އައްޑޫ ސިޓީ ކައުންސިލްގެ ހުޅުމީދޫ ދާއިރާއަށް އެމްޑީޕީގެ ޓިކެޓްގައި ވާދަ ކުރައްވާ އަލީ މުހައްމަދު (އައްދު) ގެ ކެމްޕޭން ރަސްމީކޮށް އިއްފިތާހު ކުރުމުގެ ރަސްމިއްޔާތު ބާއްވައިފި އެވެ.
އޭނާގެ ކެމްޕޭން ރަސްމީކޮށް އިފްތިތާހު ކުރުމަށްޓަކައި މިދިޔަ ބުރާސްފަތި ދުވަހުގެ ރޭ ސ. އަތޮޅު މަދަރުސާގައި ބޭއްވުނު ރަސްމިއްޔާތުގައި ރައްޔިތުންގެ މަޖިލިހުގެ ހުޅުމީދޫ ދާއިރާގެ މެމްބަރު އިލްޔާސް ލަބީބާއި މި އަހަރު ބޭއްވޭ ރައްޔިތުންގެ މަޖިލިހުގެ މީދޫ ދާއިރާ އަށް އެމްޑީޕީގެ ޕްރައިމަރިގައި ވާދަ ކުރައްވާ މީދޫ އަރިވަރު އަލީ ޝަހީމާއި ތުލުސްދޫ ދާއިރާގެ މެމްބަރު ރޮޒައިނާ އާދަމްގެ އިތުރަށް މަރަދޫފޭދޫ މުހައްމަދު ލިރާރު ވެސް ބައިވެރިވެ ވަޑައިގެންފައިވެ އެވެ.
މީގެ އިތުރަށް ރައްޔިތުންގެ މަޖިލިހުގެ ހުޅުދޫ ދާއިރާގެ އެމްޑީޕީގެ ޕްރައިމަރީގައި ވާދަ ކުރައްވާ ސާމީ އާއި ހަޒާޝް ހަމީދު ވެސް ބައިވެރިވެވަޑައިގެންފައިވެ އެވެ.
އެމްޑީޕީގެ ޓިކެޓްގައި އައްޑޫސިޓީ ކައުންސިލްގެ ހުޅުމީދޫ ދާއިރާ އަށް ކުރިމަތިލައްވާ އައްދުއަކީ ހިތަދޫ މެޖިސްޓްރޭޓް ކޯޓުން ބާތިލް ކަމަށް ހުކުމްކޮށްފައިވާ އައްޑޫސިޓީ ކައުންސިލުން އުފެއްދި ހުޅުމީދޫ އަވަށު ބޯޑްގެ ނާއިބް ރައީސްގެ މަގާމް ފުރުއްވަމުން ގެންދަވާ ބޭފުޅެކެވެ.