އިންޑިއާ އިން ރާއްޖެ އަށް ކަނޑައަޅުއްވާފައި ހުންނަވާ ސަފީރު، މުނޫ މަހާވަރު އައްޑޫ ޕޮލިސް އެކަޑަމީގެ ބައްލަވާލައްވައިފި އެވެ.
އައްޑޫ ޕޮލިސް އެކަޑަމީގެ މަސައްކަތް ބައްލަވައިލެއްވުމަށް އިއްޔެގެ ވަގުތެއްގައި މަހާވަރު ވަނީ އައްޑުއަށް ވަޑައިގެންފައެވެ. މި ދަތުރުފުޅުގައި ކޮމިޝަނަރ އޮފް ޕޮލިސް މުހައްމަދު ހަމީދު ވެސް ބައިވެރިވެވަޑައިގަންނަވަ އެވެ.
ރާއްޖޭގައި އިންޑިއާއިން ހިންގާ އެންމެ ބޮޑު އެއް ޕްރޮޖެކްޓް ކަމުގައިވާ އައްޑޫ ޕޮލިސް ޓްރެއިނިންގ ސްކޫލްގެ މަސައްކަތް ބައްލަވައިލެއްވުމަށް މަހާވަރާއެކު، އައްޑޫގެ މޭޔަރ ނިޒާރު، ޑެޕިއުޓީ މޭޔަރ ޝުއާއު އަދި ކޮމިޝަނަރ އޮފް ޕޮލިސް ހަމީދު ވަނީ އެ ސަރަހައްދަށް ޒިޔާރަތްކޮށްފަ އެވެ.
ޕޮލިސް ޓްރެއިނިންގ ސްކޫލް ސައިޓް ބައްލަވާލެއްވުމަށްފަހު ވާހަކަފުޅުދައްކަވަމުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، ޓްރެއިނިންގ ބެޗަކާއެކު، މާޗުމަހުގެ ފަހުކޮޅުގައި މުޅި ތަން ނިންމައި ރަސްމީކޮށް ހުޅުވޭނެ ކަމަށެވެ. އަދި މި ޕްރޮޖެކްޓަކީ ރާއްޖޭގައި އިންޑިއާއިން ހިންގާ އެންމެ ބޮޑު އެއް ޕްރޮޖެކްޓުކަން ސީޕީ ފާހަގަކުރެއްވި އެވެ.
މިއީ އިންޑިއާގެ އައު ސަފީރު މަގާމާއި ހަވާލުވުމަށްފަހު މާލެ އިން ބޭރަށް ކުރެއްވި ފުރަތަމަ ދަތުރުފުޅެވެ.