އެމްޓީޑީސީން އައްޑޫގައި ތަރައްގީކޮށްފައިވާ ހެރަތެރަ ރިސޯޓް ސިންގަޕޫރުގެ ކުންފުންޏަކަށް 33.3 މިލިއަން ޑޮލަރަށް ވިއްކާލަން ނިންމައިފި އެވެ.
އެމްޓީޑީސީގެ އެގްޒެކެޓިވް ޑިރެކްޓަރު އަހުމަދު ނިޔާޒް މިއަދު ވިދާޅުވީ ހެރަތެރަ ވިއްކާލުމަށް ކުރި އިއުލާން މިދިޔަ މަހުގެ 31 ވަނަ ދުވަހު ހަމަވީ އިރު ހަތަރު ފަރާތަކުން އެ ރިސޯޓް ގަންނަން ހުށަހެޅި ކަމަށެވެ.
އޭނާ ވިދާޅުވީ އޭގެ ތެރެއިން އެންމެ ބޮޑު އަގެއް ހުށަހެޅީ ސިންގަޕޫރުގެ ކޭނަރީޒް ޕްރައިވެޓް ލިމިޓެޑުންނެވެ. އެ ކުންފުނިން ހުށަހެޅީ 33.3 މިލިއަން ޑޮލަރު ކަމަށް ވެސް ނިޔާޒް ވިދާޅުވި އެވެ.
އޭނާ ވިދާޅުވީ ދެވަނަ އަށް އެންމެ ބޮޑު އަގެއް ހުށަހެޅީ ވެސް ސިންގަޕޫރުގެ ކުންފުންޏަކުން ކަމަށެވެ. އަދި ތިން ވަނަ އަށް އެންމެ ބޮޑު އަގެއް ހުށަހެޅީ މީގެ ކުރިން އެ ރަށް ވިއްކާލަން ނިންމި މަޝްހޫރު ވިޔަފާރިވެރިޔާ ޗަމްޕާ ހުސެން އަފީފްގެ، ޓްރީޓޮޕް މޯލްޑިވްސް އިން ކަމަށް ނިޔާޒް ވިދާޅުވި އެވެ.
މެލޭޝިޔާގެ އަމިއްލަ ފަރާތަކުން ވެސް އެ ރަށަށް ބިޑް ކުރި ނަމަވެސް އެ ފަރާތުން ބޭންކް ގެރެންޓީ ހުށަހަނާޅާތީ އެ ކުންފުނި ޑިސްކޮލިފައި ކުރި ކަމަށް ވެސް އޭނާ ވިދާޅުވި އެވެ.
ހެރަތެރައިގެ ބިޑްގައި ބައިވެރިވާ ފަރާތްތަކުން އެއް މިލިއަން ޑޮލަރުގެ ބޭންކް ގެރެންޓީއެއް ބަހައްޓަން ޖެހެ އެވެ.
ނިޔާޒް ވިދާޅުވީ އެވޯޑް ލެޓާ ހަވާލު ކުރާތާ 30 ދުވަހުގެ ތެރޭގައި ގަންނަން ހުށަހެޅި އަގު ކޭނަރީޒް އިން އެމްޓީޑީސީ އަށް ދައްކަން ޖެހޭނެ ކަމަށެވެ.
އަދި އެ ކުންފުންޏަށް އެ އަދަދު ނުދެއްކިއްޖެ ނަމަ ބޭންކް ގެރެންޓީ ސަރުކާރަށް ނެގުމަށް ފަހު ދެވަނައަށް އެންމެ ބޮޑު އަގެއް ހުށަހެޅި ކުންފުންޏަށް ހެރަތެރަ ވިއްކާލާނެ ކަމަށް ނިޔާޒް ވިދާޅުވި އެވެ.
ހަތަރު ތަރީގެ 544 އެނދު ހިމެނޭ ހެރަތެރަ ޗަމްޕާ ހުސެން އަފީފްގެ، ޓްރީޓޮޕް މޯލްޑިވްސް އަށް ވިއްކާލަން ކުރީގެ ބޯޑުން ނިންމީ 30 މިލިއަން ޑޮލަރަށެވެ.