މަނީ ލޯންޑްރިންގގެ ޢަމަލެއް ހިންގުމުގެ ކުށް ސާބިތުވެ، އެ ކުށުގެ ޢުޤޫބާތެއްގެ ގޮތުން ކުރީގެ ރައީސް، ޢަބްދުﷲ ޔާމީން ގައި ކޮށްޢަބްދުލްޤައްޔޫމް 5 އަހަރު ދުވަހުގެ މުއްދަތަށް ޖަލަށް ލުމާއެކު، ޖޫރިމަނާގެ ގޮތުގައި ދައުލަތަށް ދައްކަން ކަނޑައެޅި 5,000,000 ޔޫއެސް ޑޮލަރު ދައްކާފައިނުވާތީ، ސިވިލް ކޯޓަށް ހުށައެޅި މައްސަލައިގެ އަޑުއެހުން ފަށަން ތާވަލުކޮށްފި އެވެ.
ރައީސް ޔާމިންގެ ކިބައިން ޖޫރިމަނާ ފައިސާ ހޯދަން ސިވިލް ކޯޓަށް ހުށައެޅުވީ ދައުލަތުގެ ބަންޑާރަ ނައިބުގެ އޮފީހުންނެވެ.
މިދިޔަ އޮގަސްޓް 24 ގައި އެ ސިވިލް ކޯޓަށް ހުށައެޅި އެ މައްސަލައިގެ ފުރަތަމަ އަޑުއެހުން އަންނަ މަހުގެ ހަ ވަނަ ދުވަހުގެ 11:20 ގައި ބާއްވަން ތާވަލުކޮށްފއިވާ ކަމަށް ބަންޑާރަ ނައިބުގެ އޮފީހުން މިއަދު ވަނީ ބުނެފައި އެވެ.
ރައީސް ޔާމިންގެ މައްޗަށް ކްރިމިނަލް ކޯޓުން 28 ނޮވެމްބަރު ކޮށްފައިވާ ހުކުމުގައި ވަނީ އެ ދުވަހުން ފެށިގެން ހަ މަސްދުވަސް ތެރޭގައި އިންލެންޑް ރެވެނިއު އޮތޯރިޓީއަށް އެ ފައިސާ ދެއްކުމަށެވެ. ހައިކޯޓުންވެސް ތާއިދުކޮށްފައިވާއިރު އެ ހުކުމަށް އެއް އަހަރަށް ވުރެ ގިނަ ދުވަސްވެފައިވާއިރު އަދިވެސް މިހާތަނަށްވެސް އެ ފައިސާ ދައްކަވާފައިނުވެ އެވެ.
ޖަލު ބަންދުގައި ހުންނަވައިގެން ދައުލަތަށް ދައްކަން ޖެހިވަޑައިގެންފައިވާ ފަސް މިލިއަން ޑޮލަރު ނުހޯއްދެއްވޭނެ ކަމަށް ރައީސް ޔާމިން ވަނީ ހައިކޯޓުގައި ވިދާޅުވެފައި އެވެ. އަދި އެ ހުކުމް ތަންފީޒުކުރަން ފަސްކުރަންވެސް އެމަނިކުފާނު ހުށައެޅުއްވި އެވެ. ނަމަވެސް ހައިކޯޓުން ނިންމީ އެމަނިކުފާނުގެ ހުކުމް ތަންފީޒުކުރުން ފަސްކުރަންޖެހޭ ތަނެއް ނެތް ކަމަށެވެ.