އައްޑޫ ސިޓީގެ ހުރިހާ ރަށްތަކެއް މޮނިޓަރިންގައި ބާއްވައިގެން ހެތްލް ޕްރޮޓެކްޝަން އެޖެންސީގެ އުސޫލުތަކާ އައްޑޫ ސިޓީގެ މޭޔަރާއި އެހެން ކައުންސިލަރުން ހިލާފުވެފައިވާ ކަމަށް ވިދާޅުވެ ހުޅުމީދޫ ހެލްތް ސެންޓަރު ހިންގެވުމާ ހަވާލުވެ ހުންނެވި އިބްރާހިމް ދީދީ ބަހުގެ ހަމަލާތަކެއް ދެއްވައިފި އެވެ.
އިބްރާހިމް ދީދީގެ ނުރުހުން ސޯޝަލް މީޑިޔާގައި ހާމަކުރެއްވީ ބައިނަލްއަޤުވާމީ ފަތުރުވެރިކަމުގެ ދުވަސް ފާހަގަ ކުރުމުގެގޮތުން މޯލްޑިވްސް ވޯޓަރ ސްޕޯޓްސް އެސޯސިއޭޝަނާއި ސިޓީ ކައުންސިލް ގުޅިގެން ކުރިޔަށްގެންދާ، "މޯލްޑިވްސް ޖެޓްސްކީ ޓުއާރ 2021" ނިންމުމުގެ ރަސްމިޔާތުގައި މީދޫގައި މިއަދު ބޭއްވުމުންނެވެ. ހުރިހާ ރައްޔިތުންނަށް ދައުވަތު ދީގެން މިއަދު ކުރިއަށްގެންދިޔަ އެ ހަރަކާތާ ގުޅޭ ގޮތުން އިބްރޭ ވިދާޅުވީ އެ ހަރަކާތްކުރިއަށް ގެންގޮސްފައިވަނީ އެޗްޕީއޭގެ ހުރިހާ އުސޫލުތަކާ ހިލާފަށް ކަަމަށެވެ.
"އައްޑޫ ސިޓީގެ މޭޔަރުވެސް ހިމެނޭ ގޮތައް އެޗްޕީއޭގެ ހުރިހާ އުސޫލުތަކާ ހިލާފަށް ހުޅުމީދޫ އަށް އައިސް ރައްޔިތުން އެއްކޮށްގެން ނާޗަރަންގީ ކުޅުމަކީ ލަދުވެތި ކަމެއް،" އިބްރޭ ވިދާޅުވެފައިވެ އެވެ.
އިބްރޭ ސިފަ ކުރެއްވީ އެއީ ހެލްތް ދާއިރާގައި މަސައްކަތްކުރާ މުވައްޒަފުންނަށް ކުރި ޖެއްސުމެއްގެ ގޮތުގައި އެވެ.
"ހެލްތް ދާއިރާގައި ބުރަކޮށް މަސައްކަތްކުރާ މުވައްޒަފުންނަށް ކުރެވުނު ޖެއްސުމެއް. މިކަން ހަރުކަށި އިބާރާތުން ކުށްވެރިކުރަން،" އިބްރޭ ވިދާޅުވި އެވެ.
އައްޑޫ ސިޓީ ހުޅުދޫ އާއި މީދޫގައި ކޮވިޑްގެ ކޭސްއެއް ނުފެނި ގިނަ ދުވަސްތަކެއް ފާއިތުވެގެން ދިޔައިރުވެސް އެ ދެ އަވަށް މޮނިޓަރިންގައި ބާއްވާފައި އޮތުމުން އިބްރާހިމް ދީދީ އާއި ހުޅުދޫ ދާއިރާގެ ކައުންސިލަރު ހުސެއިން ފައިއްޒުއް ރަހްމާންވެސް ވަނީ ކަންބޮޑުވުން ފާޅުކުރައްވާފައި އެވެ. އަދި އޭނާ ވެސް ވަނީ މިއަދު ކުރިއަށްގެންދިޔަ ހަރަކާތުގައިވެސް ބައިވެރިނުވާން ނިންމައި އެކަން ސޯޝަލް މީޑިޔާގައިވެސް އާއްމުކޮށްފައެވެ.