މަސްތުވާތެކެތި ބޭނުންކޮށްގެން ހުންނަ މީހާގެ ވީޑިއޯއާ ފޮޓޯ ސޯޝަލް މީޑިޔާގައި އާއްމު ކުރުމަކީ އެމީހަކު މަސްތުވާތަކެތީގެ ވަބާއިން ސަލާމަތްވެގެން އެނބުރި މުޖުތައުއަށް އަންނަން ހުރަހެއް ކަމަށް މިއަދުގެ ހުކުރު ހުތުބާގައި ބުނެފި އެވެ.
މަސްތުވާތަކެތީގެ ނުރައްކާތެރިކަމާ ބެހޭ ގޮތުން މިއަދު ދިން ހުތުބާގައި މަސްތުވާތަކެތީގައި ޖެހިފައިވާ މީހުން އެކަމުން ސަލާމަތްކުރުމަށް އެންމެންގެ އެއްބާރުލުމާ އެހީތެރިކަން ބޭނުންވާ ކަމަށް ވަނީ ބުނެފައި އެވެ.
"މިވަބާގެ ޝިކާރައަކަށްވެ، މަގުމައްޗާއި އެކި ތަންތަނުން މަސްތުވެފައިވާ މީހުން ފެންނަ
ހިނދު، އެމީހުންގެ ވީޑިއޯ ނަގައި ސޯޝަލްމީޑިއާގައި ޢާއްމު ކުރާ މަންޒަރަކީ ހިތްދަތި
ހިތާމަވެރި މަންޒަރެއް. މިކަމުގެ ސަބަބުން އެޒުވާނުން މުޖުތަމަޢުގެ ކުރިމަތީގައި އިތުރަށް
ލަދުވެތިވާންޖެހި، ހެޔޮ މަގަށް އައުމަށް ހުރަހަކަށް ވެގެން ދޭ. ތިބާ ނުވަތަ ތިބާގެ
ޢާއިލާގެ މީހެއްގެ ފޮޓޯއާއި ވީޑިއޯ އެފަދަ ގޮތަކަށް ޢާއްމު ކުރުމަށް ހަމަގައިމުވެސް ތިބާ
ނުރުހޭނެ." ހުކުރު ހުތުބާގައި ބުންޏެވެ.
މަސްތުވާތަކެތީގެ ވިޔަފާރީ ކުރާ މީހުން އެމީހުންގެ އަނބިދަރިންނަށް ކާން ދެނީ އަލިފާން ކަމަށް ބުނެ މަސްތުވާތަކެތީގެ ވިޔަފާރީކުރާ ފަރާތްތަކުން އެ އަމަލު ހުއްޓާލާ ތައުބާވުމަށް ވެސް މިއަދުގެ ހުކުރު ހުތުބާގައި ވަނީ ގޮވާލާއިފައެވެ.
މަސްތުވާތަކެތީގެ ނުރައްކާތެރިކަމާ ބެހޭ ގޮތުން މިއަދު ދިން ހުތުބާގައި މަސްތުވާތަކެތީގެ ވިޔަފާރީކުރާ މީހުންގެ ނުބައިކަމުގެ މައްޗަށް އަލިއަޅުވާލާފައިވެ އެވެ. މި ގޮތުން މަސްތުވާތަކެތީގެ ވިޔަފާރިކުރާ މީހުންނަކީ ފައިސާގެ ދަހިވެތިކަމުގައި، ޖީލުތައް ބަރުބާދުކުރަމުންދާ އަދި އެތައް ސަތޭކަ މައިންގެ ލޯތައް ލޭގެ ކަރުނައިގެ ކޯރުތަކުން ފުރާލާ ރަޙުމުކުޑަ ބައެއް ކަމަށް ސިފަކޮށްފައިވެ އެވެ. މިއަދު އެމީހުނަށް ޙަޔާތުގައި ވަގުތީ އުފާވެރިކަމެއް ފެނުނު ކަމުގައި ވިޔަސް، ﷲ އަށް ތައުބާ ނުވެ ހުރެ މަރުވެއްޖެ ނަމަ، ކުރިމަތިވާނެ ކަންތައްތަކާ މެދު ފުންކޮށް ވިސްނުމަށް ހުތުބާގައި ވަނީ ނަސޭހަތްތެރިވެފައި އެވެ
" އޭ މަސްތުވާތަކެތި ވިޔަފާރިކުރާ މީހުންނޭ! ތިބާގެ މުޅި ޙަޔާތް ތިޔަ ބިނާ ކުރަނީ ޙަރާމް ވިޔަފާރިއެއްގެ މައްޗަށް. މަސްތުވާތަކެތީގެ ވިޔަފާރިން ލިބޭ ފައިސާއަކީ ކަނޑައެޅިގެން ޙަރާމްވެގެންވާ އެއްޗެއް. މިއަދު ތިބާ އެންމެ ލޯބިވާ އަނބިދަރިންނަށް ކާން ތިޔަދެނީ ކަނޑައެޅިގެން އަލިފާން. ޙަރާމް ތަކެތި ކައިގެން ހަށިގަނޑުގައި ޖަހާ މަހަށް އައުލާވެގެންވަނީ ނަރަކަ ކަމަށް ނަބަވީ އިރުޝާދުތަކުގައި ބަޔާންކުރައްވާފައިވޭ. އޭ ﷲ ގެ އަޅާ. ތިބާގެ ކަންތައް ކަމާބެހޭ ފަރާތްތަކަށް ސިއްރުވީ ކަމުގައި
ވިޔަސް، ﷲ ތިބާގެ ކަންތައްތައް ދެކެ ދެނެވޮޑިގެން ވާކަން ދަނޭ." ހުތުބާގައި ވަނީ ބުނެފައި އެވެ.
މީގެ އިތުރުން މަސްތުވާތަކެތީގެ ވަބާއިން ދަރިން ސަލާމަތްކުރުމަށް ދަރިންނާމެދު އިތުރަށް ސަމާލުވުމަށާއި ކަމާގުޅުންހުރި އިދާރާތަކުން މަސްތުވާތަކެތީގެ މައްސަލަތަކުގައި އަޅަން ޖެހޭ ފިޔަވަޅުތައް އެޅުމަށްވެސް ވަނީ ގޮވާލާފަ އެވެ.
މަސްތުވެގެން މަގުމަތީގަޔާއި އާއްމު ތަންތަނުގައި ބިތްޖެހިފައި ތިބޭ މީހުންގެ ވީޑިއޯތައް ގިނަ ބަޔަކު ސޯޝަލްމީޑިޔާގައި އާއްމުކުރެ އެވެ.