ޓިކްޓޮކްގައި އާންމު ކޮށްފައިވާ އޮރިޔާން ވީޑިއޯއަކީ ބޭޒާރުކުރުމަށް އޭނާގެ މޫނު އެޑިޓްކޮށްގެން ބަޔަކު ހަދާފައިވާ ވީޑިއޯއެއްކަމަށް ބަރަހަނާ ވީޑިއޯއެއް އާންމުކުރުމުން ހައްޔަރު ކޮށްފައި ހުރި މުހައްމަދު ނަބީލް ކޯޓުގައި ބުނެފިއެވެ.
ނަބީލްގެ ބަންދު މުއްދަތު ޖެހުމަށް ކޯޓަށް ގެންދިއުމުން ކްރިމިނަލް ކޯޓުގައި އިއްޔަ ނަބީލް ބުނެފައިވަނީ، ސޯޝަލް މީޑިއާގައި ދައުރުވާ އޮރިޔާންކާޑު ވީޑިއޯއަކީ އޭނާ ހަދާފައިވާ ވީޑިއޯއެއް ނޫންކަމަށާއި، އެ ވީޑިއޯއަކީ އޭނާގެ ވީޑިއޯއެއް ނޫންކަމަށެވެ.
ޓިކްޓޮކްއަށް ތިން މިނެޓްގެ ވީޑިއޯއެއް ނުލެވޭނެކަމަށާއި، އަޕްލޯޑް ކުރެވެނީ 60 ސިކުންތުގެ ވީޑީއޯއެއް ކަމަށްވެސް ނަބީލް ބުނެފައިވެއެވެ. އަދި އެއީ ބަޔަކު އޭނާ ބޭޒާރުކުރުމަށް އޭނާގެ މޫނު އެޑިޓްކޮށްގެން ހަދާފައިވާ ވީޑިއޯއެއްކަމަށްވެސް ނަބީލް ވަނީ ކޯޓުގައި ބުނެފައެވެ.
މީގެ އިތުރުން ނަބީލް ވަނީ އޭނާ އަންހެން ހެދުން އަޅައިގެން ޓިކްޓޮކް ވީޑިއޯ އުފައްދާފައިވާނެކަމަށް އެއްބަސްވެފައެވެ. އަދި އޭނާ މިހާރު ވަރަށް ބޮޑަށް ބޭޒާރުވެފައިވާކަމަށާއި މަގުމަތީގައިވެސް ނޫޅެވޭކަމަށާއި، އޭނާއަށް މަރުގެ އިންޒާރު ދީފައިވާކަމަަށާއި، ގެއަށް އައިސްވެސް މީހުން އިންޒާރު ދީފައިވާކަމަށެވެ. އެހެންނަމަވެސް އެ އިންޒާރުތައް ދީފައިވަނީ ޓިކްޓޮކް ކުޅުމުގެ ސަބަބުން ނޫންކަމަށްވެސް ނަބީލް ކޯޓުގައި ބުނެފައިވެއެވެ.
އޮރިޔާން ވީޑިއޯއެއް ޓިކްޓޮކްގައި އާންމުކުރި މައްސަލައިގައި ކޯޓު އަމުރެއްގެ ދަށުން ނަބީލް ހައްޔަރުކުރިއިރު، އޭނާގެ ބަންދަށް އިއްޔަ ކޯޓުން ވަނީ 15 ދުވަސް ޖަހައިދީފައެވެ.