ކުރީގެ ޑިފެންސް މިނިސްޓަރު މުހައްމަދު ނާޒިމާއި ރައްޔިތުންގެ މަޖިލީހުގެ ބައެއް މެމްބަރުން އިސްވެ އުފައްދާފައިވާ އެމްއެންޕީ އިސް މަގާމުތަކަށް ކުރިމަތިލާން ހުޅުވާލައިިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ އެއް މުވައްސިސް، އަބްދުﷲ ރިޔާޒް ވިދާޅުވީ ޕާޓީ އުފެއްދުމަށް ހުއްދަ ދިންތާ ތިން މަސްދުވަސް ތެރޭގައި ބާއްވަން ޖެހޭ ޖަލްސާ އަންނަ މަހު 8 ގައި ބާއްވަން ނިންމާފައިވާ ކަމަށެވެ. އޭނާ ވިދާޅުވީ ޕާޓީ އުފެއްދުމަށް ބާއްވާ ޖަލްސާއަށް ރާއްޖޭގެ ހުރިހާ ރަށަކުން މެމްބަރުން ތަމްސީލްކުރެވޭނެ ގޮތައް ޖަލްސާ ބޭއްވުމަށް މަސައްކަތްކުރާ ކަމަށެވެ.
ޕާޓީގެ ފުރަތަމަ ޖަލްސާގައި މައިގަނޑު ގޮތެއްގައި އޮންނާނީ ޕާޓީގެ އަސާސީ ގަވައިދު ފާސްކުރުމާއި ޕާޓީގެ އިންޓެރިމް އެގްޒެކެޓިވް ކައުންސިލް އިންތިހާބުކުރުމެވެ. ރިޔާޒް ވިދާޅުވި ގޮތުން އަސާސީ ގަވައިދުގެ ޑްރާފްޓްގައި އޮންނާނީ ޕާޓީގެ އެގްޒެކެޓިވް ކައުންސިލުންގައި 30 މެމްބަރުން ތިބޭ ގޮތަކަށެވެ.
އެމްއެންޕީގެ އެގްޒެކެޓިވް ކައުންސިލުގައި ހިމެނެނީ:
– ރައީސް
– 6 ނާއިބު ރައީސުން (އޭގެ 1 މަޤާމަކީ އަންހެން މެންބަރަކަށް ޚާއްޞަ މަޤާމު)
– އަނުންގެ ވިންގގެ ލީޑަރު
– ޒުވާނުންގެ ވިންގގެ ލީޑަރު
– އިތުރު 21 ކައުންސިލް މެންބަރުން (އޭގެ ތެރެއިން 7 މަޤާމަކީ އަންހެނުންނަށް ޚާއްޞަ މަޤާމު)
ރިޔާޒް ވިދާޅުވީ އެމްއެންޕީ ހިނގާނީ ޑިމޮކްރޮޓިކް ޕާޓީއެއްގެ ގޮތުގައި ކަމަށާއި ވަކި މީހަކަށް ވަކި ގޮތެއް ނޯންނާނެ ކަމަށެވެ. އަދި އެހެންމެ އެ ޕާޓީގެ އަސާސީ ގަވައިދުގައިވެސް ރާއްޖޭގެ އެހެން ސިޔާސީ ޕާޓީއެއްގައި ހިމެނިފައިނުވާ ޑިމޮކްރަޓިކް އުސޫލުތައް ހިމަނާނެ ކަމަށް ރިޔާޒް ވިދާޅުވި އެވެ.
"މި ޕާޓީއަކީ ހުރިހާ ފަންތިއެއްގެ ހުރިހާ ގިންތިއެއްްގެ ހުރިހާ އުމުރުފުރައެއްގެ މީހުނަށްވެސް ފުރުސަތު އޮތް ޕާޓީއެއް. އެންމެނަށް އޮންނާނީ އެއް ސެޓަޕްރޫލް، މި ޕާޓީގައި ވަކި މީހަކު ބުނެގެނެއް ނޫން މަގާމުތައް ލިބޭނީ. މި ޕާޓީގެ ސްޓްރަކްޗަރ އޮންނާނީ މަސައްކަތްކޮށްގެން ހާސިލްކުރެވޭ ގޮތައް. އެމީހެއްގެ ސިޔާސީ ކެެރިއަރ ބިލްޑްކުރަން ބޭނުމިއްޔާ މިއަށްވުރެ ފަހު ސާފުކޮން ފެންނަން އޮތް ޕޮލިޓިކަލް ސްޓަކްޗަރއެއް އަޅުގަނޑު ގަބޫލު ކުރާ ގޮތުގައި އެހެން ސިޔާސީ ޕާޓީއެއްގައި ނޯންނާނެ،"
އެމްއެންޕީއާ ގުޅޭ މުހިންމު ތާރީހްތައް
15 ސެޕެޓެމްބަރު: ޕާޓީ ރަޖިސްޓްރީކޮށްދިނުމަށް އެދި 5000 މެމްބަރުންގެ ފޯމް އިލެކްޝަނަށް ހުށައެޅި
28 ސެޕްޓެމްބަރު: ޕާޓީގެ ފުރަތަމަ ޖަލްސާ ބާއްވަން ހުއްދަ އިލެކްޝަނުން ދިން
28 ސެޕްޓެމްބަރު: ޕާޓީގެ ވަގުތީ މަގާމުތަކަށް ކުރިމަތިލާން ހުޅުވާލި
3 އޮކްޓޯބަރ: ވަގުތީ މަގާމުތަކަށް ކުރިމަތިލުމުގެ މުއްދަތު ހަމަވާނެ
8 އޮކްޓޯބަރު: ޕާޓީގެ ފުރަތަމަ ޖަލްސާ
ރިޔާޒް ވިދާޅުވީ މި އަހަރު ނިމުގެ ކުރިން އެ ޕާޓީއަށް 10000 މެމްބަރުން ހަމަކުރުމުގެ އަޒުމުގައި ކުރާ މަސައްކަތް އިތުރުކުރުމުގެ ގޮތުން ފުރަތަމަ ޖަލްސާއަށްފަހު ލީޑަރޝިޕުން އަތޮޅު ތެރެއަށް ދަތުރުތައްކުރާނެ ކަމަށެވެ.
ޖުޑިޝަރީ އަދިވެސް އިސްލާހެއް ނުވޭ، މަސްދަރުހާމަކުރުމުގެ ބާރު