ބޮލީވުޑްގެ މަޝްހޫރު އެކްޓަރު ރިތިކް ރޯޝަން އާއި ސުޒޭންގެ 13 އަހަރުވީ ކައިވެނި ނިމުމަކަށް އައި ހަބަަރަކީ މި އަހަރުގެ އެންމެ ހޫނު އެއް ހަބަރުގެ ތެރޭގައި ހިމެނޭ ވާހައެކެވެ.
ދެ ކުދިން ވެސް ލިބިފައިވާ އެ ކައިވެނި ރޫޅުމާ އެކު ބައެއް މީޑިއާތަކުން އަޑޫ ފަތުރާފައި ވަނީ ރިތިކް އާއި ސުޒޭންގެ ކައިވެނި ނިމުމަކަށް އަންނަ ޖެހުނީ އެކްޓަރު އަރުޖުން ރާމްޕާލްގެ ސަބަބުން ކަމަށެވެ. އަދި އެ މީހުންގެ މެދުގައި އަޑި ނޭނގޭ ހާއްސަ ގުޅުމެއް އޮންނަ ކަމަށް އަޑު ފަތުރާފައިވެ އެވެ.
އެ ވާހަކަ އަށް ސުޒޭން ދިން ރައްދަކީ އޭނާގެ ކައިވެނި ރޫޅުމުގެ ޒިންމާ އެހެން އެއްވެސް މީހެއްގެ ބޮލުގައި ނޭޅުވޭނެ ކަމަށް ބުނުމެވެ. އަދި އެކަމުގައި އަރުޖުންގެ ވެސް އަދި އެހެން މީހެއްގެ އަތެއް ވެސް ނެތް ކަމަށް ސުޒޭން ވަނީ ބުނެފަ އެވެ.
ސުޒޭން އަދި ބުނީ ރިތިކް އާއި އޭނާ 2000 ވަނަ އަހަރު ކުރި ކައިވެނި ނިމުމަކަށް އައީ "ވަކި ހާއްސަ" ސަބަބެއް އޮވެގެން ނޫން ކަމަށެވެ.
އެކަމަކު ފާހަގަ ކުރެވޭ ކަމަކީ އެ ކައިވެނި ރޫޅުނީ، މައްސަލަތައް ޖެހި މީޑިއާތަކުގައި ވެސް އެ ވާހަކަ ދޭތެރެ ދޭތެރެ އިން ފެތުރެމުން ދަނިކޮށް ކަމެވެ.
އެހެންވެ މީޑިއާތަކުން ހަގީގަތާ ހިލާފު ވާހަކަތައް ނުފެތުރުމަށް އޭނާ ވަނީ އެދިފަ އެވެ. އެކަމަކު އެ ކަމަކަށް ނިމުމެއް ނާދެ އެވެ.
މި ފަހަރު އަދި މި އޮތީ މުޅިން އާ ވާހަކަ އެވެ. މީޑިއާތަކުން މިހާރު ރިޕޯޓް ކުރާ ގޮތުގައި ސުޒޭން، ރިތިކް ކައިރިން ވަރިވީ ދެ މީހުންެގެ ދެމެދުގައި ހެދުނު 100 ކްރޯޑް ރުޕީސްގެ އެއްބަސްވުމެއްގެ ދަށުންނެވެ.
މި ވާހަކަތައް އަޑު އަހާފައި ސުޒޭން ވަނީ އެއްވެސް ހަގީގަތެެއް ނެތް، ދޮގު ވާހަކަތަކެއް ކަމަށް ބުނެފަ އެވެ. އަދި އެފަދަ ވާހަކަތައް ތަކުރާރުކޮށް މީޑިއާތަކުން ފަތުރާތީ ޒިންމާރުވާން އޭނާ ވަނީ އިލްތިމާސް ވެސް ކޮށްފަ އެވެ.
"އެއީ އެއްވެސް ހަގީގަތެއް އޮތް ވާހަކައެއް ނޫން. އެ ވާހަކަ ނޫސްތަކުން ކިޔާފައި ވަރަށް ދެރަވި. އަހަރެން އެދެން މީޑިއާތަކުން ެފަދަ ވާހަކަތައް ނުފެތުރުމަށް،" ކުރީގެ މަޝްހޫރު އެކްޓަރު ސަންޖޭ ހާންގެ ދަރިފުޅު އަދި އެކްޓަރު ޒައިދު ހާންގެ ދައްތަ ބުންޏެވެ. "ދެ މީހެއްގެ ޒާތީ ގުޅުމަކާ ބެހޭ ގޮތުން މިފަދަ ވާހަކަަތައް ފެތުރުމަކީ ވަރަށް ދެރަ ކަމެއް. އަދި އެއީ ގަބޫލް ކުރެވޭނެ ކަމެއް ވެސް ނޫން."
ރިތިކް އާއި ސުޒޭން ޑިސެމްބަރު 13، 2000 ގައި ކުރި ކައިވެނި ރޫޅާލީ މި މަހުގެ 13 ވަނަ ދުވަހު އެވެ.
ބޮލީވުޑްގެ ސެލެބްރިޓީންގެ މުސްތަގުބަލާ ގުޅޭ ގޮތުން ދާދި ފަހުން ފާލު ބަލާ މީހަކު ބުނި ގޮތުގައި 2015 ވަނަ އަހަރު ރިތިކް އާ ކައިވެންޏެއް ވެސް ކުރާނެ އެވެ.