މިންގަނޑަށް ނުފެތޭ މަގުމަތީގައި ދުއްވުމަށް ރައްކާތެރި ނޫން އުޅަނދުތައް ދެނެގަނެ، އެ އުޅަނދެއްގެ ޙާލަތު ރަނގަޅުކޮށް، އަލުން ރޯދްވާދިނަސް ހަދައިގެން ނޫނީ ޢާއްމު ދަތުރުފަތުރުގެ ނިޒާމް ތެރޭގައި ބޭނުން ނުކުރެވޭ ގޮތަށް ރޯދް ވާދިނަސް ބާޠިލް ކުރުމުގެ އަންނަ މަހުގެ އެއް ވަނަ ދުވަހުން ފެށިގެން ފަށާ ގޮތަށް ފުލުހުން ހަމަޖައްސައިފި އެވެ.
ފުލުހުންނާއި ޓްރާންސްޕޯޓް އޮތޯރިޓީ ގުޅިގެން ފެށުމަށް ހަމަޖެހިފައިވާ މި އޮޕަރޭޝަނަކީ އެއްގަމު ދަތުރުފަތުރުގެ ޤާނުނު ދަށުން ބާރު ލިބިގެން ހެދިފައިވާ "އެއްގަމު އުޅަނދުތަކުގެ ރޯދްވާދިނަސް ޓެސްޓު ހެދުމުގެ ޤާވާއިދު" ގެ 12 ވަނަ މާއްދާގައި ބަޔާންކޮށްފައިވާ ކަންތައްތަކަށް ރިޢާޔަތްކޮށް، 13 ވަނަ މާއްދާގައި ބަޔާންކޮށްފައިވާ ރޯޑްވާދިނަސް ބާޠިލް ކުރުމުގެ ޤަވާއިދުގެ ދަށުން ކުރިއަށް ގެންދާ ޚާއްސަ އޮޕަރޭޝަނެކެވެ.
ޖެނުއަރީ 1، 2014 އިން ފެށިގެން މި އޮޕަރޭޝަން ފުލުހުން ފަށާއިރު ރޯޑްވާދިނަސް ބާޠިލް ކުރުމުގައި، ބެލެވޭ ކަންތައްތަކުގެ ތެރޭގައި ބުރެކި ރަނގަޅަށް ނުޖެހުމާއި، ސައިލަންސަރުގައި ލޯވަޅު އަޅާފައިހުރުމާއި، ސައިލަންސަރަށް ބަދަލު ގެނެސްގެން އަޑު ގަދަވާ ގޮތަށް ބަހައްޓައިގެން ދުއްވުމާއި، ފަހަތުން އަންނަ ވެހިކަލްތައް ފެންނަ ގޮތަށް ލޯގަނޑު ހަރުކޮށްފައި ނެތުމާއި، ވެހިކަލްގެ ލައިޓްތައް ފުރިހަމައަށް މަސައްކަތް ނުކުރުން ހިމެނެ އެވެ.
މީގެ އިތުރުން އިންޖީނުން ކަޅުދުން ބުރުމާއި، އެކަށީގެން ނުވާ ބާރު އަޑެއް އިވޭ އާލާތެއް ހަރުކޮށްގެން މަގުމަތީގައި ދުއްވުމާއި، ރަޖިސްޓްރީ ބޯޑަށް އެއްވެސް ބަދަލެއް ގެނައުމާއި، އުޅަނދު އުފެއްދުމުގައި ހުންނަ އެކިއެކި ބައްތިތައް ފިޔަވައި އިތުރު ބައްތިތައް ނުވަތަ އަލިތައް ބޭނުން ކުރުމާއި ވަކި ކުލައަކުން ދިއްލުމަށް ފާހަގަކޮށްފައި ހުންނަ އަލިތަކުގެ ކުލައަށް ބަދަލު ގެނައުމާއި އުޅަނދުން ތެޔޮ ލީކުވުން ހިމެނެ އެވެ.
ރޯޑްވާދިނަސްގެ މުއްދަތު ހަމަނުވި ނަމަވެސް، ރޯޑްވާދިނަސް މިންގަނޑުތަކަށް ނުފެތޭ ވެހިކަލްތަކުގެ ރޯޑްވާދިނަސް ބާޠިލް ކުރެވޭނެތީ، ރޯޑްވާދިނަސް މިންގަނޑުތަކަށް މިހާރު ނުފެތޭ ހުރިހާ ވެހިކަލްތަކެއްގެ ހާލަތު ރަނގަޅުކޮށް، ރޯޑްވާދިނަސް މިންގަނޑުތަކާއި އެއް ގޮތަށް ބެހެއްޓުމަށް، އެންމެހާ ފަރާތްތަކަށް ޓްރެފިކު ފުލުހުންގެ ހަނދާންކޮށްދެ އެވެ.