ށ.ޅައިމަގުގެ ތަރައްގީއަށް ކުރަން ޖެހިފައިވާ ގިނަ ކަންތައްތަކެއް ކޮށްދެއްވުމަށް އެރަށު ކައުންސިލުން ރައީސް އިބްރާހިމް މުހައްމަދު ސޯލިހް އަރިހުން އެދިވަޑައިގެންފި އެވެ.
ޅައިމަގަށް ވަޑައިގެން ރައީސް ސޯލިހް މިއަދު ވަނީ ޅައިމަގު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީއާ ބައްދަލު ކުރައްވާފައިއެވެ.
ރައީސް އޮފީހުން މައުލޫމާތު ދީފައިވާ ގޮތުގައި މި ބައްދަލުކުރެއްވުމުގައި ކައުންސިލުން އެދިފައިވާވާ ކަންތައްތަކުގެ ތެރޭގައި ހިމެނެނީ
– މިހާރު ކުރިޔަށްދާ އެރަށުގެ ބަނދަރު އެކްސްޕޭންޝަން ޕްރޮޖެކްޓްގެ ދަށުން ބަނދަރު އިތުރަށް ބޮޑުކޮށްދިނުން
– ބަނދަރުގެ ޕްރޮޖެކްޓާއެކު ގޮނޑުދޮށް ހިމާޔަތްކުރުމުގެ ޕްރޮޖެކްޓްކުރިޔަށްގެންދިއުން
– ކަރަންޓުގެ ޚިދުމަތް އިތުރަށް ތަރައްޤީކުރުން
– ޞިއްޙީ ޚިދުމަތުގެ ފެންވަރު މަތިކޮށް ޚިދުމަތް ފުޅާކުރުން
– ފުލުހުންގެ ޚިދުމަތް ޤާއިމުކުރުން
އެކަންކަމާ ގުޅިގެން ރައީސް ވަނީ ބަނދަރު ބޮޑުކުރުމާ ގުޅޭގޮތުން ކަމާގުޅޭ ފަރާތްތަކާއި މަޝްވަރާކުރައްވައިގެން ކުރިޔަށްގެންދިއުމަށް އެދިވަޑައިގަންނަވައި ކަމަށް ރައީސް އޮފީހުން ބުންޏެވެ. އަދި މީގެ އިތުރުން ރަށުގެ ތަރައްޤީއަށް ކުރިޔަށްގެންދެވޭ މަޝްރޫޢުތަކުގެ ފަހުގެ މަޢުލޫމާތުތައް ރައީސުލްޖުމްހޫރިއްޔާ ވަނީ ކައުންސިލާ ހިއްސާ ކުރެއްވި ކަމަށް ބުނެފައިވެ އެވެ.
ށ. ޅައިމަގުގައި މި ސަރުކާރުން ކުރިއަށް ގެންދާ ތަރައްޤީގެ މަޝްރޫއުތަކުގެ އެންމެ ފަހުގެ އަޕްޑޭޓް#PSIPmv pic.twitter.com/YqnQnFaGT4
— Government of Maldives (@governmentmv) September 7, 2021
އެގޮތުން ފުލުހުންގެ ޚިދުމަތް މުޅި ރާއްޖެއަށް ފުޅާކުރުމުގެ ގޮތުން ކުރިޔަށްދާ މަސައްކަތުގެ ތެރެއިން ޅައިމަގަށްވެސް ފުލުހުންގެ ޚިދުމަތް ލިބިގެންދާނެކަން ފާހަގަކުރައްވައި އެރަށަށް އިސްކަން ދެއްވާނެކަމުގައި ރައީސް ވިދާޅުވި ކަމަށް ރައީސް އޮފީހުން ފާހަގަ ކުރެއްވި އެވެ. މީގެ އިތުރުން ކައުންސިލުން ފާހަގަކުރެވި ކަންކަމުގައި ކަމާގުޅޭ އިދާރާތަކާއި މަޝްވަރާކުރައްވައިގެން އެކަންކަން ޙައްލުކުރުމަށް މަސައްކަތްކޮށްދެއްވާނެކަމުގައި ރައީސް ވިދާޅުވި ކަމަށް މައުލޫމާތު ދީފައިވެ އެވެ.
ރައީސުލްޖުމްހޫރިއްޔާގެ ދެ ކަނބަލުން ވަނީ ޅައިމަގު ބަނދަރުގެ މަސައްކަތް ކުރިޔަށްދާގޮތް ބައްލަވާލައްވާފައެވެ. އަދި ރައީސުލްޖުމްހޫރިއްޔާގެ އަނބިކަނބަލުން ވަނީ ޅައިމަގުގެ ބަނދަރު ސަރަޙައްދުގައި އެރަށުގެ އަންހެންބޭފުޅުންކޮޅަކާއި ބައްދަލުކުރައްވައި ޚިޔާލު ބަދަލުކޮށްލައްވާފައެވެ.
އޭގެ އިތުރުން ރައީސުލް ޖުމްހޫރިއްޔާއި ފަސްޓްލޭޑީ ފަޒްނާ އަހްމަދު ވަނީ ޅައިމަގުގައި ހުރި ސަރުކާރުގެ މުހިންމު ތަންތަނަށް ޒިޔާރަތްކުރައްވާފަ އެވެ.
First Lady Fazna Ahmed visits Lhaimagu School and speaks to women from the island community. pic.twitter.com/Xp2rbzL6wU
— The President's Office (@presidencymv) September 7, 2021
ރައީސުލްޖުމްހޫރިއްޔާގެ ދެކަނބަލުން މިހާރު ށ. ޅައިމަގަށް ކުރައްވަމުން މިގެންދަވާ ދަތުރުފުޅަކީ މިލަދުންމަޑުލު އުތުރުބުރީގެ 4 ރަށަކަށާއި، މާޅޮސްމަޑުލު އުތުރުބުރީގެ 4 ރަށަކަށް ކުރައްވާ ދަތުރުފުޅުގެ ދެވަނަ މަންޒިލެވެ. މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ބައެއް ވުޒާރާތަކުގެ ވަޒީރުންނާއި، ރައީސުލްޖުމްހޫރިއްޔާގެ އޮފީހާއި، ދަޢުލަތުގެ ބައެއް އިދާރާތަކުގެ އިސްވެރިންގެ ވަފްދެއް ބައިވެރިވެވަޑައިގަންނަވައެވެ.