ރާއްޖޭގައި ވާޒީފާއެއްް ނެތް 30،000 މީހުން އެބަ ތިބި، ކަމަށާއި އޭގެ ތެރެއިން ކޮންމެ ވަޒީފާއެއް ލިބުނަސް ދާން ތިބީ 15000 މީހުން ކަމަށް އިކްނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެ އެވެ.
ދައުރު ނޫހަށް ދިން އިންޓަވިއެއްގައި ފައްޔާޒް ވިދާޅުވީ ރާއްޖޭގައި ވާޒީފާ ނެތް މީހުން ނިސްބަތުން ވަރަށް މަދު ކަމަަށެވެ.
"ކޮންމެ ވަޒީފާއެއް ވެސް ނުލިބިގެން އުޅޭ ތިބީ 15000 އަޅުގަނޑު ގަބޫލުކުރާ ގޮތުން. ބާކީ މީހުންނަކީ މިނިސްޓަރުކަން ލިބިއްޖެއްޔާ ފަހަރެއްގައި ވަޒީފާއަށް ނިކުމެދާނެ. މި ދަންނަވަން އުޅޭ ވާހަކައަކީ ވަކި އަދަދެއްގެ މުސާރަ ލިބުނިއްޔާ ނޫނީ ވަޒީފާއަށްދާން ބޭނުން ނުވާ މީހުން. އެއީ ވޮލަންޓިއަރީ އަންއިންޕްޕޮލިމެންޓަރުން ފާޑަކަށް ދަންވާކަމަށްވާންޏާމު،" ފައްޔާޒު ވިދާޅުވި އެވެ.
މިނިސްޓަރު ވިދާޅުވީ ވަޒީފާ ނުލިބުމަށްވުރެ ބޮޑު މައްސަލައަކީ ދިިރިއުޅުމުގެ ހަރަދުތަކާ އެއްވަރުގެ މުސާރައެއް ނުލުބުން ކަމަށެވެ. ވަޒީފާއާ އަދާކުރާ ފަރާތްތަކަށް އެކަށީގެންވާ މުސާރައެއްް ނުލިބޭކަން ގަބޫލުކުރައްވަމުން މިނިސްޓަރު ވިދާޅުވީ ބޮޑު މުސާރައެއް ދެވޭ ވަރުގެ ގާބިލްކަން ވިޔަފާރީ ކުންފުނިތަކުގައިވެސް ނެތް ކަމަށެވެ. އެހެންވެ މިހާރު ގާނޫނުގައިވާ ގޮތުގެ މަތިން މިނިމަމް ވޭޖް ބޯޑުން މަސައްކަތް ކުރަމުންދަނީ ވަޒީފާތަކުގެ ދާއިރާތައް ބަހާލައިގެން އެންމެ ކުޑަ އުޖޫރަދޭނެ ގޮތުގެ އުސޫލެއް އެކުލަވާލަން ކަމަށް ވެސް މިިނިސްޓަރު ވިދާޅުވި އެވެ.
"ޓޫރިސްޓް ރިސޯޓެއްގެ މިނިމަމް ވޭޖާއި ގެސްޓް ހައުސްއެއްގެ މިނިވަމް ވޭޖާއި އެއްވަރު ވެއްޖެއްޔާ އެބަ އިންބެލެންސްއެއް އެބަ އާދޭ. ރިސޯޓަކަށް ބޮޑުކޮން އެބަ ބޭނުުން އެބަ ވޭ މިސާލަށް ބުނަންޏާ. އެކަމު އެއީ ފިކްސްޓް އެއްޗަކަށް ވަންޏާއި ގެސްޓް ހައުސް އެބަ ބަންދުކުރަން ޖެހޭ. އެހެންވެ އަޅުގަނޑު މި ބަލަނީ ފަންތިއަށް ބަހާލައިގެން(އެންމެ ކުޑަ އުޖޫރަ ކަނޑައަޅަން)." ފައްޔާޒު ވިދާޅުވި އެވެ.
މުވައްޒަފުންނަށް މުސާރަ ނުދޭ މައްސަލައާ ގުޅޭ ގޮތުން މިނިސްޓަރު ވިދާޅުވީ އެ ފަދަ މައްސަލަތައް ހައްލުކުރުމަށް ގަވައިދުތަކާއި ގާނޫނުތައް ތަންފީޒުކުރޭތޯ ބެލުން ހަރުދަނާކުރަން ޖެހޭ ކަމަށް ދެކިގެން އިތުރު އިންސްޕެކްޓަރުން ހޯދާފައިވާ ކަމަށެވެ. އަދި އިތުރު އިންސްޕެކްޓަރުން ހޯދާނެ ކަމަށް ވެސް ވިދާޅުވި އެވެ.