މޯލްޑިވްސް ނޭޝަނަލް ޕާޓީ(އެމްއެންޕީ)ގެ ވަގުތީ ރައީސްގެ މަގާމަށް ދަނގެތި ދާއިރާގެ ރައްޔިތުންގެ މަޖިލީހުގެ މެމްބަރު މުހައްމަދު ނާޒިމް ކުރިމަތިލައްވައިފި އެވެ.
އަންނަ ހުކުރު ދުވަހު އޮންނަ އެ ޕާޓީގެ ފުރަތަމަ ޖަލްސާގައި ޕާޓީގެ މަގާމުތަކަށް ވަގުތީ މެމްބަރުން އިންތިހާބުކުރާނެ އެވެ. އެ މަގާމުތަކަށް ކުރިމަތިލުމުގެ މުއްދަތު މިއަދުގެ މެންދުރުފަހު 14.00އަށް ހަމަވިއިރު ކުރިމަތިލާން ހުޅުވާލި 30 މަގާމަށް ވެސް މެމްބަރުން ކުރިމަތިލާފައިވެ އެވެ.
އެމްއެންޕީ އުފެއްދުމުގައި އިސްކޮށް އުޅުއްވާ ކުރީގެ ޑިފެންސް މިނިސްޓަރު ނާޒިމް އެކަނި ޕާޓީގެ ރައީސްގެ މަގާމަށް ކުރިމަތިލެއްވިއިރު ޕާޓީގެ ހަ ނައިބު ރައީސްގެ މަގާމަށް ސިޔާސީ ދާއިރާގައި ފާހަގަކޮށްލެވޭ ބޭފުޅުން ކުރިމަތިލައްވާފައިވެ އެވެ. އެގޮތުން ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު އަބްދުﷲ ރިޔާޒާއި ވިލިމާލެ ދާއިރާގެ ރައްޔިތުންގެ މެމްބަރު އަހްމަދު ހުޝާމާއި ކުރީގެ ޖެންޑަރ މިނިސްޓަރު ޝިދާތާ ޝަރީފު ޕާޓީގެ ނައިބު ރައީސް ކަމަށް ވާދަކުރައްވަ އެވެ.
އެމްއެންޕީގެ ނައިބު ރައީސުންގެ މަގާމަށް ކުރިމަތިލައްވާފައިވާ ބޭފުޅުން:-
– ރައީސް- މުހައްމަދު ނާޒިމް
– ޕާޓީގެ ނައިބު ރައީސް(ސައުތު ރީޖަން) – އަހްމަދު ޝަރީފު
– ޕާޓީގެ ނައިބު ރައީސް(ސައުތު ސެންޓްރަލް ރީޖަން) – އަބްދުﷲ ރިޔާޒް
– ޕާޓީގެ ނައިބު ރައީސް(ސެންޓްރަލް ރީޖަން) – އަހްމަދު އުޝާމް
– ޕާޓީގެ ނައިބު ރައީސް(ނޯތް ރީޖަން) – ހުސެއިން އިސްމާއިލް
– ޕާޓީގެ ނައިބު ރައީސް (އަޕަރނޯތް ރީޖަން) – ޝިދާތާ ޝަރީފް
– ޕާޓީގެ ނައިބު ރައީސް (އަޕަރނޯތް ރީޖަން) – މުހައްމަދު ސައީދު
– ޕާޓީގެ ނައިބު ރައީސް (އަޕަރނޯތް ރީޖަން) – އަހްމަދު އަނޫޝް
– ޕާޓީގެ ނައިބު ރައީސް (އަންހެނުންނަށް ހާއްސަ ގޮނޑި) މިރްފަތު އިސްމާއިލް ޝަފީގު
– ޕާޓީގެ ނައިބު ރައީސް (އަންހެނުންނަށް ހާއްސަ ގޮނޑި)- އައިޝަތު ހުސެއިން މަނިކު
ޕާޓީގެ އަންހެނުންގެ ވިންގްގެ ލީޑަރުގެ މަގާމަށް ކުރީގެ ފޮރިން މިނިސްޓަރު ދުންޔާ މައުމޫނު ވަނީ ކުރިމަތިލައްވާފައި އެވެ. އޭނާގެ އިތުރުން ދެ މެންބަރަކު އެ މަގާމަށް ވާދަކުރެ އެވެ. ޕާޓީގެ ޔޫތު ވިންގެ މަގާމަށްވެސް ތިން މީހަކު ވާދަކުރެ އެވެ.
– އަނުންގެ ވިންގގެ ލީޑަރު ކަމަށް ވާދަކުރައްވަނީ:-
– ދުންޔާ މައުމޫނު
– އައިޝަތު އަބްދުﷲ
– އައިޝަތު ހުސެއިން މަނިކު
ޒުވާނުންގެ ވިންގގެ ލީޑަރު ކަމަށް ކުރިމަތިލައްވާފައިވަނީ:-
– އިރުފާން އަބްދުﷲ
– އުމައިރު އަހްމަދު
– މުހައްމަދު އިސާމް އަބްދުﷲ އިބްރާހިމް
މީގެ އިތުރުން އެ ޕާޓީގެ އެކްޒެކެޓިވް ކައުންސިލްގައި ތިއްބަވާ 21 ކައުންސިލް މެންބަރުންގެ ތެރެއިން އަންހެނުންނަށް ހާއްސަކޮށްފައިވާ ހަތް މަގާމަށް 12 އަންހެން މެމްބަރުން ކުރިމަތިލާފައިވެ އެވެ. އަދި އަންހެނުންނާއި ފިރިހެނުންނަށްވެސް ކުރިމަތިލެވޭ ގޮތައް އޮންނަ ކައުންސިލް މެންބަރުކަމުގެ 14 މަގާމަށް 26 މެމްބަރުން ކުރިމަތިލާފައިވެ އެވެ.
I will be standing for office as president of the women’s wing of @MNP_Secretariat interim council. It’s heartening to see the reserved seats for Deputy President for a woman as well as 7 reserved seats for women. It is my hope that our party will promote more women in politics! pic.twitter.com/LoYilgeUhq
— Dunya Maumoon (@dunyamaumoon) October 2, 2021
އެމްއެންޕީން ބުނެފައިވަނީ އެ ޕާޓީގެ މަގުސަދަކީ އަންނަ ރިޔާސީ އިންތިހާބު ކާމިޔާބުކުރުން ކަމަށެވެ. އަދި ކުޑަ ދުވަސްކޮޅެއްގެ ތެރޭގައި 5000އަށްވުރެ ގިނަ މެމްބަރުން ހަމަކޮށްފައިވާ އެ ޕާޓީގެ އަމާޒަކީ މި އަހަރު ނިމުމުގެ ކުރިން 10000 މެމްބަރުން ހަމަކުރުމެވެ.