ވެރިކަންކުރަން އެންމެ ގިނަ ބަޔަކު ތާއީދުކުރާ ނިޒާމެއް ބެލުމަށް ވޯޓަކަށް ދާން ގޮވާލާ ޕެޓިޝަން ތައްޔާރުކުރުމުގައި އިސްކޮށް އުޅޭ ފަރާތްތަކުން ރައްޖޭގެ ސިޔާސީ ޕާޓީތަކާ ބައްދަލުކުރަން ފަށަައިފިއެވެ.
ބަރުލަމާނީ ނިޒާމަށް ތާއިދުކުރާ މި ޓީމުގައި އިސްކޮށް އުޅޭ ގާނޫނީ ވަކީލް މުހައްމަދު ނިޝާން އިބްރާހިމް އައްޑޫލައިވްއަށް ބުނީ ސިޔާސީ ޕާޓީތަކާ ބައްދަލުކުރަނީ އެ ޕާޓީތަކުގެ އެއްބާރުލުން ދިނުމަށް އެދުމަށެވެ. އެ ޓީމުން އެންމެ ފުރަތަމަ ބައްދަލުކުރީ ކުރީގެ ޑިފެންސް މިނިސްޓަރު މުހައްމަދު ނާޒިމް އިސްކޮށް ހުންނަވައިގެން އުފައްދާ އެމްއެންޕީގެ އިސް ފަރާތްތަކާ އެވެ.
މިއަދު ބޭއްވި އެ ބައްދަލުކުރުމާ ގުޅޭ ގޮތުން ނިޝާން ބުނީ އެމްއެންޕީ ޕާޓީއެއްގެ ގޮތުގައި ރަޖިސްޓްރީވެ ޕާޓީގެ ކައުންސިލް އައުމުން ކައުންސިލަށް އެކަން ހުށަައަޅައިގެން ގޮތެއް ނިންމާނެ ކަމަށް ޕާޓީ އުފެއްދުމުގައި އިސްކޮށް އުޅޭ ފަރާތްތަކުން ބުނި ކަމަށެވެ.
#barulamaanee Campin team in miadhu vanee @MNP_Secretariat aa varah kaamiyyabu badhal vumeh beyvifaa. Mi Campin gai #MNP ge e'baarulhun ves libeyne kamah umeedh kuran pic.twitter.com/u3jUlaNRVW
— Mohamed Nishan Ibrahim (@MohNishan) September 20, 2021
ނިޝާން ބުނީ އެހެން ސިޔާސީ ޕާޓީތަކާ ބައްދަލުކުރަންވެސް އެދިފައިވާނެ ކަމަށާއި އެ ޕާޓީތަކުން ފުރުސަތު ދިން ވަރަކުން ބައްދަލު ކުރަމުންދާނެ ކަމަށެވެ. ބަރުލަމާނީއަށް ތާއިދުކޮށް ހަދަމުންދާ ޕެޓިޝަނުގައި މިހާތަނަށް 50000 އަށްވުރެ ގިނަ މީހުން ސޮއިކޮށްފައިވާ ކަަމަށް ނިޝާން ކުރިން ބުނެފައިވެ އެވެ.
"އަދިވެސް ގިނަ ބަޔަކު އެބަ ދޭ ސޮއިކުރަމުން. ވަރަށް ބާރަށް އެކަންތައް ކުރިއަށްދަނީ،" ނިޝާން ބުންޏެވެ.
ނިޝާން ބުނި ގޮތުގައި ޕެޓިޝަނަށް ސޮއި ހޯދުމަށް އަތޮޅު ތެރެއަށް އައުމަށްވެސް ގިނަ އަދަދެއްގެ ބަޔަކު ރަށްރަށުން ދަނީ އެދެމުންނެވެ. އެހެންވެ ވަރަށް އަވަހަށް އަތޮޅު ތެރެއަށް އެ ޓީމުން ދަތުރުފަށާނެ ކަމަށް އޭނާ ބުންޏެވެ.