ޗެކްރިޕަބްލިކްގެ ޕްރާގުން ސ. ގަމަށް ބާއްވާ ޗާޓަރު ދަތުރުތަކުގެ ފުރަތަމަ ފްލައިޓް މިއަދު ހަވީރު 71 ޓޫރިސްޓުންނާ އެކު ބާއްވައިފި އެވެ.
އެ ދަތުރުގައި އައި ޓޫރިސްޓުންނަށް ގަން އެއާޕޯޓުން ޓްރާންސްޕޯޓް މިނިސްޓަރު އަމީން އިބްރާހީމާއި، މޭޔަރު އަބްދުﷲ ސޯދިގް (ސޯބެ) އާއި ދަތުރުތައް ކުރިއަށް ގެންދާ ސްޕްލެންޑެޑް އޭޝިއާގެ އިސްވެރިން ވަނީ ހޫނު މަރުހަބާއެއް ކިޔައިފަ އެވެ.
އެގޮތުން އެއާޕޯޓްގައި ވަނީ ޓޫރިސްޓުންނަށް މާބޮޑި ހަދިޔާކޮށް، ސަގާފީ އައިޓަމްތަކުން މަރުހަބާ ކިޔައިފަ އެވެ.
މި ދަތުރުތައް އިފުތިތާހު ކުރުމަށް ފަހު ގަން އެއާޕޯޓްގެ ވީއައިޕީ ލައުންޖްގއި ބޭއްވި ޕްރެސް ބްރީފިންއެެއްގައި މިނިސްޓަރު ވިދާޅުވީ ސްޕްލެންޑް އިން މިފަދަ ކަމެއް އިސް ނައިިގެން ކުރުމަކީ އައްޑޫގެ ޓޫރިޒަމަށް ލިބޭނެ ވަރަށް ބޮޑު ކުރިއެރުމެއް ކަމަށެވެ. އެހެންވެ އެ ފަރާތަށް މިނިސްޓަރު ވަނީ ވަރަށް ބޮޑަށް ޝުކުރު އަދާ ކުރައްވައިފަ އެވެ.
މި ދަތުރުތައް އިންތިޒާމް ކުރަނީ އައްޑޫގެ މަޝްހޫރު ވިޔަފާވެރިވެރިއެއް ކަމަށްވާ ހެޕީ މާކެޓްގެ ވެރިޔާ މުހައްމަދު ނައީމުގެ ސްޕްލެންޑިޑް އާއި ޗެކްރިޕަބްލިކްގެ އެގްޒިމް ޓުއާ ގުޅިގެންނެވެ.
މިނިސްޓަރު ވިދާޅުވީ އީސްޓަން ޔޫރަޕުން ގަމަށް ޗާޓަރު ދަތުރުތަކެއް ފެށުމަކީ، ގިނަ އަދަދެއްގެ ޓޫރިސްޓުން އައްޑު އަށް އަންނާނެ ކަމެއް ކަމަށެވެ.
އެހެންވެ މިހާރު އައްޑޫގައި ހުރި އެނދުތަކުގެ އިތުރަށް އެނދު ކެޕޭސިޓީ އިތުރު ކުރަން މަސައްކަތްތަކެއް ކުރަން ޖެހޭކަން ފާހަގަ ކުރެއްވި އެވެ. އެގޮތުން އައްޑޫގައި ޓޫރިޒަމް ތަރައްގީ ކުރަން ނިންމާފައިވާ އިތުރު ތަންތަނުގައި އެ މަސައްކަތް ފެށުމަށް ޓޫރިޒަމް މިނިސްޓްރީން މަސައްކަތްތަކެއް ކުރަމުންދާކަން ފާހަގަ ކުރެއްވި އެވެ. އަދި މިއާ އެކު ގެސްޓް ހައުސް ވިޔަފާރިއަކީ ވެސް މީގެ ސަބަބުން ކުރިއެރުވިދާނެ ކަމެއް ކަމަށް އަމީން ވިދާޅުވި އެވެ.
ހަމަ މިއާ އެކު ގަން އެއާޕޯޓް ތަރައްގީވުމަކީ ވެސް އައްޑޫގެ އިތުރުން މި ސަރަހައްދުގެ ޓޫރިޒަމަށް މުހިއްމު ކަމެއް ކަމަށް ވިދާޅުވި އެވެ.
މޭޔަރު ވެސް ވިދާޅުވީ ކައުންސިލުން ބޭނުން ވަނީ އައްޑޫގައި ޓޫރިޒަމް އިންޑަސްޓްރީ ފުޅާވާން ކަމަށެވެ. އެގޮތުން ގެސްޓް ހައުސް ވިޔަފާރި ހިންގަން ބޭނުންވާ ފަރާތްތަކަށް، އައްޑޫން ބިން ދެވެން ހުރި ތަންތަނުން ގާނޫނުތަކާ އެއްގޮތަށް ބިން ދޫކޮށް އެކަން ފުޅާ ކުރަން ބޭމުންވާ ކަމަށް ވިދާޅުވި އެވެ.
ސްޕްލެންޑިޑް އޭޝިއާގެ މެނެޖިން ޑިރެކްޓަރު އަބްދުﷲ ނަސީރު ވިދާޅުވީ ޕްރާގުން ގަމަށް ޗާޓަރު ދަތުރުތަކެއްމި ފެށުނީ މިކަމަށް މަސައްކަތް ކުރާތާ އަށް މަސް ދުވަސް ފަހުން ކަމަށެވެ.
އޭނާ ވިދާޅުވީ މިއަދުން ފެށިގެން އަންނަ އަހަރުގެ މެއި 8 އާ ހަމައަށް މި ބާއްވާ މި ދަތުރުތަކުގައި ގަމަށް ޕްރާގުން 15 ފްލައިޓް އަަޅާނެ ކަމަށެވެ.