ގިނަ ގަޑިއިރު ކޯޓުގައި އިންނަވަން ޖެހޭތީ އުނަގަނޑަށް ތަދުވާކަމަށް ރައީސް ޔާމީން ވިދާޅުވުމުން، އެކަމަށް ހައްލެއް ކޯޓުން ގެނެސްފިއެވެ.
ހެނދުނު ތިން ގަޑިއިރު އަދި މެންދުރުފަހު ދެ ގަޑިއިރުގެ އަޑުއެހުމެއް ބާއްވާ ގޮތަށް ސުޕްރިމް ކޯޓުގައި ތާވަލުކޮށްފައި އޮތުމުގެ ސަބަބުން ރައީސް ޔާމީން ވަނީ އެމަނިކުފާނަށް ހުރި އުނދަގޫފުޅުތައް ޝަރީއަތާ ހިއްސާ ކުރައްވާފައި އެވެ. އަދި އެމަނިކުފާނުގެ ސިއްހީ ހާލަތު ބަޔާންކޮށް ބައެއް ލިޔުންތައްވެސް އެމަނިކުފާނު ވަނީ ކޯޓަށް ހުށަހަޅުއްވާފައެވެ.
ފަނޑިޔާރު މަހާޒު އަލީ ޒާހިރު މިއަދުގެ އަޑުއެހުން ފެށުމާއެކު އިއުލާނު ކުރެއްވީ، ޔާމީން އެދިވަޑައިގެންނެވި ގޮތަށް، މެންދުރުފަހު ބާއްވަން ތާވަލު ކުރި އަޑުއެހުންތައް ނުބާއްވާނެ ކަމަށެވެ. ނަމަވެސް މައްސަލަ ދިގުލައިގެން ގޮސް ތަޅުމުން ޖާގަ ނުލިބޭ ހިސާބަށް ހިނގައްޖެނަމަ، މެންދުރުގެ އަޑުއެހުންތައް އަނެއްކާވެސް ބާއްވަން ޖެހިދާނެކަމަށް، ފަނޑިޔާރުންގެ ބެންޗުގެ ރިޔާސަތު ބަލަހައްޓަވާ ފަނޑިޔާރު މަހާޒު އަލީ ޒާހިރު ވަނީ ވިދާޅުވެފައެވެ.
ސުޕްރީމް ކޯޓުގައި ކުރިއަށްދަނީ ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު ޔާމީން ލޯންޑާ ކުރެއްވިކަން ސާބިތުވި މައްސަލައިގެ އިސްތިއުނާފެވެ.