އައްޑޫ މީދޫ އައުޓްޑޯ ސްޕޯރޓްސް އެރީނާ އިންޑޯ ސްޕޯޓްސް ކޮމްޕްލެކްސް އަކަށް ބަދަލުކުރަން ނިންމަވާފައިވާ ކަމަށް އެއަވަށުގެ ކައުންސިލަރު ވިދާޅުވެއްޖެއެވެ.
"އައްޑޫލައިވް"އާ ވާހަކަ ދައްކަވަމުން މީދޫ އަވަށުގެ ކައުންސިލަރު އާމިނަތު ސާލިހާ ވިދާޅުވީ، މިހާރު އޮތް ސްޕޯޓްސް އެރީނާ ބޭނުންކުރުމުގެ ވިސްނުމެއް ކައުންސިލުން ނުގެންގުޅުއްވާ ކަމަށެވެ. އަދި އެތަނުގައި މަލްޓި ސްޕޯޓްސް އެރީނާއެއް އެޅުމަށް ބަޖެޓުކުރެވިފައިވާކަމަށް ޞާލިހާ ވިދާޅުވިއެވެ.
"މިހާރު އޮތް ސްޕޯރޓްސް އެރީނާ ބޭނުންކުރުމުގެ ވިސްނުމެއް ނެތް ކައުންސިލްގައި. މިއަހަރުގެ ބަޖެޓުގައި ހިމަނައިގެން މިނިސްޓްރީގެ ޖަވާބެއް ލިބުމާއެކު، އިންޑޯ ސްޕޯރޓްސް ކޮމްޕްލެކްސްގެ މަސައްކަތް ފެށޭނެ" ޞާލިޙާ ވިދާޅުވިއެވެ.
މީގެއިތުރުން މި ސްޕޯރޓްސް ކޮމްޕްލެކްސް އެޅުމާއެކު އެތަނުގައި ކުޅިވަރުގެ ހަރަކާތްތައް ކައުންސިލުން އިސްނަގައިގެން ބާއްވާނެކަމަށްވެސް ކައުންސިލަރ ވަނީ ވިދާޅުވެފައެވެ.
މީދޫ ސްޕޯޓްސް އެރީނާ ސަރަހައްދު އޮތީ އާންމުންނަށް ބޭނުންކުރެވޭ ހާލަތެއްގައެއް ނޫނެވެ. އެތަނުގައި ބައެއް ޖަމްޢިއްޔާ ޖަމާޢަތްތަކުން މީގެ ކުރިން ވަނީ ކުޅިވަރުގެ ހަރަކާތްތައް ކުރިއަށް ގެންގޮސްފައެވެ.