މި އަހަރުގެ ބައިނަލްއަޤްވާމީ ޓޫރިޒަމް ދުވަސް އައްޑޫގައި ފާހަގަނުކުރަން ނިންމައިފިއެވެ.
ޓުއަރިޒަމް މިނިސްޓްރީގެ އޮފިޝަލަކު ވިދާޅުވެފައިވާ ގޮތުގައި އައްޑޫގައި ބާއްވަން ހަމަޖެއްސި ޓުއަރިޒަމް ދުވަސް ކެންސަލްކުރަން އެ މިނިސްޓްރީން ވަނީ ނިންމާފައެވެ.
އަދި މި އަހަރުގެ ޓުއަރިޒަމް ދުވަސް ފާއިތުވެދިޔަ އަހަރާ އެއްގޮތަށް ކުލަގަދަކޮށް ފާހަގަނުކުރަން އެ މިނިސްޓްރީން ވަނީ ނިންމާފައެވެ. ނަމަވެސް ގޯލްޑަން ޔިއަރ ކަލަންޑަރާއި އެމްޕްލޯއިމެންޓް އެޕްލިކޭޝަން ތަޢާރަފުކުރުމުގެ ކަންކަން މާލޭގައި އޮންނާނެ ކަމަށް އޮފިޝަލު މަޢުލޫމާތު ދެއްވިއެވެ.
ކޮވިޑުގެ ކޭސްތައް މަދުވުމާއެކު މި އަހަރުގެ ޓުއަރިޒަމް ދުވަސް އައްޑޫގައި ކުލަގަދަކޮށް ފާހަގަކުރަން ނިންމާފައި އޮތް ނަމަވެސް އައްޑޫގެ ކޮވިޑުގެ ހާލަތު މިހާރު ވަނީ ގޯސްވެފައެވެ. ކޮންމެ އަހަރެއްގެ ސެޕްޓެމްބަރުމަހުގެ 27 ވަނަ ދުވަހު ފާހަގަކުރާ ޓުއަރިޒަމް ދުވަސް އައްޑޫގައި ފާހަގަކުރަން ނިންމުން ވެގެންދިޔައީ ގިނަ ބައެއްގެ ފާޑުކިއުންތައް އަމާޒުވެގެން ދިޔަ ކަމަކަށެވެ. އެގޮތުން އައްޑޫގައި 3 ރިސޯޓު އޮތްއިރު، 2 ރިސޯޓު އޮތީ ކޮވިޑުގެ ސަބަބުން ބަންދުކުރިގޮތަށް ނުހުޅުވާއެވެ. އަދި މީގެ ސަބަބުން ގިނަ ބައެއްގެ ވަޒީފާ ގެއްލި، އެތައް ތަކުލީފެއް އައްޑޫގެ ރައްޔިތުން އަންނަނީ ތަހައްމަލު ކުރަމުންނެވެ.