ރިޔާސީ އިންތިހާބުގެ އޮފިޝަލުންގެ ފައިސާ ލިބުން ލަސްވެގެން ޝަކުވާ ކުރަމުން ދަނިކޮށް، އިއްޔެ ފައިސާ ލިބުނު އިރު، ލިބުނީ ލިބެން ޖެހޭ ވަރަށް ވުރެ މަދުން ކަމަށް ބުނެ ބައެއް އޮފިޝަލުން ކަންބޮޑުވުން ފާޅު ކުރަން ފަށައިފި އެވެ.
"އައްޑޫ ލައިވް" އާ މިއަދު ވާހަކަ ދެއްކި އައްޑޫގައި ހަރަކާތްތެރިވި އޮފިޝަލަކު ބުނީ ފައިސާ ލިބުނީ އިއްޔެ މެންދުރު ފަހު ކަމަށެވެ.
އިލެކްޝަނުން ފައިސާ ކައުންސިލްގެ ބަޖެޓަށް ޖަމާކޮށް ދިނުމުން، ކޮންމެ ރަށެއްގައި ތިބި އޮފިޝަލުންގެ ފައިސާ ޖަމާކޮށްފައި ވަނީ އެ ރަށެއްގައި ހުރި ކައުންސިލްގެ ޑިޕާޓްމަންޓެއްގެ އެކައުންޓަށެވެ.
އެގޮތުން ވަކިވަކިން އޮފިޝަލުންނަށް ފައިސާ ޖަމަކޮށް ދޭނީ ޑިޕާޓްމަންޓްތަކުންނެވެ.
އެހެން ނަމަވެސް ބައެއް އޮފިޝަލުންނަށް ލިބެން ޖެހޭ ފައިސާ އިން 700-900ރ. އާ ދެމެދުގެ އަދަދެއް މަދުވާ ކަމަށް ބައެއް އޮފިޝަލުން ބުންޏެވެ.
"އެހެންވެ މިވީ ގޮތެއް ބަލަން އަޅުގަނޑުމެން މާލޭގައި ހުންނަ އިލެކްޝަންގެ މައި އޮފީހަށް ވެސް ގުޅައިފިން. އެތަނުން ބުނެފައި ވަނީ އައްޑޫގައި ހުރި އިލެކްޝަންގެ ޔުނިޓުން ފޮނުވި ހާޒިރީއަކަަށް ބަލާފައި ކަމަށް ފައިސާ ހަމަޖެެއްސީ،" އޮފިޝަލަކު ބުންޏެވެ. "އެހެންވެ ލިބެން ޖެހޭ ފައިސާ އިން ބައެއް އުނިވާ ކަމަށް ވަންޏާ އެކަމާ ގުޅޭ ތަފުސީލް ހާޒިރީއެއް މިކޮޅުން (އައްޑޫން) އިލެކްޝަނަށް ފޮނުވާފައި ނުވާ ކަމަށް އެތަނުން ބުނެފައި ވަނީ."
އޮފިޝަލުން ބުނީ ރިޔާސީ އިންތިހާބުގައި އެ މީހުން ހަރަކާތްތެރިވި ހުރިހާ ދުވަހަކަށް ފައިސާ ލިބެން ޖެހޭ ކަމަށް ގަބޫލް ކުރާ ކަމަށެވެ. އޭގެ ތެރޭގައި ޓްރޭނިން ސެޝަންތަކަށް ލިބެން ޖެހޭ ފައިސާ އާއި އިންތިހާބު އޮތް ދުވަހު ކުރި ހުރިހާ މަަސައްކަތުގެ ފައިސާ ވެސް ހިމެނެ އެވެ.
އަދި މަސައްކަތް ކުރީ އައްޑޫގައި އިސްކޮށް ތިބި އިލެކްޝަންގެ ވެރިން އެންގި ގޮތަށް ކަމަށްވާތީ، ހާޒިރީ ފަދަ ކަންކަމުގައި މަައްސަލައެއް އުޅޭ ނަމަ އެކަމުގެ ޒިންމާ އޮފިޝަލުން ނަގަން ނުޖެހޭނެ ކަމަށް ކަންބޮޑުވުން ފާޅު ކުރަމުންދާ އޮފިޝަލުން ބުންޏެވެ.
"އައްޑޫ ލައިވް" އަށް ދާދި ފަހުން އިލެކްޝަންގެ އައްޑޫ ޔުނިޓް ހިންގެވުމާ ހަވާލުވެ ހުންނެވި އަހުމަދު މައުސޫމް ވިދާޅުވީ، ރިޔާސީ އިންތިހާބުގެ އޮފިޝަލުންގެ ގޮތުގައި އައްޑޫގައި 300 އަށް ވުރެ ގިނަ މީހުން ހަރަކާތްތެރިވި އިރު ހާޒިރީގެ މައްސަލަތަކެއް ހުރިކަން ފާހަގަ ކުރެވޭ ކަމަށެވެ.
މައުސޫމް މިއަދު ވިދާޅުވީ ބައެއް އޮފިޝަލުންނަށް ފައިސާ މަދުން ލިބުނުކަން ފާހަގަ ކުރެވިފައިވާ ކަމަށެވެ. އަދި އެކަން އެގޮތަށް ދިމާވީ އޮފިޝަލުން ސޮއި ކުރަން ޖެހޭ ތިން ލިއުމެއް އޮތް އިރު، އޭގެ ތެރެއިން ލިއުމެއްގައި ސޮއި ކުރެވިފައި ނެތުމުން ކަމަށް ވިދާޅުވި އެވެ.
"އެ ތިން ލިއުމުގައި ވެސް ބަރާބަރަށް ސޮއިކޮށްފައި ހުރި އޮފިޝަލުންނަށް ބަރާބަރަށް ފައިސާ ލިބުނު. މަދުވި ބައެއް އޮފިޝަލުންނަށް މި ބުނި ކަހަލަ ގޮތެއް ދިމާވެގެން ފައިސާ މަދުން ލިބިފައި ހުރީ،" މައުސޫމް ވިދާޅުވި އެވެ.