތެރިކަން އިތުރުކުރުމުގެ މާތްމަގުސަދުގައި ކަމަށް ޑރ.ޝަހީމް ފޭސްބޫކްގައި ލިޔުއްވާފައިވެ އެވެ.
އެގޮތުން އޭނާ ފައްޓާވާ ދަތުރުގެ ތެރެއިން ފުރަތަމަ ވަޑައިގަންނަވާނީ ތ. އަތޮޅުގެ ބައެއް ރަށްތަކަށް ކަމަށް ޑރ.ޝަހީމް ވިދާޅުވި އެވެ. ތ.ގުރައިދޫ އިސްލާމިކް އެސޯސިއޭޝަންގެ ދައުވަތަކަށް މި މަހުގެ ނުވަ ވަނަ ދުވަހު ފައްޓަވާ އެ ދަތުރުގައި އެ އަތޮޅުގެ ގާދިއްފުއްޓަށްވެސް ޒިޔާރަތްކުރެވޭނެ ކަމަށްވެސް ފާހަގަކޮށްފައިވެ އެވެ.
ޝަހީމް ވިދާޅުވީ ހޭލުންތެރިކުރުމުގެ ޕްރޮގުރާމް ކުރިއަށް ގެންދަވާނީ ގާނޫނާއި ގަވައިދުގެ ތެރެއިން ހުއްދަ ނަގައިގެން ޖަމިއްޔާތަކާއި ކައުންސިލްތަކުން އިންތިޒާމް ކުރާ ގޮތެއްގެ މަތިން ކަމަށެވެ. އޭނާ ވަނީ ހޭލުންތެރިކަން އިތުރުކުރުމުގެ ޕްރޮގުރާމްތައް ހިންގަން ބޭނުންވާ ކައުންސިލްތަކާއި ޖަމިއްޔާތަކަށް އެ ފުރުސަތު ހުޅުވާލާފައި އެވެ.
"ޖަމިއްޔާތަކާއި ކައުންސިލްތަކުގެ ދައުވަތު ގަބޫލު ކުރެވޭނެ އެވެ. ދަތުރުތައް ހަމަޖެއްސުމަށް އަޅުގަނޑުގެ ރަސްމީ ފޭސްބޫކް ޕޭޖަށް މެސެޖްކުރައްވާށެވެ. ވަގުތުވީ މިންވަރަކުން ހަފްތާގެ ބަންދުތަކުގައި ދަތުތައް ޝެޑުލްކުރެވޭނެ އެވެ." ޝަހީމް ލިޔުއްވާފައިވެ އެވެ.
ޕީޕީއެމްގެ އެޑްވައިޒަރެއްގެ ގޮތުގައި މަސައްކަތްކުރައްވާ ޝަހީމް ވަނީ އެއީ އެއްވެސް ވަރަކަށް ސިޔާސީ ކަމެއް ނޫން ކަމަށްވެސް ވިދާޅުވެފައި އެވެ.
"މި ދަތުރަކީ އެއްވެސް ވަރަކަށް ސިޔާސީ ކަމަކާއި ގުޅުންހުރި ދަތުރެއް ނޫނެވެ. މިއީ އިލްމީ ބޭނުމަށްޓަކައި ދައުވަތު ލިބުމުން ދައުވަތުދޭ ފަރާތުގެ އިންތިޒާމްގެ ދަށުން އެ ފަރާތްތަކުން ރާވާ ގޮތެއްގެ މަތިން ކުރެވޭ ދަތުރުތަކެކެވެ. "