"ޗަސްމެ ބައްދޫރު" ފަދަ ފިލްމްތަކުން ބޮޑު މަޝްހޫރު ކަމެއް ހޯދި ބޮލީވުޑްގެ އެކްޓަރު ފާރޫގު ޝެއިހް ހާޓް އެޓޭކެއް ޖެހިގެން ރޭ މަރުވެއްޖެ އެވެ.
މީޑިއާ ރިޕޯޓްތައް ބުނާ ގޮތުގައި ތިން ކުދިން ތިބި، އުމުރުން 65 އަހަރުގެ ފާރޫގް މަރުވީ ދުބާއީގައި އާއިލާ އާ އެކު ޗުއްޓީއަކަށް ގޮސް އުޅެނިކޮށެވެ.
އޭނާ އެންމެ ފަހުން ފެނިގެން ދިޔަ ފިލްމުތަކުގެ ތެރޭގައި މި މަހުގެ 6 ގައި ރިލީޒްވި "ކުލަބް 60" އާއި މި އަހަރު ރިލީޒްވި އެންމެ ކާމިޔާބް އެއް ފިލްމުގެ ތެރޭގައި ހިމެނޭ "ޔެ ޖަވާނީ ހޭ ދީވާނީ" ހިމެނެ އެވެ.
ފިލްމް "ލާހޯރް" ގައި ކުޅުނު މޮޅު ރޯލަށް ފާރޫގަށް ވަނީ 2010 ވަނަ އަހަރު އެންމެ މޮޅު ސަޕޯޓިން އެކްޓަރުގެ ގައުމީ އެވޯޑް ވެސް ލިބިފަ އެވެ. މީގެ އިތުރުން ވެސް އޭނާއަކީ ތަފާތު ގިނަ އެވޯޑްތަކެއް ހާސިލްކޮށްފައިވާ އެކްޓަރެކެވެ.
އޭނާގެ ފާހަގަކޮށްލެވޭ އިތުރު ފިލްމްތަކުގެ ތެރޭގައި 1973 ގައި ރިލީޒްވި "ގަރަމް ހަވާ" އާއި 1977 ގެ ފިލްމް "ޗެސް ޕްލެޔާ" އަދި 1979 ގައި ރިލީޒްވި "ނޫރީ" ފަދަ ފިލްމްތައް ހިމެނެ އެވެ.
ފާރޫގް ޝެއިހް ވަނީ ޒީ ޓީވީން މީގެ އަހަރުތަކެއް ކުރިން ގެނެސް ދިން ސެލެބްރިޓީ ޝޯ "ޖީނާ އިސީކަ ނާމް ހޭ" ވެސް ހޯސްޓްކޮށްފަ އެވެ.
ފާރޫގް ޝެއިހް މަރުވި ހަބަރާ އެކު ބޮލީވުޑްގެ ފަންނާނުން އަންނަނީ ޓްވިޓާ މެދުވެރިކޮށް ހިތާމަ ފާޅުކޮށް، އާއިލާ އަށް ތައުޒިޔާގެ މެސެޖްތައް ވެސް ފޮނުވަމުންނެވެ.
އޭނާގެ ޖަނާޒާ މުމްބާއީގައި މިއަދު ބާއްވާ ގޮތަށް ވަނީ ހަމަޖެހިފަ އެވެ.