ބްލޮގަރު ޔާމީން ރަޝީދު މަރާލި މައްސަލާގައި ދައުލަތުން ދައުވާކުރާ މީހުން، އެމީހުންނާ ދެކޮޅަށް ކޯޓަށް ހުށައެޅި ހެކިތަކާ މެދު ސުވާލު އުފައްދާ، އެ ހެކިތައް ގަބޫލު ނުކުރެވޭނެ ކަމަށް ބުނެފި އެވެ.
ތޫނު އެއްޗެހިން ހަމަލާދީ ޔާމީން މަރާލި މައްސަލާގައި ދައުލަތުން ދައުވާކުރަނީ މ. ތާއިފް، އިސްމާއިލް ރަޝީދުގެ އިތުރުން ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލާއި ގދ. ގައްދޫ ސިންދުބާދުގޭ، މުހައްމަދު ދިފްރާނާއި މ. ކުދެހިގޭ ހަސަން ޝިފާޒް އިތުރުން މ. ކޮޅުފުށީ އީސްޓް، ހުސައިން ޒިޔާދުގެ މައްޗަށެވެ.
މި މައްސަލައިގައި މިއަދު ކްރިމިނަލް ކޯޓުގައި ބޭއްވި ޝަރީއަތުގެ އަޑުއެހުމުގައި ހެއްކާ ބެހޭ ގޮތުން ވާހަކަ ދެއްކިއިރު ދިފާއީ ވަކީލުން ވަނީ މައްސަލަ ސާބިތުކުރަން ހުށައެޅި ހެކިން ޝާރީއަތައް ގަބޫލު ނުކުރެވޭނެ ކަމަށްވެސް ފާހަގަ ކުރައްވާފައި އެވެ.
އިސްމާއިލް ރަޝީދާ ދެކޮޅަށް ހުށައެޅި އެއްކަކީ ހަމަލާގެ ބައިވެރިއެއް؟
އިސްމާއީލް ރަޝީދުގެ ދިފާއީ ވަކީލް މައުމޫން ހަމީދު މިއަދު ވިދާޅުވީ ދައުލަތުން ހުށަހެޅި ސިއްރު ހެކިވެރިންގެ ތެރެއިން އެކަކީ ޔާމިނަށް ހަމަލާދިން މީހެއް ކަމަށް ގަބޫލު ކުރެއްވޭ ކަމަށެވެ. އެކަން އެމީހާ ދިން ހެކިބަހުން ދޭހަވާ ކަމަށް މައުމޫނު ވިދާޅުވި އެވެ. ހަމައެހެންމެ ދައުލަތުން ހުށައެޅި ހެކިންނާ ދައުލަތުގެ ވަކީލުން ބައްދަލުކޮށްފައިވާކަން އެމީހުންގެ ހެކިބަހުން އެނގޭއިރު އެއީ ހެއްކަތް ނުފޫޒުފޯރުވުމަށް ލިބޭ ފުރުސަތެއްކަން ވެސް މައުމޫނު ފާހަގަ ކުރެއްވި އެވެ. މީގެ އިތުރުން އިސްމާއިލް ރަޝީދާ ދެކޮޅަށް ދައުލަތުން ހުށައެޅި ހެކިންގެ ތެރެއިން އެކަކު އަނެއްކަކު ދައްކާ ވާހަކަ ދިމާނުވާ ކަމަށްބުނެ ހެކިބަހުގައި ފުށުއެރުންތައް ހުރިކަމަށްވެސް މައުމޫނު ވަނީ ފާހަގަކުރައްވާފައި އެވެ.
މައުމޫން ވަނީ ދައުލަތުން ކޯޓަށް ހުށައެޅި ހެކީގެ ތެރޭގައި ހިމެނޭ ވީޑިއޯ ފުޓޭޖްތަކުގެ ޗެއިން އޮފް ކަސްޓަޑީ ވެސް ދިމައެއް ނުވާ ކަމަށް ފާހަގަ ކުރައްވާފައި އެވެ. އަދި އޭނާ ވަނީ ވީޑިއޯތަކުގެ ތަހުލީލު ރިޕޯޓް ހެދި ފުލުސް މީހާގެ ހެކިބަހަށް ބަސް ގަބޫލު ނުކުރެވޭނެ ސަބަބުތަކެއް ހުރިކަމަށް ވިދާޅުވެ އެކަންތައްތައް ފާހަގަކުރައްވާފައި އެވެ.
ޒިޔާދާ ދެކޮޅަށް އެންމެ ހެއްކެތް؟
ޒިޔާދުގެ ވަކީލް އަބްދުﷲ ޝާއިރު ވިދާޅުވީ މި މައްސަލައިގައި ދައުލަތުން ޒިޔާދުއާ ދެކޮޅަށް ބޭނުން ކުރަން ލިބިފައިވަނީ ހަމައެކަނި ސިއްރުން ހެކިބަސް ދިން މީހެއްްގެ ހެކިބަސް އެކަނި ކަމަށެވެ. އެހެންވެ ހެއްކާ ގުޅޭ ގޮތުން ގިނަ ކަންތައްތަކެއް އޭނާ ފާހަގަ ނުކުރައްވަ އެވެ.
ދިފްރާނާ ދެކޮޅަށް ސިއްރު ހެކިވެރިން ދެއްކި ވާހަކަ ސާބިތުކުރާނެ އިތުރު ހެއްކެތް ނެތް
ދިފްރީންގެ ވަކީލް އިސްމާއިލް ވިޝާމް ވިދާޅުވީ ސިއްރު ހެކިވެރިއަކު ބުނާ ބުނުމެއް ފިޔަވައި އިތުރު ހެއްކެއް އެ މައްސަލާގައި ނެތް ކަމަށެވެ. އަދި އެމީހުން ދިން ހެކިބަހުގެ ތެދުކަން ސާބިތުކުރަން އެ ވާހަކަތަކަށް ބާރުލިބޭ އިތުރު ހެއްކެތް ވެސް ނެތް ދައުލައް ހުށައެޅިފައިނުވާ ކަމަށް ދިފާއީ ވަކީލް ވިދާޅުވިއެވެ. އޭގެ އިތުރުން ވިޝާމް ވެސް ވަނީ ދައުލަތުން ހުށައެޅި ވީޑިއޯ ފޫޓޭޖާ ބެހޭ ގޮތުން ސުވާލު އުފައްދާފައި އެވެ.
މި މައްސަލައިގައި ދެން އަޑުއެހުމެއްް އޮންނާނީ އަންނަ އާދިއްތަ ދުވަހު އެވެ. ޔާމިން ރަޝީދަށް ތޫނު އެއްޗަކުން ހަމަލާދީ އޭނާ މަރާލީ 2017 ވަނަ އަހަރު އެވެ.