ހުޅުމާލެ ހިޔާ ފްލެޓްގައި އުޅޭ އަންހެނަކު ކުޑަ ކުއްޖަކު ކޮނޑުގައި ސްކޫލުން ގެންނަ ވީޑިއޯއެއް އާއްމުންގެ ސަމާލުކަމަށް އައިސްފައިވަނިކޮށް އެ މީހާއަށް ލިޓަސް އިން ހިލޭ ސައިކަލެއް ދީފިއެވެ.
ސައިކަލްގެ ވިޔަފާރި ފުޅާކޮށްކުރަމުން އަންނަ ލިޓަސް އޮޓޯމޯބައިލް އިން ވަނީ ދަރިފުޅު ކޮނޑުމަތީ އުފުލާ ވީޑިއޯގައި ފެންނަ އަަންހެން މީހާ ހޯދުމަށް އާއްމުންގެ އެހީތެރިކަމަށްވެސް މީގެ ކުރިން އެދެފަ އެވެ. އަދި އެމީހާ ބައްދަލުކުރުމަށްފަހު ސައިކަލެއް ހަދިޔާ ކޮށްފައިވާކަން ހާމަކޮށްފަ އެވެ.
ވަސީމާ މޫސާ ކިޔާ އެމީހާއަށް ސައިކަލް ހަވާލުކުރާ ފޮޓޯއާއެކު ލިޓަސްއިން ބުނީ ހަދިޔާކުރެވުނު ސައިކަލް ދެ އަހަރުދުވަހު ހިލޭ ސާވިސްކޮށްދިނުމުގެ އިތުރުން ދެ އަހަރު ދުވަހު ދުއްވުމަށް ބޭނުންވާނެ ޕެޓްރޯލް ޚަރަދުވެސް ދޭނެ ކަމަށެވެ.
" އަދިވެސް އެއްފަހަރު މިކަމުގައި ގިނަ ރައްޔިތުންތަކެއްގެ ފަރާތުން ދެއްވި އެއްބާރުލުމަށް ޝުކުރުއަދާކުރަން. ދުޢާއަކީ މި މުޖުތަމަޢުއަކީ ހެޔޮކަންކަން ކުރުމާއި ކުރުވުމަށް ބާރުއަޅާނެ މުޖުތަމަޢުއެއްކަމުގައި އަބަދުމެ ލެހެއްޓެވުން!" ލިޓަސްއިން ފޭސްބޫކް މެދުވެރިކޮށް އާއްމުކުރި ޕޯސްޓްގައިވެ އެވެ.
ގިނަ ބައެއްގެ ސަމާލުކަމަށް އައި ވީޑިއޯގައި ފެންނަ ވަސީމާގެ ދެ ކުދިން ތިބެ އެވެ. އޭނާ ކޮންމެ ދުވަހަކު ހިނގާފައި ނުވަތަ ދަރިފުޅު ކޮނޑަށް ލައިގެން ހުޅުމާލޭ ފޭސް އެކެއްގެ ބަސް ސްޓޮޕަކާ ހަމައަށް ދެ އެވެ. އަދި އަނބުރާ ފްލެޓަށް ވެސް އަންނަނީ ހިނގައިފަ އެވެ.