ރާއްޖޭގެ ފުރަތަމަ ސްޕެޝަލިސްޓް ހޮސްޕިޓަލް ލ.ގަމުގައި އަޅަން ޑޮކްޓަރުންގެ ޚިޔާލު ތަފާތުވެއްޖެއެވެ.
ލާމަރުކަޒު ކުރުމުގެ ނިޔަތުގައި ކުރިން ހުޅުމާލޭގައި އަޅަން ނިންމި ކެންސަރު ހޮސްޕިޓަލް ލ.ގަމުގައި އެޅުމަށް ސަރުކާރުން ނިންމީ ސިއްހީ ޚިދުމަތްތައް ލާމަރުކަޒުކުރުމުގެ ނިޔަތުގައެވެ. އަދި ލާމު އަތޮޅުގައި މެޑިކަލް ޓުއަރިޒަމް ފުޅާކުރުމުގެ ބޭނުމުގައެވެ.
ލ.ގަމުގައި މިފަދަ ސްޕެޝަލިސްޓް ހޮސްޕިޓަލެއް އެޅުމަށްޓަކައި ޑޮކްޓަރުން ދެބަސްވެވަޑައިގަންނަވަނީ ލާމުގައި ސިއްހީ ޚިދުމަތްތައް ކުރިއަރާފައި ނުވުމެވެ. އަދި އެހެން ޑޮކްޓަރުންގެ ލަފާ ވަގުތުން ހޯދުމަށް ދަތިވުމަކީވެސް މިކަމަށް އޮތް ހުރަހެއްކަމަށް ގިނަ ޑޮކްޓަރުން ޤަބޫލުކުރެއެވެ.
މިކަމާ ގުޅޭގޮތުން ވާހަކަފުޅުދައްކަވަމުން ރާއްޖޭގައި ހުންނެވި ކެންސަރަށް ޚާއްސަ ހަމައެކަނި ދިވެހި ޑޮކްޓަރު، ޑރ.މުހައްމަދު އަމްރު ވިދާޅުވީ، މިފަދަ ހޮސްޕިޓަލަކީ ރާއްޖެއަށް ބޭނުންތެރި ތަނެއްކަމަށާއި، މި ހޮސްޕިޓަލް އެޅުން އެންމެ ބުއްދިވެރިވާނީ މާލޭ ސަރަހައްދުގައި ކަމަށެވެ. މީގެ އިތުރުން ލާމު އަތޮޅަށްވުރެ ގްރޭޓަރ މާލޭ އޭރިއާގައި މިފަދަ ހޮސްޕިޓަލެއް އެޅުން މާ ފީޒިބަލްވާނެކަމަށްވެސް ޑރ.އަމްރު ވިދާޅުވިއެވެ.
ހަމައެހެންމެ، ލާމުގައި މިފަދަ ސްޕެޝަލިސްޓް ހޮސްޕިޓަލެއް އަޅާނަމަ، އައި.ޖީ.އެމް ހޮސްޕިޓަލް ފެންވަރުގެ ތަނެއް އެ ސަރަހައްދުގައި ހުރުން މުހިންމުކަމަށް ޑރ.އަމްރު ވިދާޅުވިއެވެ.
ކޮންމެއަކަސް، މިކަމާ ގުޅޭގޮތުން ސަރުކާރުން ވިދާޅުވީ، އެހެން ޑޮކްޓަރުންގެ ލަފާ އޮންލައިން ޒަރިއްޔާއިންވެސް ހޯދޭނެކަމަށާއި، އެއް ހޮސްޕިޓަލުން އަނެއް ހޮސްޕިޓަލަށް ދަތުރުކޮށް މިހާރުވެސް ޑޮކްޓަރުން ފަރުވާ ދެއްވާކަމަށެވެ. މިއާއެކު، މިފަދަ ނިންމުމެއް ސަރުކާރުން ނިންމަވާއިރު، ހެލްތު މިނިސްޓްރީގެ ސިއްހީ މާހިރުންގެ ލަފާވެސް ހޯއްދަވާފައިވާނެކަމަށް، ރައީސް އޮފީހުގެ ތަރުޖަމާން މަބްރޫކް ވަނީ ވިދާޅުވެފައެވެ. މީގެއިތުރުން، ކެންސަރު ބައްޔަކީ ގިނަ މުއްދަތަކަށް ފަރުވާކުރަން ޖެހޭ ބައްޔަކަށްވުމާއެކު، ގަން ފަދަ ހިތްފަސޭހަ މާހައުލަކީ މުހިންމު އެޑްވާންޓޭޖެއްގެ ގޮތުގައި މަބްރޫކް ވަނީ ފާހަގަކުރައްވާފައެވެ.
ގަމުގައި އަޅާ ކެންސަރު ހޮސްޕިޓަލަކީ އިންޑިއާގެ އެހީއާއެކު އަޅާ ސްޕެޝަލިސްޓް ހޮސްޕިޓަލެކެވެ. ރާއްޖޭގައި ކެންސަރު ބައްޔަށް ފަރުވާ ހޯދަމުން އަންނަ 2000 އަށްވުރެ ގިނަ މީހުން އެބަތިއްބެވެ.