ބޮލީވުޑްގެ ކުރީގެ ބަތަލާއެއް ކަމަށްވާ ސުޗިތުރާ ސެން ހޮސްޕިޓަލުގެ އެޑްމިޓްކޮށް އައިސީޔޫގައި ފަރުވާ ދެމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ރިޕޯޓްތައް ބުނާ އުމުރުން 82 އަހަރުގެ ސުޗިތުރާގެ މޭގައި އިންފެކްޝަނެއް އުފެދި ނޭވާލާން އުނދަގޫވެގެން އޭނާ ހޮސްޕިޓަލްގައި އެޑްމިޓް ކުރީ މި މަހުގެ 23 ވަނަ ދުވަހު އެވެ.
އެހެން ނަމަވެސް އިއްޔެ ވަރަށް ބޮޑަށް އޭނާގެ ހާލު ދެރަވާން ފެށުނުން އައިސީޔޫ އަށް ބަދަލުކޮށް، މިހާރު އަންނަނީ ފަރުވާ ދެމުންނެވެ. އެކަމަކު އަދިވެސް އޭނާގެ ހާލު ވަރަށް ސީރިއަސް ކަމަށް ހޮސްޕިޓަލްގެ އޮފިޝަލުންނާ ހަވާލާދީ މީޑިއާތަކުން ބުނެ އެވެ.
އެގޮތުން ހޮސްޕިޓަލްގެ ފަސް ޑޮކްޓަރުން ހިމެނޭ ޓީމަކުން ސުޗިތުރާގެ ހާލަތު އަންނަނީ ވަރަށް ކައިރިން މޮނިޓަ ކުރަމުންނެވެ.
ރިޕޯޓްތައް ބުނާ ގޮތުން ވަރަށް އެކަހެރި ދިރިއުޅުމެއް ވޭތި ކުރަމުން ދިޔަ ސުޗިތުރާއަކީ ހަކުރު ބަލި ވެސް ވަރަށް ބޮޑަށް ހުންނަ މީހެކެވެ.
ސުޗިތުރާއަކީ ފިލްމް "މަމްތާ" އިން 1966 ވަނަ އަހަރު އެންމެ މޮޅު ބަތަލާގެ ފިލްމް ފެއާ އެވޯޑް ވެސް ހާސިލްކޮށްފައިވާ ތަރިއެކެވެ. އޭނާގެ ފިލްމީ ކެރިއަރު ކުރިއަށް ދިޔައީ 1953-1979 އާ ހަމައަށެވެ.
އޭނާގެ ފާހަގަކޮށްލެވޭ އިތުރު ފިލްމްތަކުގެ ތެރޭގައި "ދީޕް ޖުވޭލޭ ޖާއީ"، "އުއްތަރު ފަލަގްނީ" އަދި "އާންދީ" ފަދަ ފިލްމްތައް ހިމެނެ އެވެ.
ސުޗިތުރާފެ ފިލްމީ ކެރިއަރުގައި އޭނާ ގިނައިން ކުޅެފައި ވަނީ ބެންގާލީ ފިލްމްތަކެވެ.