(ޑިސެމްބަރު 29، 2013 ވަނަ ދުވަހުގެ ބަޔާ ގުޅޭ)
* އަތޮޅުގެ ރައްޔިތުންނަށް އަބްދުﷲ ހަމީދު ދިން ހަދިޔާ:
އެޕްރީލް މަހުގެ ކޮންމެވެސް ދުވަހެއްގެ ހަވީރެކެވެ. އަހަރަކީ 1992 ވަނަ އަހަރެވެ. ފެކްޓަރީގެ އިސް ވެރީން ހަވީރު ސައި ބޮއެގެން ނުކުމެގެން ދަނިކޮށް ލިބުނު ޚަބަރަކީ ކުރިޔަށް އޮތް ދުވަހު ހެނދުނު ފެކްޓަރީގައި މަސައްކަތްކުރާ އެއްވެސް ބަޔަކަށް ގަމަށް ނޭގޮތަށް އޭޑީއޭގެ ޗެއަމަން އަލްއުސްތާޒު ޢަބްދުﷲ ހަމީދު އަމުރު ނެރުއްވައިފި ކަމުގަ އެވެ.
އޭޑީއޭގެ ހުރިހާ ގާރޑުން މިކަމަށް ވަރަށް ބޮޑަށް ތައްޔާރު ވެފައި ވެއެވެ. ހިތަދޫ، މަރަދޫ، މަރަދޫފޭދޫ، ފޭދޫ، ހުޅުދޫ، މީދޫ ގެ އެއްވެސް ބަޔަކަށް ގަމަށް ނޭރޭނެހެން އިންތިޒާމުތައް ވަނީ ވަރުގަދަކޮށްފަ އެވެ.
މިގޮތަށް ހަމަޖައްސަން ޖެހުނު ސަބަބެއް ކަމަށް ބުނެ އުޅޭ އަޑު އިވެނީ ފެކްޓަރީން އޭޑީއޭ އަށް ދައްކަން ޖެހޭ ބިމުގެ ކުލި ނުދައްކައި އޮތުމެވެ. މިއީ ދެ ކުންފުންޏެއްގެ ދޭތެރޭގެ މުޢާމަލާތެއް ކަމުގައިވީ ނަމަވެސް ކުންފުނީގައި މަސައްކަތް ކުރާ މުވައްޒަފުންނާ މެދު ފިޔަވަޅު އެޅެނީ ޔޯލަ އެވެ.
މި ލިބުނު ޚަބަރާ ގުޅިގެން ފެކްޓަރީގެ އިސް މުވައްޒަފުން މިކަމަށް ވަރަށް ބޮޑަށް ތައްޔާރުވެގެންފި އެވެ. އެ ރޭގެ އަރާމު ނިދިން ހޭލައިގެން ވަޒީފާ އަށް ދިއުމަށްޓަކައި އަތޮޅުގެ އެކިރަށް ރަށުން މީހުން ގަމަށް ދާން ފަށައިފި އެވެ. ބަހުންނާއި ކާރުންނެވެ. ސައިކަލުންނާއި ބައިސިކަލުންނެވެ. ސަވާރީއެއް ނުލިބޭ މީހުން ހިނގާފަ އެވެ.
ގުޅިފައިވާ ރަށްރަށުގެ މީހުން ގަމަށް އަރާން ދިޔަ އިރު ކަމަކު ދާކަށް ނެތެވެ. ގަމުގެ ގާޑްރޫމާ ވީ ފަރާތުގެ ބޮޑުގޭޓް ވަނީ ބަންދުކޮށް ތަޅުލާފަ އެވެ. ހަމަ އެހެންމެ ހުޅުމީދޫ މީހުން ދޯނިން އައިސް ޖެޓީއާ ކައިރި ކުރުމުން އޭޑީއޭގެ ގާޑުން އެ މީހުން ޖެޓީ އަށް ފޭބުން މަނާކޮށްފި އެވެ. އެ މީހުންނަށް ޖެހުނީ ގަމަށް ނުފައިބައި ދޯނީގައި ތިބޭށެވެ. މިގޮތަށް ތިބެފައި އެންމެފަހުން ދާންޖެ ހުނީ ރަށާވީ ކޮޅަށެވެ.
ގުޅިފައިވާ ރަށްރަށުން ގަމަށް ދިޔަ މީހުން ގަމާއި ފޭދުއާ ދޭތެރޭގައިވާ ފާލަމުގައި ތާށިވެއްޖެ އެވެ. ފާލަން ފުރިބާރުވުމުން ދެން ތިބި މީހުން ތިބީ ފޭދޫގެ ގަމާވީ ކޮޅުގަ އެވެ.
މަންޒަރު ދުށް މީހުން ބުނަނީ ދުނިޔޭގެ އެންމެ ކާރޫބާރޫ ބޮޑު ސަހަރެއްގެ މަގުމަތީ ޓްރެފިކް އެންމެ ބާރުވެފައި އޮންނަ އިރު ސިފަވާ މަންޒަރާއި އެ ދުވަހު ފާލަން މަތީން ފެނުނު މަންޒަރު ތަފާތެއް ނެތް ކަމުގަ އެވެ.
އެއްވެސް ގޮތަކަށް އެއްވެސް ސަވާރީއަކަށް ވެސް އަދި މީހަކަށް ވެސް ގަމަށް އެރޭނެ ގޮތެއް ނެތެވެ. މި ޚަބަރު ލިބިގެން ކުރީރޭ ރޭގަނޑު ގަމުގައި އޯވަޓައިމަށް ތިބި ހުޅުމީދޫ މީހުން ގާރޑްރޫމާ ދިމާއަށް ހިނގައިގެންފި އެވެ.
މި މީހުން ގޮސް ގާޑްރޫމާ ދިމާލުގައިވާ ދޮރާށި ކައިރީގައި މަޑުކޮށްފި އެވެ. މާ ގިނަ ވަގުތުތަކެއް ނުވަނީސް ގަމުގައި ތިބި ހުޅުމީދޫ މީހުން ގަމުން ބޭރުވުމަށްޓަކައި ގާޑްރޫމުގެ މައި ދޮރާށި ހުޅުވައި ދިނުމަށް އޭޑީއޭގެ ގާރޑުން ގާތު އެދެން ފަށައިފި އެވެ. މި ދޮރާށި ހުޅުވައި ނުދޭން ގާޑުން ވަރަށް އުޅުނޫ އެވެ.
ދޮރާށި ހުޅުވައި ނުދީ ހިފެހެއްޓުމަށް އުޅުނު އިރު ހުޅުމީދޫ މުވައްޒަފުން ތިބީ ހެނދުނުގެ ސައި ބުއިމަށްޓަކައި ސައި ފިހާރައަކަށް ދެވޭނެ މަގެއް ނެތިފަ އެވެ.
ހޫނުވަމުން ދާ އިރާއި ބަނޑުން އަރާ ހޫނުން ދޮންވެފައި ތިބި މުވައްޒަފުން ދޮރާށި ނުހުޅުވައިފި ނަމަ ދޮރާށި ފުނޑާލާނެ ކަމަށް ބުނެ އިންޒާރުތައް ދޭން ފެށުމުން އޭޑީއޭގެ ގާރޑުންގެ ހިތަށް ބިރުވެރި ކަމާއި ސިހުން ވަދެ އެ އުރެންގެ ސަރުދާރު މަޝްހޫރު ދުންބޯގެ ހުއްދަ ނުވެސް ލިބި ދޮރާށި ހުޅުވައި ދީފި އެވެ.
ފާލަން މަތީ ތިބި މީހުންނާއި ގަމުން ނުކުތް ހުޅުމީދޫ މީހުން ބައްދަލުކޮށް ފިއެވެ. ގަމުން ނުކުތް މީހުން ދިން މަޝްވަރާ އާ އެއްގޮތްވާ ގޮތުގެ މަތީން އެތާގައި ތިބި އެންމެން ސަވާރީތަކަށް އަރައިގެން އަތޮޅު އޮފީހަށް ދިއުމަށްޓަކައި މިސްރާބު ޖަހައިފި އެވެ. ފައި މަގުގައި ދިޔަ ބައެއް މީހުން ވަރަށް އަސަރާއެކު ގަމުގެ ދޮރާއްޓަށް ނަޒަރު ހުއްޓާލައިގެން އަދިވެސް ތިބީ އެވެ.
އައްޑު އަތޮޅުގެ ރައްޔިތުންނަށް ލާބައާއި މަންފާ ހޯދައިދީ އަތޮޅު ތަރައްގީ ކުރުމަށްޓަކައި ސަރުކާރުން އުފައްދަވާފައިވާ އައްޑޫ ޑިވެލޮޕްމެންޓް އޮތޯރިޓީ، އޭޑީއޭ ގެ ފަރާތުން އަތޮޅުގެ ގިނަ ޢަދަދެއްގެ މުސާރަދާރުންނާ މެދު މި އެޅި ފިޔަވަޅުގެ ސަބަބުން އަތޮޅުގެ ގިނަ ރައްޔިތުންގެ މޫނުމައްޗަށް ހުރީ ޖަންބު ކުލަ އަރާފަ އެވެ.
މި މީހުންނަށް ހިތަދު އަށް ދެވުނީ ގާތްގަނޑަކަށް ހެނދުނު 08:20 ހާކަށް އިރު އެވެ. އެއިރު އަތޮޅުވެރިޔަކަށް ހުންނެވީ ޢަބްދުއްސައްތާރު ހަސަނެވެ.
މި މީހުން އަތޮޅު އޮފީހަށް ދިޔައިރު އަތޮޅުވެރިން އޮންނެވީ އަވަހާރަފުޅު ލައްޕާފައި އޭނާގެ ކޮޓަރިކޮޅުގަ އެވެ. ހިތަދު އަށް ދިޔަ މީހުންގެ ތެރޭގައި އެންމެ އިސްކޮށް ތިބި މީހުން އެދުނީ ހަމަ އެވަގުތު އަތޮޅުވެރިޔާއާ ބައްދަލު ކުރުމަށެވެ.
މީގެ ތެރޭގައި ހިމެނެނީ މީދޫން ދެ މީހަކާއި މަރަދޫން ދެ މީހަކާއި ހިތަދޫން ދެ މީހުންނެވެ. އިސްކޮށް ތިބި މީހުންގެ ތެރޭގައި ހުރި ހިތަދޫގެ ތިން ވަނަ މީހާ އެއްވެސް މުޢާމަލާތެއްގައި ޢަމަލީ ގޮތުން ބައިވެރި ނުވާ ގޮތަށް ނިންމާފައިވާތީ އަތޮޅުވެރިންނާ ބައްދަލު ކުރަން ޑިމާންޑް ކުރި މީހުންގެ ތެރެއަކު އޭނާ ނުހިމެނެ އެވެ. އޭނާގެ މަސްއޫލިއްޔަތެއް ކަމުގައި ހަމަޖެހިފައި އޮތީ ފެކްޓަރީގެ މުވައްޒަފުންނަށް ލިބެން ޖެހޭ ހައްގު ހޯދުމަށްޓަކައި މުވައްޒަފުން ގުޅިގެން ހިންގާ ހަރަކާތުގައި އިސްކޮށް ތިބި އަނެއް ހަ މީހުންނަށް ދައުލަތުގެ ފަރާތުން އެއްވެސް ކަހަލަ ބަންދެއް ކުރިމަތިވެ ތާށިވާ ފަދަ ގޮތެއް މެދުވެރިވެއްޖެ ހާލަތެއްގައި އެމީހުން ސަލާމަތް ކުރުމަށް މަސައްކަތް ކުރުމެވެ.
ކޮންމެއަކަސް މުވައްޒަފުންގެ މި އެދުމުގެ މަތީން އަތޮޅުވެރިޔާ އަށް މި ވާހަކަ ދެންނެވުމުން ވަރަށް އަވަހަށް އަތޮޅުވެރިޔާ ވަޑައިގެން އެތާ ތިބި މީހުންނާ ބައްދަލު ކުރެއްވުމަށް ފަހު މައްސަލަ އާ ބެހޭ ގޮތުން ސުވާލު ކުރެއްވުމުންއެކަން ހިނގައި ދިޔަ ގޮތް ވަރަށް ތަފްސީލުކޮށް އަތޮޅުވެރިޔާ އަށް ކިޔައި ދިނެވެ.
މިގޮތުން މުވައްޒަފުންގެ ކުށަކާ ނުލައި އެދުވަހު ވަޒީފާއަށް ނުކުމެވޭނެ ފަދައެއް ނެތުމުގެ ސަބަބުން މަސައްކަތަށް ހާޒިރު ނުވެވޭތީ ގެއްލޭ މުސާރައާއި އިތުރުގަޑި އަދި އެޓެންޑެންސް އެލަވަންސް ހޯއްދަވައި ދެއްވުމަށް އެދުނެވެ.
އަދި އެ ފައިސާއަކީ އަތޮޅުގެ އިގްތިސާދަށް ވަންނަ ފައިސާ ކަމަށް ވެފައި ހުރިހާ މުވައްޒަފުންނަށް ނިސްބަތް ކުރާ އިރު އަތޮޅުގެ އިގްތިސާދަށް ވަންނާނެ ފައިސާގެ ތެރެއިން ގެއްލިގެން އެދަނީ ވަރަށް ބޮޑު އެއްޗެއް ކަމަށް ވެސް އަތޮޅުވެރިޔާގެ އަރިހުގައި ދެންނެވި އެވެ.
އެތަނަށް ދިޔަ މުވައްޒަފުން ތިބީ ސައި ވެސް ނުބޮއި ކަން އެނގިވަޑައިގަތުމުން އެ ހުރިހާ މީހުންނަށް ހެނދުނުގެ ސައި އަތޮޅު އޮފީހުގެ ޚަރަދުގައި ހަމަޖައްސަވައި ދެއްވި އެވެ. އަދި ވިދާޅުވި އެވެ. އަހަރެންނަށް ލިބިގެންވާ ބާރުގެ ދަށުން މިހާރު ވެސް ތިޔަ ބައި މީހުން ގަމަށް ފޮނުވައި ދީފާނަމެވެ.
މިހެން ވިދާޅުވެފައި އެކަމަކު ވެސް މަޑުކުރާށޭ ވިދާޅުވެފައި ގޮސް ރޭޑިއޯ ސެޓްހުޅުވާފައި އެޓޯލްސް މިނިސްޓްރީ އާ ވާހަކަ ދެއްކެވި އެވެ. އަދި އޭގެ ފަހުން އެސްޓީއޯގެ މެނޭޖިން ޑައިރެކްޓަރު އާއި އެންއެސްއެސްއަށް ވެސް މިކަމާ ބެހޭ މަޢުލޫމާތު ދެއްވި އެވެ.
މައްސަލައާ ބެހޭ ގޮތުން ފެކްޓަރީގެ މުވައްޒަފުން އެމީހުންގެ އަމިއްލަ ނަމުގައި ނަމުގައި މެސެޖު ތައްޔާރުކޮށް އެޓޯލްސް މިނިސްޓްރީއަށާއި އޭޑީއޭއަށާއި އެސްޓީއޯއަށާއި އެންއެސްއެސް އަދި ރައްޔިތުންގެ މަޖިލީހަށް ފޮނުވި އެވެ. މީގެ ތެރެއިން ހަ މެސެޖު ފޮނުވީ 37.40 ރުފިޔާގެ ރޭޓުންނެވެ. 132.40 ރުފިޔާގެ އެއް މެސެޖް ވެސް ފޮނުވުނެވެ.
މެސެޖު ފޮނުވުމަށް ޚަރަދު ދިން ފަރާތްތަކުގެ ތެރޭގައި އެންމެ ފާހަގަކޮށްލެވެނީ އެއިރުގެ އަތޮޅުވެރިޔާގެ އިސް އެހީތެރިޔާ މަރަދޫފޭދޫ އަލީ ނިޒާރު އެވެ. އޭޑީއޭގެ ޗެއަމަން އާއި ނިޒާރާ ދެމެދު އޮންނަ ގާތްކަމާ ހުރެ މި ވެސް އަރަތެއް ކަމަށް ބުނެ އެއީ މިވެނިހެން އެވެނިހެންވީ ކަމެކޭ ކިޔައިގެން ވާހަކަ ދެއްކި މީހުން ވެސް މަދެއް ނޫނެވެ.
ހެނދުނު އަތޮޅު އޮފީހުން ދެއްވި އާދައިގެ ސަޔެއް ބުއިމަށް ފަހު ބައެއް މީހުން ބިންމަތީ އިށީނދެގެން އަނެއްބަ ޔަކު ކޮޅަށް އަދި އަނެއް ބަޔަކު ގޮނޑީގައި ތިއްބާ އެ ދުވަހުގެ މެންދުރު 02:17 ގައި އަތޮޅުވެރިޔާ އެންގެވީ އެންމެން ވެސް ދެން ގަމަށް މަސައްކަތު ދާންވީ ކަމުގަ އެވެ.
މިގޮތަށް އަތޮޅުވެރިޔާ އެންގެވުމުން އެންމެނ ވެސް ސަވާރީތަކަށް އަރައިގެން 10 ވަރަކަށް ކިލޯމީޓަރުގެ ދިގު ދަތުރަކަށް ފަހު ގަމަށް ހިނގައްޖެ އެވެ. މި މީހުންނަށް ގަމަށް ދެވުނު އިރު ގަމުގެ ދޮރާށި އެއިރު ހުރީ ހުޅުވާފަ އެވެ.
މި ހާދިސާ އާ ގުޅިގެން އަތޮޅުގެ ރައްޔިތުންނަށް ސަރުކާރުގެ ބޮޑުންގެ ކޯފާގެ ހިޔަނިއެޅި ވަރަށް ބޮޑު ގެއްލުން ތަކެއް ލިބިދާނެ ކަމުގެ ހީކުރުންތައް ހީކުރެވެން ފެށި އެވެ.
އަދި އެ ދުވަހު އަތޮޅުގެ ރައްޔިތުންނަށް ލިބެން ޖެހޭ އެތައް ފައިސާއެއް ނުލިބި ހިނގައި ދާނޭތީ ކަންބޮޑުވުން އިންތިހާ އަށް ގޮސްފައިވެ އެވެ.
މުވައްޒަފުން އެންމެ ފުރަތަމަ ވެސް ދިޔައީ ފެކްޓަރީގެ އޮފީހަށެވެ. ފެކްޓަރީގެ އޮފީހުގައި ތިބެގެން ޝަކުވާތައް ކުރަން ފެށި އެވެ. ތިމަންމެންނަށް މިލިބުނު ގެއްލުމުގެ ފައިސާ ލިބޭނެ ގޮތެއް ހަމަޖައްސައިދޭށޭ، ކަމާ ބެ ފަރާތަށް ސިޓީ ލިޔެދޭށޭ، މިފަދަ އެތައް އެދުމެއް ހުށައެޅި އެވެ.
އެ މީހުންގެ އެދުމުގެ މަތީން ރައީސުލްޖުމްހޫރިއްޔާ އަށް ސިޓީތައް ލިޔަން ފެށުނެވެ. މި ސިޓީތަކުގައި އޭޑީއޭ އިން މިކުރިމަތި ކުރުވި ބޮޑު ގެއްލުމުގެ ޒިންމާ އޭޑީއޭ އިން އުފުލަން ޖެހޭނެ ކަމަށާއި މި ލިބުނު މާލީ ގެއްލުމުގެ ބަދަލު ވެސް އޭޑީއޭއިން ދޭން ޖެހޭނެ ކަމަށް އެމީހުން ޤަބޫލު ކުރާތީ ސަރުކާރުން މިކަމުގައި މުވައްޒަފުންނަށް އެހީތެރިވުމަށް އެދިފައިވެ އެވެ.
ފެކްޓަރީގެ މުވައްޒަފުން ފޮނުވި ސިޓީގެ ޖަވާބާއިގެން ހަތަރު ވަރަކަށް ދުވަހުގެ ތެރޭގައި މާލެއިން ޓީމެއް ގަމަށް އަ އެވެ. އަދި މީގެ އިތުރުން ރައީސް އޮފީހުން ވަރަށް އަވަހަށް މައްސަލަ ބެލުމަށްޓަކައި އިސް ވެރިއެއްގެ ގޮތުގައި މުޙައްމަދު ޝާހިދު ހަލީމު ގަމަށް ފޮނުވި އެވެ.
އަނެއްކޮޅުން ސިފައިންގެ ހަ ބޭކަލުންގެ ޓީމެއް ވެސް ގަމަށް އަތުވެއްޖެ އެވެ. މި ބޭކަލުންގެ ދައުރަކީ މަސްލަޙަތު ގެއްލިގެން ހިނގައްޖެ ނަމަ އެކަން މައިތިރި ކުރުމެވެ.
މިކަމާ ގުޅިގެން އެންމެ ފަހުން ކުށްވެރިވީ މި ސިޓީ ލިޔެ ދިން މީހުންނެވެ. އެއް ސިޓީއެއް ފޮޓޯކޮޕީ ކުރުމަށް ފަހު އެ ސިޓީތަކުގައި އެކި މީހުން ސޮއިކޮށްފައި ވާތީ އެއީ މަދު ބަޔަކު ވަކި ކަމެއް ހާސިލު ކުރަން ކުރުވި ކަމެއް ކަމަށް ތުހުމަތު ކުރީ އެވެ.
ހަގީގަތަކީ އައްޑު އަތޮޅުގެ ބަހުރުވައަކީ މާލޭ ބަހުރުވަ އާ ތަފާތު ބަހުރުވައަކަށް ވެފައި ލިޔެކިޔުމުގައި ބޭނުން ކުރަނީ މާލޭ ބަހުރުވަ ކަމަށް ވާތީ އަމުދުން މާލެއަށް ދުވަހަކު ވެސް ނުދާ އައްޑު އަތޮޅު މީހުން އެބަހުރުވައަށް ނުފަރިތަވެފައި އެންމެންނަކީ ސިޓީ ލިޔުމުގެ ގަވައިދުތަކަށް އެހައި އަހުލުވެރި ބަޔަކަށް ނުވުމާއެކު އެއިރުގެ ގިނަ މީހުންގެ އާދައަކީ ސިޓީ ލިޔަން ދަންނަ މީހުން ގާތުގައި ލިޔަން ޖެހޭ ވާހަކަ ބުނެގެން ސިޓީ ޢިބާރާތް ކުރުން ކަމަށްވެފައި އެހުރިހާ މީހުންމެ ސިޓީ ލިޔެ ދިނުމަށް އެދުނު އިރު ދައްކަނީ އެއް ވާހަކަ އެއް ކަމުގައި ވާތީ އެ ގޮތް އެންމެ ރަނގަޅު ކަމުގައި ލިޔެދިން މީހުންނަށް ފެނުނީ އެވެ.
އެހެންވުމާއެކު އެންމެ ސިޓީއެއް ލިޔެ ބޭނުންވާ ބަޔަކަށް އެ ސިޓީގެ ފޮޓޯކޮޕީ ހަދައި ދިނީ އެވެ. ސޮއިކޮށްފައި ފޮނުވީ އެ މީހުން އަމިއްލައަށެވެ.
ކޮންމެ އަކަސް މިކަހަލަ ގޮތަކަށް ތަހުގީގު ނިންމާލުމަށް ފަހު މުޙައްމަދު ޝާހިދު ހަލީމުގެ ޓީމު މާލެއަށް ހިނގައްޖެ އެވެ. މި ޓީމު މާލެ ދިއުމުން އަނެއްކާ ވެސް ތަހުގީގު ޓީމެއް އަ އެވެ. އެޓީމުގެ ވެރިޔަކީ އަބްދުއް ޝަކޫރު އަބްދުﷲ އެވެ. (ނުނިމ
(ނޯޓް: މިއީ މީދޫ.ކޮމްގައި އުނިސާރުގެ ނަމުގައި ލިޔެފައިވާ އާޓިކަލެކެވެ.)