މަނީލޯންޑަރިންގެ ކުށުގައި ކުރީގެ ރައީސް އަބްދުﷲ ޔާމިނަށް ކޮށްފައިވާ ހުކުމުގައި ޖަލު ހުކުމުގެ އިތުރުން ޖޫރިމަނާގެ އަދަދު ކަނޑައަޅާފައިވަނީ އެކަށީގެންވާ ވަރަށް ވުރެ ބޮޑު އަދަބެއް ކަމަށް އެމަނިކުފާނުގެ ދިފާއީ ވަކީލުން ސުޕްރީމް ކޯޓުގައި ވިދާޅުވެއްޖެ އެވެ.
މަނީލޯންޑަރިންގެ ކުށުގައި ފަސް މިލިއަން ޑޮލަރުން ޖޫރިމަނާކޮށް ފަސް އަހަރަށް ޖަލަށް ލުމަށް ކްރިމިނަލް ކޯޓުން ކޮށްފައިވާ ހުކުމަށް ހައިކޯޓުން ތާއިދުކޮށްފައިވާތީ ހައިކޯޓަށް ހުށައަޅާފައިވާ މައްސަލަގައި މިއަދުވެސް އޮތީ އިސްތިއުނާފީ ނުކުތާތައް ހުށައެޅުމެވެ.
އެންމެ ފަހުގެ އިސްތިއުނާފީ ނުކުތާތަކާ ގުޅޭ ގޮތުން ވާހަކަ ދައްކަވަމުން ރައީސް ޔާމިންގެގެ ދިފާއީ ވަކީލުންގެ ޓީމުގައި ހިމެނިވަޑައިގަންނަވާ އަލީ ޝާހް ވިދާޅުވީ ޖަލު ހުކުމުގެ އިތުރުން ޖޫރިމަނާގެ ފައިސާގެ އަދަދު ކަނޑައެޅުމުގައި ބޮޑެތި ގޯސްތަކެއް ހަދާފައިވާކަމަށެވެ. އެކަންކަމާ ގުޅޭ ގޮތުން ހައިކޯޓުގައި ރައީސް ޔާމިންގެ ފަރާތްޕުޅުން ގިނަ ވާހަކަތަކެއް ދެއްކި ނަމަވެސް އެކަން ކަމަށް ރިއާއަތްކުރައްވާފައިނުވާ ކަަމަށްވެސް އޭނާ ވިދާޅުވި އެވެ.
ޝާހް ވިދާޅުވީ ރައީސް ޔާމިނަށް އަދަބު ކަނޑައެޅުމުގައި ޖޫރިމަނާގެ އަދަދު ކަނޑައަޅާފައިވަނީ ފުރަތަމަ ފަހަރަށް މީހެއްގެ މައްޗަށް ކުށެއް ސާބިތުވުމުން އަދަބު ކަނޑައަޅަމުން އައި ގޮތާ ހިލާފަށް ކަމަށެވެ. އެގޮތުން ފުރަތަމަ ފަަހަރަށް ކުށް ސާބިތުވުމުން ޖަލު ހުކުމުގެ މިންވަރު ކަނޑައަޅާފައިވަނީ އަސާސީ މިންގަނޑުން ކަމަށް ވިއަސް ޖޫރިމަނާ ކޮށްފައިވަނީ އަސާސީ މިންގަނޑަށްވުރެ ފަސް ގުނަ ބޮޑުކޮން ކަމަށް ޝާހް ވިދާޅުވި އެވެ.
"ޖަލު ހުކުމުގައި ހޭދަކުރަން ޖެހޭ އަދަދު އަދަބު ކަނޑައެޅުމުގެ އަސާސީ މިންގަނޑާއެއްގޮތައް ގެންދިއުމަށްފަހުގައި އެ އަދަބުގެ އަނެއް ބައި، އެއީ ޖޫރިމަނާގެ ބައި، އެ އަދަދު ފަސް ގުނައަށް ބޮޑުކުރަން ޖެހުނު ގާނޫނީ ހަމައެއް ކްރިމިނަލް ކޯޓުން މި މައްސަލަ ބެއްލެވި އެއްވެސް ފަނޑިޔާރަކަށް ވިދާޅެއް ނުވެވޭ. އަދި އެ ނިންމެވި ނިންމެވުން ރަނގަޅުކަމަށް ވިދާޅުވި ހައިިކޯޓުގެ ފަނޑިޔާރުން ވިދާޅުވެފައި އޮތީ ވަރަށް އާދައިގެ ވާހަކައެއް." ޝާހް ވިދާޅުވި އެވެ.
ޝާހް ވިދާޅުވީ ޖޫރިމަނާ ފައިސާ ފަސް މިލިއަނުން ކަނޑައެޅީ އެއީ އޭރު ރައީސުލް ޖުމްހޫރިއްޔާގެ މަގާމުގައި އެވަގުތު ހުންނެވި ބޭފުޅާ ކަމަށް ވިދާޅުވުމަކީ އެއްވެސް ގާނޫނީ ހުއްޖަތެއް ނޫން ކަމަށެވެ.
ދެން ރައީސް ޔާމިންގެ ފަރާތްޕުޅުން އެމަނިކުފާނުގެ ވަކީލުން ފާހަގަ ކުރެއްވީ ރާއްޖޭގެ ރަސްމީ ފައިސާއަކީ ދިވެހި ރުފިޔާ ކަމަށް އޮއްވާ ޑޮލަރުން ޖޫރިމަނާކޮށްފައި އޮތުމެވެ. އަދި ރައީސް ޔާމިނަށް ދައުވާކުރި ގާނޫނުގައި ކުށުގެ އަދަބުގެ ގޮތުގައި ދިވެހި ރުފިޔާއިން ޖޫރިމަނާ ކުރަންވާނެ ކަމަށް ކަނޑައަޅާފައި އޮއްވާ އެހެން ފައިސާއަކުން ނުކުރެވޭނެ ކަަމަށް ޝާހް ވިދާޅުވި އެވެ.
"މަސްތުވާތަކެއްޗަކީ ބޭރު މީހުން ހިމެނޭ އަދި ބޭރަށް ފައިސާ ފައިސާ ފޮނުވައިގެން ހިންގޭ މުއާމަލާތަކަށްވާ ހިނދުގައިވެސް އެފަދަ ކުށްތަކުގައިވެސް އަދަބު ކަނޑައެޅިގެން މިދަނީ ދިވެހި ފައިސާއިން. އެއްވެސް ހާލަތެއްގައި އެހެން ފައިސާއަކުން ނޫން،" ޝާހް ވިދާޅުވި އެވެ.
މިއަދުގެ އަޑުއެހުމުގައި ރައީސް ޔާމިންގެ ފަރާތްޕުޅުން ހުށައަޅާ ހުރިހާ އިސްތިއުނާފު ނުކުތާއެއް ހުށައަޅާ ވަނީ ނިމިފައި އެވެ. އެހެންވެ ދެން އޮންނާނީ ރައީސް ޔާމިންގެ ފަރާތްޕުޅުން ދެއްކި ވާހަކަތަކަށް ދައުވާ ލިބޭ ފަރާތުގެ ގޮތުން ޕްރޮސެކިއުޓާ ޖެނަރަލް އޮފީހުން ރައްދު ދެއްވުމެވެ.