ކޮވިޑް-19އާ ގުޅިގެން ހުޅުދޫ އާއި މީދޫގައި އަޅާފައިވާ ފިޔަވަޅުތައް ނެގުމަށް އެ ދެއަވަށުގެ ސިއްހީ މަރުކަޒުގެ މެނޭޖަރު އިބްރާހީމް ދީދީ ގޮވާލައިފިއެވެ.
އިބްރާހިމް ދީދީ (އިބުރޭ) ކުރި ފޭސްބުކް ޕޯސްޓެއްގައިވާ ގޮތުން ހުޅުދޫ އަދި މީދޫ އަވަށުން ކޭސްއެއް ނުފެންނަތާ މިހާރު ވަނީ އެތައް ދުވަހެއް ވެފައެވެ. އެގޮތުން ސެޕްޓެމްބަރުމަހުގެ 6 ވަނަ ދުވަހުން ފެށިގެން ކޮވިޑުގެ އެއްވެސް ކޭހެއް އެ ދެ އަވަށުން ފެނިފައިނުވާއިރު، 6 ސެޕްޓެމްބަރުގައި ފެނުނު ކޭހަކީވެސް ހޯމް ކަރަންޓީނުގައި ހުރި މީހަކާ ގުޅުންހުރި ކޭހެއްކަމަށް އިބުރޭ ވަނީ ވިދާޅުވެފައެވެ.
މީގެއިތުރުން އެ ދެ އަވަށުގައި މިވަގުތު އޮތީ އެންމެ 18 އެކްޓިވް ކޭސްކަމަށާއި، އައްޑޫ ސިޓީ ކައުންސިލުން އަޅާފައިވާ ފިޔަވަޅުތައް ނަގައިލުމަށް އޭނާ ވަނީ ގޮވާލައިފައެވެ.
އައްޑޫ ސިޓީގެ ގުޅިފައިވާ ރަށްތަކުގެ މޮނިޓަރިން އިތުރު އެއް ހަފްތާއަށް ދިގުދަންމައިލުމަށް އިއްޔެވަނީ ނިންމާފައެވެ.