އެސްޓީއޯ އިން މި މަހުގެ 26 ވަނަ ދުވަހު ނިންމާލި "ބޮޑު ސޭލަ" ށް ހުޅުމީދޫން ވެސް ބޮޑު ތަރުހީބެއް ލިބުނު ކަމަށް އެސްޓީއޯ ހުޅުމީދޫ ފިހާރައިން ބުނެފި އެވެ.
އެ ފިހާރައިގެ އޮފިޝަލަކު ބުނީ ނޮވެމްބަރު މަހުގެ 20 އިން ޑިސެމްބަރު 26 ގެ ނިޔަލަށް ކުރިއަށް ގެންދިޔަ އަހަރީ ބޮޑު ސޭލްގައި، ހުޅުމީދޫ ފިހާރައިން ވިއްކަމުން ދިޔަ އިލެކްޓްރޯނިކް ސާމާނު ތަކުގެ އިތުރުން އެތަނުން ވިއްކާ އެހެން ތަކެއްޗަށް ވެސް އާންމުންގެ ފަރާތުން އެދެވޭ ތަރުހީބެއް ލިބުނު ކަމަށެވެ.
އެހެން ނަމަވެސް ސޭލުގެ ތެރޭގައި ވިކުނު ތަކެތީގެ ތެރޭގައި ވަކި ހާއްސަ ބާވަތެއް ފާހަގަ ނުކުރެވޭ ކަމަށް އެތަނުން ބުންޏެވެ.
އެސްޓީއޯގެ ހުޅުމީދޫ ފިހާރައިން އާންމުކޮށް ވިއްކަން ހުންނަ ތަކެތީގެ ތެރޭގައި އެކި ސައިޒްގެ ފްރިޖާއި އޭސީ އާއި ފެން މޯޓަރާއި އިސްތިރި އާއި ކުކަރާއި މިކްސަރާއި މަކިޓާ ބްރޭންޑްގެ ތަފާތު އުފެއްދުންތައް ހިމެނެ އެވެ.
މީގެ އިތުރުން އަލްމުދިޝް ކިރާއި ތަފާތު ފްލެވާތަކުގެ ސައި ޕެކެޓާއި ސީރިއަލާއި މޭވާ އާއި ތަރުކާރީގެ ބާވަތްތަކުގެ ދަޅުތައް ހިމެނެ އެވެ.
މި ތަކެތި އާންމުކޮށް އެސްޓީއޯ ހުޅުމީދޫ ފިހާރަ އިން ގަންނަން ލިބުނު ނަމަވެސް، އާންމުން ބޭނުންވާ ކަހަލަ ޓީވީ އެތަނުން ނުލިބޭތީ ވަރަށް ގިނަ ކަސްޓަމަރުން އާންމުކޮށް ޝަކުވާ ކުރާކަން ފާހަގަ ކުރެވެ އެވެ.
އައްޑޫގައި އެސްޓީއޯގެ ހަތަރު ފިހާރަ އެވެ. އެއީ ހުޅުމީދޫ ފިހާރައިގެ އިތުރުން، ހިތަދޫ، މަރަދޫފޭދު އަދި ފޭދޫ ފިހާރަ އެވެ.
މި ހުރިހާ ފިރާތަކުން ވެސް ބޮޑު ސޭލަށް ބޮޑު ތަރުހީބެއް ލިބުނު ކަމަށް އެތަންތަނުން ބުންޏެވެ.