ނަފްރަތުގެ ޢަމަލުތަކަކީ ޖިނާއީ ކުށެއްގެ ގޮތުގައި ކަނޑައެޅުމަށްޓަކައި ޤާނޫނުލްޢުޤޫބާތަށް ގެނައުމަށް ސަރުކާރުގެ ފަރާތުން ހުށަހެޅި ބިލަށް އިސްލާމިކް މިނިސްޓްރީން ބޭނުންވާ އިސްލާހްތަކެއް ހުށައަޅައިފި އެވެ.
ނަފްރަތުގެ ބިލް ފާސްކުރުމަަށް ރައްޔިތުންގެ މަޖިލީހުގެ މެޖޯރިޓީ ޕާޓީ، އެމްޑީޕީ ތެރޭގައިވެސް އޮތީ ހިޔާލު ތަފާތުވުން އުފެދި ފައި އެވެ. އަދި އެބިލް ރައްޔިތުންގެ މަޖިލީހުގެ ޖުޑީޝިއަރީ ކޮމިޓީން ދިރާސާކުރެއްވުމަށްފަހު، މަޖިލީހުގެ ތަޅުމާހަމައަށް ގޮސްފައި އޮއްވާ އަނބުރާ އެ ބިލް ކޮމެޓީއަށް ފޮނުވާލި އެވެ. ސަރުކާރު ކޯލިޝަން ޕާޓީތަކުންވެސް ވަނީ އެބިލް މިހާރު އޮތް ގޮތައް ފާސްކުރުމާ ދެކޮޅު ހަދާފައި އެވެ. އެހެންވެ އެ ބިލަށް މަޖިލީހުގެ ކޮމެޓީން ގެނައި އިޞްލާޙުތަކާ ގުޅޭގޮތުން މަޝްވަރާކުރުމަށްޓަކައި ބަންޑާރަ ނައިބު އޮފީހުން ވަނީ ސިލްސިލާ ބައްދަލުވުންތަކެއް ބާއްވާފައި އެވެ. އަދި އެ ބައްދަލުވުންތައް މިއަދު ނިމިފައިވާ ކަމަށް ބަންޑާރަ ނައިބު އޮފީހުން ވަނީ ބުނެފައި އެވެ.
އެ އޮފީހުން މައުލޫމާތު ދިން ގޮތުގައި އެ ބައްދަލުވުންތަކުގައި އިސްލާމިކް މިިނިސްޓްރީއާ އެކު ކުރެވުނު މަޝްވަރާތަކަށްފަހު އެ ބައްދަލުވުމުގައި އެއްބަސްވެވުނު އިޞްލާޙުތައް މިހާރު ވަނީ ރައްޔިތުންގެ މަޖިލީހުގެ ޖުޑީޝިއަރީ ކޮމިޓީއާ ކޮށްފައި އެވެ.
ނަފްރަތު އުފެއްދުމަކީ ކުށެއްކަން ބަޔާންކުރާ ބިލަށް ފާޑުކިޔާ ފަރާތްތަކުން ބުނަނީ އެއީ އިސްލާމް ދީނާ ދެކޮޅަށް ކުރާ މަސައްކަތްތަކާ ދެކޮޅަށް ބަސްބުނާ ފަރާތްތަކަށް އަދަބުދޭން ފަރުވާކޮށްފައިވާ ބިލެއް ކަމަށެވެ. އަދި އެ ބިލް ރައްޔިތުންގެ މަޖިލީހުގެ ޖުޑިޝަރީ ކޮމެޓީން ފާސްކޮށްފައިވާ ގޮތައް މަޖިލީހުން ފާސްކުރަން ސަރުކާރުންވެސް މިހާރު ބޭނުމެއްނުވެ އެވެ.