ރައްޔިތުންގެ މަޖިލީހުގެ ދަނގެތިދާއިރާގެ މެމްބަރު، މުހައްމަދު ނާޒިމާއި އިތުރު ބައެއް މެމްބަރުން އިސްކޮށް ހުންނަވައިގެން އުފައްދަވާ މޯލްޑިވްސް ނޭޝަނަލް ޕާޓޯ(އެމްއެންޕީ) ރަޖިސްޓްރީކުރަން މާދަމާ އިލެކްޝަނަށް ހުށައަޅަން ތައްޔާރުވެއްޖެ އެވެ.
އެމްއެންޕީ އުފެއްދުމުގައި އިސްކޮށް އުޅުއްވާ ކުރީގެ ޕޮލިސް ކޮމިޝަނަރ، އަދި ދަނގެތި ދާއިރާގެ މިހާރުގެ މެމްބަރު އަބްދުﷲ ރިޔާޒް އައްޑޫލައިވްއަށް މިއަދު ވިދާޅުވީ އެމްއެންޕީ ރަޖިސްޓްރީ ކުރަން މާދަމާ ހުށައަޅާނީ 5000 މެމްބަރުންނަށް ވުރެ ގިނަ މެމްބަރުންގެ ސޮޔާއެކު އެވެ.
ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓާ) އާއި ނިލަންދޫ ދާއިރާގެ މެމްބަރު އަބްދުލްމުހްސިން ހަމީދާއި ވިލިމާލެ ދާއިރާގެ މެމްބަރު އަހްމަދު ހުޝާމް ވެސް ހިމެނިވަޑައިގަންނަވާ އެމްއެންޕީ އުފެއްދުމުގެ މަސައްކަތް ކުރަން އިލެކްޝަނުން ހުއްދަ ދިނީ މިދިޔަ ޖުލައި މަހުގެ 15 ވަނަ ދުވަހު އެވެ. އޭގެ ފަހުން މިއަދާ ހަމައަށް އެ ޕާޓީއަށް ގިނަ އަދަދެއްގެ އާއްމުން ވަނީ ސޮއިކޮށްފައި އެވެ. އަންނަ ރިޔާސީ އިންތިހާބުގައި ކެންޑިޑޭޓަކު ނެރެން ނިންމާ އުފައްދާ އެ ޕާޓީއަކީ އެންމެ މަގުބޫލު ޕާޓީއަށް ވާނެ ކަމަށް އެ ޕާޓީން އުއްމީދުކުރެ އެވެ.
"އަޅުގަނޑުމެން އުއްމީދު ކުރަނީ މި ރާއްޖޭގައި އެންމެ މަގުބޫލުު ޕާޓީއަށްވާނެ ކަމަށް. މިހާތަނަށް ޕާޓީއަށް ވަނީ ތައުލީމީ އަދި އެކި ރޮނގު ރޮނގުން ފާހަގަކޮށްލެވޭ މީހުން ޕާޓީއާ ގުޅިފައި. ކުރިމަގުގައި މިއަދަދު ދާނީ އިތުރުވަމުން އެއީ ޝައްކެތް ހިނގާކަމެއް ނޫން،" ރިޔާޒް ވިދާޅުވި އެވެ.
ރާއްޖޭގައި 10 ޕާޓީއެއް މިހާރު ވެސް ރަޖިސްޓްރީކޮށްފައި އެބައޮތެވެ. އޭގެތެރެއިން ގާނޫނުގައި ޕާޓީއެއް އުފައްދަން ބޭނުންވާ 3،000 މެމްބަރުން ހަމަވަނީ މަދު ޕާޓީއެއްގަ އެވެ.