އައްޑޫގެ ގުޅިފައިވާ ރަށްތަކާ ވަކިން އޮންނަ ހުޅުދޫ އަދި މީދޫ އަވަށް މޮނިޓަރިންގައި އޮތުމުން މީދޫގެ ކައުންސިލަރު ނުރުހުން ފާޅުކުރައްވައިފި އެވެ.
އައްޑޫލައިވަށް ދެއްވި ބަސްދީގަތުމެއްގައި މީދޫ އަވަށުގެ ކައުންސިލަރު އާމިނަތު ސާލިހާ ވިދާޅުވީ، އެ ދެއަވަށުގައި އެއްވެސް ކޮމިއުނިޓީ ސްޕްރެޑެއް ނެތި، މޮނިޓަރިންގައި އޮންނާކަށް ނުޖެހޭކަމަށެވެ. އަދި މޭޔަރަށް މިއަދުވެސް މިކަމާ ގުޅިގެން ގުޅުއްވާފައި ވާނެކަމަށާއި، އަވަށުގެ ހާލަތު ބަޔާންކޮށްދެއްވާފައި ވާނެކަމަށް ސާލިހާ ވިދާޅުވިއެވެ.
ކައުންސިލަރު ސާލިހާ ވިދާޅުވީ، ކޮވިޑުގެ ކަންތައްތައް މެނޭޖްކުރަން ހަދާފައި އޮތް ޓާސްކްފޯހުގައި ހުޅުދޫ އަދި މީދޫގެ އެއްވެސް ބައިވެރިވުމެއް ނެތްކަމަށާއި، މޮނިޓަރިންއިން ނެގޭނީ ޓާސްކްފޯހަށް ކަމަށެވެ.
"އައްޑޫގެ ޓާސްކްފޯސްގައި ހުޅުދޫ އަދި މީދޫގެ އެއްވެސް މީހަކު ނެތް. މި ދެ އަވަށުގެ ކައުންސިލަރެއްވެސް އަދި ސިއްހީ ޚިދުމަތްތެރިއެއްވެސް ނެތް" ސާލިހާ ވިދާޅުވިއެވެ.
މިކަމާ ގުޅިގެން ހުޅުދޫ ކައުންސިލަރުގެ ބަހެއް ލިބޭގޮތެއް ވަނީ ނުވެފައެވެ.
ކޮވިޑް-19ގެ ކޭސްތައް ފެނުމުގެ ސަބަބުން އެންމެ ފުރަތަމަ މޮނިޓަރިންއަށް ލީ އައްޑޫގެ ގުޅިފައިވާ ރަށްތަކެވެ. އޭގެފަހުން ހުޅުމީދޫއިން ކޮވިޑުގެ ކޭސްތައް ފެނުމާއެކު އެ ދެ އަވަށްވެސް މޮނިޓަރިންގެ ހާލަތަށް ގެނެވުނެވެ. ހުޅުދޫ އަދި މީދޫ އަވަށުގައި ކޮވިޑް ކޮންޓްރޯލްކުރެވި، މިވަގުތު އޮތީ އެކްޓިވް އެންމެ 2 ކޭސްއެވެ. އަދި ކޮމިއުނިޓީ ސްޕްރެޑެއް ނެތްއިރު، މޮނިޓަރިންގައި ބޭއްވުމުގެ އެއްވެސް ބޭނުމެއް ނެތް ކަމަށް ގިނަ ރައްޔިތުން ބުނެއެވެ.