ފުލުހުންގެ އިސް އޮފިސަރުންތަކެއް ވަކިކުރަން ޕޮލިސް ބޯޑުން ނިންމުމުގައި އެއްވެސް ވަރެއްގެ ބައިވެރިވުމެއްވެސް އަދި ނުފޫޒެއްވެސް ފޯރުވާފައިނުވާނެ ކަމަށް ހޯމް މިނިސްޓަރު އިމްރާން އަބްދުﷲ ރައްޔިތުންގެ މަޖިލީހުގައި މިއަދު ވިދާޅުވެއްޖެ އެވެ.
ހޯމް މިނިސްޓަރު އިމްރާން މިއަދު މަޖިޅީހަށް ހާޒިރުކުރީ ފުލުހުންގެ ތެރެއިން ހަތް އޮފިސަރަކު ވަކި ކުރަން ޕޮލިސް ބޯޑުން ނިންމި ނިންމުމާ ގުޅިގެން ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހްމަދު ޝިޔާމް މިނިސްޓަރާ ސުވާލުކުރަން ހުށައަޅާފައިވާތީ އެވެ.
މިނިސްޓަރު އިމްރާނަށް ޝިޔާމް ކުރެއްވި އެއް ސުވާލަކީ ފުލުހުންގެ އާ ގާނޫނުގެ ދަށުން އެކުލަވާލި ޕޮލިސް ބޯޑުން ހަތް އޮފިސަރުން ވަކިކުރަން ނިންމި ނިންމުމަކީ ގާނޫނީ ހަމަތަކުގެ މަތިން އިންސާފުވެރިކަމާއެކު ނިންމާފައިވާ ނިންމުމެއްކަން ސާފު ކޮށްދެވިދާނެތޯ އެއްސެވި ސުވާލެވެ. އަދި އެ ނިންމުން ނިންމުމުގައި ކިހާވަރެއްގެ ސިޔާސީ ނުފޫޒެއް ފޯރާފައިވޭތޯ ޝިޔާމް ސުވާލު ކުރެއްވި އެވެ.
މިނިސްޓަރު ވިދާޅުވީ ފުލުހުންގެ ގާނޫނުގައިވާ ގޮތުން ޕޮލިސް ބޯޑުން އޮފިސަރުން ވަކިކުރަން ނިންމާ ނިންމުމުގައި މިނިސްޓަރުގެ އެއްވެސް ދައުރެއް ނޯންނާނެ ކަމަށެވެ.
"އެހެން ކަމުން އެ މަސައްކަތް (ފުލުހުން ވަކިކުރަން ނިންމުމުގެ މަސައްކަތް) ހިނގަމުންދިޔައިރުގައި އަޅުގަނޑުގެ އެއްވެސް ދައުރެއް ހިމެނިފައިނުވާކަމަށް ދަންނަވަން. އަދި އެ މަސައްކަތް ނިންމެވުމަށްފަހުގައި އެ މަސައްކަތުގެ ނަތީޖާ އަޅުގަނޑާ ހިއްސާ ކުރައްވާފައިނުވާކަންވެސް ދަންނަވަން. އެ ބޭފުޅުން އެކަން ކުރައްވާފައި އެވަނީ ގާނޫނުގައި މިނިސްޓަރު ދައުރެއް އެކަމުގައި ހިމެނިފައިނުވާތީ،" އިމްރާން ވިދާޅުވި އެވެ.
އެހެން ނަމަވެސް މިނިސްޓަރު ވިދާޅުވީ ގާނޫނުގައިވާ މުއްދަތުގެ ތެރޭގައި ޕޮލިސް ބޯޑުގެ މަސައްކަތް ނުނިމިދާނެތީ އެ ބޯޑުން އެކަން އެންގުމުން އެކަން މުއްދަތުގައި ނިންމުމަށް މަސައްކަތްކުރުމަށް އެންގެވި ކަމަށެވެ. އަދި އެ ނޫން އެއްވެސް މުއާމަލާތެއްވެސް ކުރެވިފައިނުވާނެ ކަމަށާއި އެހެން ކަމުން މިނިސްޓަރުގެ ފަރާތަކުން އެއްވެސް ސިޔާސީ ނުފޫޒެެއް ފޯރާފައިނުވަނެ ކަމަށް ވިދާޅުވި އެވެ.
މިނިސްޓަރު އިމްރާންގެ އެ ޖަވާބަށްފަހު ދެންވެސް ޝިޔާމް ސުވާލު ކުރެއްވީ ޕޮލިސް ބޯޑުން ވަކިކުރަން ނިންމި ހަތް އޮފިސަރުންގެ ތެރޭގައި ހިމެނޭ އެއްވެސް އޮފިސަަރަކު ތިން ދުވަސް ތެރޭގައި އިސްތިއުފާދޭން 29 ނޮވެމްބަރު 2018 ވަނަ ދުވަހު މިނިސްޓަރު އެންގިވިތޯ އެވެ. ނަމަވެސް މިނިސްޓަރ ސުވާލު ސާފުނުވެ ފުރަތަމަ ވިދާޅުވީ ބޯޑުގެ އެއްވެސް މެމްބަރަކު އިސްތިއުފާދޭން ނާންގަވާ ކަމަށެވެ. ދެން ވިދާޅުވީ ތިން އޮފިސަރަކަށް އިންޒާރެއް ނުދެއްވާ ކަމަށެވެ. ނަމަވެސް ޝިޔާމް ވަނީ އޭނާ ކުރި ސުވާލު ސާފުނުވާ ކަމަށް ހައްދަވައިގެން އެ ސުވާލަށް ޖަވާބު ނުދެއްވި ކަމަށް ވިދާޅުވެ ހިތްހަމަނުޖެހުން ފާޅުކުރައްވާފައި އެވެ. އެހެން ނަމަވެސް ޝިޔާމްގެ ސުވާލު ސާފުކޮށްދިނުމަށް އޭނާއަށް އިތުރު ފުރުސަތެއް ރިޔާސަތު ނުދެއްވަ އެވެ.
އެހެން މެމްބަރުންވެސް ވަނީ ޕޮލިސް އޮފިސަރުންގެ އެ ނިންމުމަށް އެއްްވެސް ސިޔާސީ ނުޒޫފެއް ފޯރުވިތޯ ސުވާލު ކުރައްވާފައި އެވެ. އެހެން ނަމަވެސް މިނިސްޓަރު ވަނީ އެކަމުގައި މިނިސްޓަރުގެ ޒިންމާއެއް ނޯންނަކަމަށް ވިދާޅުވެ ޖަވާބު ތަކުރާރުކުރައްވާފައި އެވެ.