އައްޑޫ އީއޯސީ އަދި ފޭދޫ އާއި މީދޫ އަވަށުގެ އެސް.އެސް.ޑީގައި މަސައްކަތް ކުރާނެ ވޮލިންޓިއަރުން ހޯދުމަށް އައްޑޫ ސިޓީ ކައުންސިލުން އިއުލާން ކޮށްފިއެވެ.
އައްޑޫ ސިޓީ ކައުންސިލުން އިއުލާން ކޮށްފައިވާ ގޮތުގައި އައްޑޫ އެމަޖެންސީ އޮޕަރޭޝަންސް ސެންޓަރަށް 6 ވޮލިންޓިއަރުން އަދި އައްޑޫގެ ފޭދޫ އާއި މީދޫ އަވަށުގެ އެސް.އެސް.ޑީތަކަށް 2 ވޮލިންޓިއަރުން ބޭނުންވެއެވެ. އެގޮތުން ކޮންމެ ވޮލިންޓިއަރަކަށް ދުވާލެއްގެ މައްޗަށް 150 ރުފިޔާ ދިނުމަށް ސިޓީ ކައުންސިލުން ވަނީ ނިންމާފައެވެ.
ހަމައެހެންމެ، ދުވާލަކު މަދުވެގެން 6 ގަޑިއިރު މަސައްކަތް ކުރުމުގެ އިތުރުން، ކުރިމަތިލާ ފަރާތްތަކުގެ ތަޢުލީމާއި، މަސައްކަތުގެ ތަޖުރިބާ އާއި، ހުނަރާއި، ޤާބިލްކަމަށް ބަލާފައި ވޮލިންޓިއަރުންނަށް އިސްކަން ދެވޭނެކަމަށް ކައުންސިލުން ވަނީ ބުނެފައެވެ.
ކައުންސިލުން ހާމަކޮށްފައިވާ ގޮތުގައި މިކަމަށް ޝައުޤުވެރިވާ ފަރާތްތަކުން 2021 ސެޕްޓެމްބަރ 09 ވާ ބުރާސްފަތި ދުވަހުގެ 13:00 ގެ ކުރިން ތިރީގައިވާ ލިންކް މެދުވެރިކޮށް އެޕްލިކޭޝަން ހުށައަޅަން ޖެހޭނެއެވެ.
ވޮލަންޓިއަރ އެޕްލިކޭޝަން ލިންކް: https://forms.gle/CwAiwoaHFhCEbJtn9
އައްޑޫ ސިޓީގައި ކޮވިޑް-19ގެ ނުރައްކާ ބޮޑުވެފައިވާ މި ދަނޑިވަޅުގައި އައްޑޫ އެކުއެޓޯރިއަލް ހޮސްޕިޓަލުންވެސް ވަނީ ވޮލިންޓިއަރުން ބޭނުންވެގެން އެކަމަށް އިއުލާން ކޮށްފައެވެ.