ކޮވިޑް-19 އާއި ގުޅިގެން ހުޅުމީދޫގައި އަޅާފައިވާ ފިޔަވަޅުތައް ގަވާއިދާ ޚިލާފުކަމަށް ހުޅުމީދޫ ސިއްހީ މަރުކަޒުގެ މެނޭޖަރު އިބްރާހިމް ދީދީ (އިބުރޭ) ވިދާޅުވެއްޖެއެވެ.
އިބުރޭ މިއަދު ފޭސްބުކްގައި ކުރެއްވި ޕޯސްޓެއްގައި ވިދާޅުވީ މިއަދުން ފެށިގެން ކޮވިޑާއި ގުޅިގެން ހުޅުމީދޫގައި އަޅާފައިވާ ކަރަންޓީނު ފިޔަވަޅަކީ ގަވާއިދާ ހިލާފު ފިޔަވަޅަކަށް ވާތީ އެއަށް އަމަލުނުކުރަން ނިންމާފައިވާ ކަމަށެވެ.
"ހުޅުމީދޫ އަދި މީދޫގައި ކޮވިޑް ޖެހިފައިވާ އެކަކު ވެސް ނެތް. މި ރަށް ކަރަންޓީނު ކޮށްފައި އޮތީ ކީއްވެ؟ އައްޑޫ ސިޓީ ކައުންސިލު ނިދިން ހޭނުލެވިގެންތޯ" އިބުރޭ ވިދާޅުވިއެވެ.
ހުޅުދޫ އަދި މީދޫ އަވަށުގައި ކޮވިޑާއި ގުޅިގެން ޚާއްސަ ފިޔަވަޅުތަކެއް އަޅާފައިވާއިރު، އެ ދެ އަވަށުން ކޮވިޑުގެ އެންމެ ކޭހެއްވެސް ނުފެންނަތާ މިހާރު އެތައް ދުވަހެއް ވަނީ ވެފައެވެ.
އައްޑޫގައި ކޮވިޑްގެ 226 އެކްޓިވް ކޭސް އުޅޭއިރު އިއްޔެ ވެސް އައްޑޫ އިން ވަނީ 18 މީހަކު ބައްޔަށް ޕޮޒިޓިވް ވެފައެވެ. އެ ކޭސްތައް ފެނިފައިވަނީ ހިތަދޫ، މަރަދޫ އަދި ފޭދޫންނެވެ.
ޕޮޒިޓިވް ކޭސްތަކާ ގުޅިގެން އައްޑޫ މޮނީޓަރިން ހާލަތަށް ގެނެސްފައިވާއިރު، ބަލި ފެތުރުން ކޮންޓްރޯލް ކުރުމަށް ރޭގަނޑު 9 އިން ފަތިހު ހަތަރަކަށް އަންނަނީ ކާފިއު ވެސް ހިންގަމުންނެވެ.