މީދޫގައި އިންޑޯ ސްޕޯޓްސް ކޮމްޕްލެކްސް އެއް ގާއިމުކުރުމާ ގުޅޭގޮތުން ކައުންސިލަރާއި އެމް.ޕީގެ ބަސްމަގު ތަފާތުވެއްޖެއެވެ.
މީދޫގައި މިހާރު އޮތް އައުޓްޑޯ ސްޕޯޓްސް އެރީނާ ތަރައްގީކޮށް، އެތަން އިންޑޯ ސްޕޯޓްސް ކޮމްޕްލެކްސް އަކަށް ބަދަލުކުރުމާއި ގުޅޭގޮތުން ކައުންސިލަރު ސާލިހާ ވިދާޅުވީ، އެ މަސައްކަތަށް ބޭނުންވާ ފައިސާ މިއަހަރުގެ ބަޖެޓުގައި ހިމެނިގެން އެކަމަށް މިނިސްޓްރީން ޖަވާބެއް ލިބުނު އެންމެ އަވަހަކަށް ސްޕޯޓްސް ކޮމްޕްލެކްސް އެތަނުގައި އެޅިގެންދާނެކަމަށެވެ.
ކޮންމެއަކަސް މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވީ، މިކަމަކީ 2021 ވަނަ އަހަރުގެ ބަޖެޓުގައި ހިމެނި، އެތަން ހަދާނެ ބަޔަކު ހޯދުމަށް އިއުލާންކުރުމަށް ހަވާލުކުރެވިފައިވާ މަސައްކަތެއް ކަމަށެވެ.
"މީދޫ އިންޑޯ ސްޕޯޓްސް ކޮމްޕްލެކްސް އަކީ 2021 ވަނަ އަހަރުގެ ބަޖެޓުގައި ހިމެނި، ޔޫތު މިނިސްޓްރީން އެތަން ހަދާނެ ބަޔަކު ހޯދުމަށް އިއުލާން ކުރުމަށް ހަވާލުކުރެވިފައިވާ މަސައްކަތެއް. މިކަމަކީ މީދޫ ވަރަށް ގިނަ ރައްޔިތުންގެ އެދުމުގެ މަތިން މިކަމުގައި އިސްވެ އުޅުނު ރައްޔިތުންނާ، މިނިސްޓްރީއާއެކު އަޅުގަނޑު ބައްދަލުވުންތައް ބާއްވައިގެން ނިންމި ޕްރޮޖެކްޓެއް." މެމްބަރު ރޮޒައިނާ ވިދާޅުވިއެވެ.
މީގެއިތުރުން، ޕްރޮޖެކްޓާ ގުޅޭ އިތުރު ތަފްސީލު ބަޔާންކުރައްވަމުން މެމްބަރު ވިދާޅުވީ، މި ޕްރޮޖެކްޓުގެ ފައިނަލް ކުރެހުންވެސް އައްޑޫ ސިޓީ ކައުންސިލާ ހަވާލުކުރެވިފައިވާ ކަމަށެވެ.
"މި ޕްރޮޖެކްޓުގެ ފުރަތަމަ ކުރެހުންވެސް ޕްރޮޖެކްޓް އަވަސްކުރުމުގެ ގޮތުން ނަވާޒް ޝައުގީ ކުރައްސަވާ ދެއްވާފައި އަޅުގަނޑުމެން މިނިސްޓްރީއާ ހަވާލުކުރީ. އަދި އެއަށް ބިނާކޮށް މިނިސްޓްރީން ފައިނަލް ކުރެހުން ހަދާ ކުރެހުންވެސް ވާނީ ކައުންސިލާ ހަވާލުކުރެވިފައި." ރޮޒައިނާ ވިދާޅުވިއެވެ.
ހަމައެހެންމެ، މި ޕްރޮޖެކްޓު އަވަސްކުރުމަށްޓަކައި މިނިސްޓްރީން އިއުލާންކުރުމުގެ ބަދަލުގައި ކައުންސިލުން އިއުލާންކުރަން ހަވާލުކުރީވެސް އެކަމަނާއާއި މަޝްވަރާ ކޮށްފައިކަަން މެމްބަރު ރޮޒައިނާ ވަނީ ފާހަގަކުރައްވާފައެވެ.
"އަޅުގަނޑު ވަރަށް ކަންބޮޑުވެއްޖެ ކައުންސިލަރ ސާލިހާ މިއީ އަންނަ އަހަރު ކުރަން އުޅޭ ކަމެކޭ ވިދާޅުވީމަ. މާނައަކީ ކައުންސިލުން މި އަހަރު މި ޕްރޮޖެކްޓް ބަޔަކާ ހަވާލުކުރަން އިއުލާން ނުކުރާނަމޭތޯ؟ މިނިސްޓްރީން އިއުލާންކުރުމުގެ ބަދަލުގައި މިކަން ކައުންސިލާ އިއުލާންކުރަން ހަވާލުކުރީވެސް އަޅުގަނޑާ މަޝްވަރާ ކޮށްފައި މިކަން އަވަސްކުރަން އެގޮތަށް ކުރިއަށް ގެންދިޔައަސް އަޅުގަނޑަށް އޯކޭ އޭ ބުނީމަ. ކިހިނެއްތޯ މި ވަނީ؟" ރޮޒައިނާ ސުވާލު އުފެއްދިއެވެ.
މެމްބަރު ރޮޒައިނާ މިފަދަ މޭރުމަކުން ވާހަކަފުޅުދެއްކެވި ކަމުގައިވިޔަސް، މި ޕްރޮޖެކްޓަކީ އަންނަ އަހަރު ހިންގަން އުޅޭ ޕްރޮޖެކްޓެއްކަމަށް ކައުންސިލަރ ސާލިހާ ވިދާޅެއްނުވެއެވެ.
އައްޑޫ މީދޫގައި އިންޑޯ ސްޕޯޓްސް ކޮމްޕްލެކްސް އެއް ގާއިމުކުރުމަށްޓަކައި މަސައްކަތްކުރަމުން އަންނައިރު، އެތަނުގައި އާންމުންނަށް ފުޅާ ދާއިރާއެއްގައި ކުޅިވަރުގެ ހަރަކާތްތަކާއިގެން ކުރިއަށް ގެންދެވޭނެއެވެ. އަދި މިއީ އަވަށުގެ ކުޅިވަރަށް ލިބޭނެ އުންމީދީ ކުރިއެރުމެއްކަމަށް ގިނަ ރައްޔިތުން ގަބޫލުކުރެއެވެ.