ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީ ޓިކެޓްގައި އައްޑޫން 28 މީހަކު ވާދަ ކުރާނެ ކަމަށް އެ ޕާޓީން ބުނެފި އެވެ.
އިންތިހާބަށް ކެމްޕޭން ކުރުމުގެ މަސައްކަތް ވެސް މިހާރު ފަށާފައިވާ އިރު، އައްޑޫން އެމްޑީޕީ ޓިކެޓްގައި އެންމެ ގިނަ ކެންޑިޑޭޓުން ވާދަ ކުރަނީ ފޭދޫ ދާއިރާއިންނެވެ.
އެ ދާއިރާ އިން ޖުމްލަ ނުވަ ކެންޑިޑޭޓަކު ވާދަ ކުރެ އެވެ. ވާދަ ކުރައްވާ ކެންޑިޑޭޓުންނަށް ބަލާ އިރު، އޭގެ ތެރޭގައި އައްޑޫ ސިޓީ ކައުންސިލްގައި ފޭދޫ ދާއިރާ މިހާރު ތަމްސީލް ކުރައްވާ އަހުމަދު މިރުޒާދު (މިރާ) ވެސް ހިމެނެ އެވެ.
ދެން ހިމެނެނީ ފޭދޫ ސިވިލައިޒޭޝަން ހައުސް މުހައްމަދު ނިހާދު، ފޭދޫ ހަނދުވަރީގޭ އައިޝަތު ރަޝީދު، ފޭދޫ ބީޗްވިލާ މުހައްމަދު ސައީދު (މުއްލާ)، އެމްޑީޕީ އައްޑޫ ރައީސް ފޭދޫ ނެސްޕްރޯވިލާ އަހުމަދު އަދުހަމް، ފޭދޫ ޑިއަރެސްޓް އަބްދުﷲ ޝަރީފް، ފޭދޫ ފިނިފެންމާގޭ މުހައްމަދު އަކްރަކް (އަކޫ)، ފޭދޫ ސްވީޓްޕީ އަހުމަދު މުރުތަޟާގެ އިތުރުން ފޭދޫ ދާއިރާގެ މިހާރުގެ މެމްބަރު އަލްހާން ފަހުމީ އެވެ.
ހުޅުދޫ ދާއިރާ އަށް އެމްޑީޕީ ޓިކެޓްގައި ވާދަ ކުރައްވަނީ ތިން ކެންޑިޑޭޓުންނެވެ. އެއީ މިހާރުގެ ވެސް މެމްބަރު އިލްޔާސް ލަބީބާއި ހުޅުދޫ ދެތަނޑިމާގޭ އިބްރާހީމް ހަމީދާއި އެ ރަށު މިނާ ސާމިއު އަންވަރެވެ.
މަރަދޫ ދާއިރާ އަށް ފަސް މެމްބަރުން ވާދަ ކުރައްވަ އެވެ. އެއީ އެ ރަށު ހިކިފިނިފެންމާގޭ އަބްދުއް ސަލާހު ހަސަން އާއި އިބްރާހީމް ޝަރީފް (މަ ވޯޓާ) އާއި މަރަދޫ ފޮނިމާގޭ މުހައްމަދު ޖިނާހާއި ބަހާރުގޭ މުހައްމަދު ރިޔާޒާއި އެ ރަށު މީނާޒް ހަސަން ނާސިރު (ހަން ބައްދާ ހަސަނު) އެވެ.
ހިތަދޫ ދެކުނު ދާއިރާ އަށް އެމްޑީޕީ ޓިކެޓްގައި ތިން ކެންޑިޑޭޓުން ވާދަ ކުރައްވަ އެވެ. އެއީ އެ ރަށު އެމިޓޭޝަންގޭ އަލީ ނިޒާރާއި ދޮނަޅާމާގޭ އަހުމަދު ހަބީބާއި ނައިލޯންގޭ، އަހުމަދު ނިޒާމެވެ.
ހިތަދޫ މެދު ދާއިރާ އަށް އެމްޑީޕީ ޓިކެޓްގައި ކުރިން ތިން ބޭފުޅަކު ވާދަ ކުރަަން ނިންމި ނަމަވެސް މިހާރު ވާދަ ކުރައްވަނީ ދެ ކެންޑިޑޭޓުނެވެ.
އެއީ ހިތަދޫ ލިލީވިލާ އަދި ހިތަދޫ އަވަށު ބޯޑްގެ ރައިސް އިބްރާހީމް ޝިނާޒް މޫސާ (ފަލަކް ޝިނާޒް) އާއި ކުރީގެ ބްރިގޭޑިއާ ޖެނެރަލް އިބްރާހީމްދީދީ އެވެ.
ތިން ވަނަ ކެންޑިޑޭޓް އަދި މިހާރު ހިތަދޫ މެދު ދާއިރާ ތަމްސީލް ކުރައްވާ މުހައްމަދު ރަޝީދު (މެޓްރިކްސް މޯޑް) ދާދި ފަހުން ވަނީ ޕީޕީއެމާ ގުޅިވަޑައިގެންފަ އެވެ.
ހިތަދޫ އުތުރު ދާއިރާ އަށް ވާދަ ކުރައްވާ ދެ ކެންޑިޑޭޓުންނަކީ މިހާރު ވެސް އެ ދާއިރާގެ މެމްބަރު މުހައްމަދު އަސްލަމާއި ފިތުރޯނުގޭ މަސްތޫރު ހުސްނީ އެވެ.
ސ. މީދޫ/މަރަދޫފޭދޫ ދާއިރާ އަށް ކުރިމަތިލައްވާ ހަތަރު ކެންޑިޑޭޓުންނަކީ މީދޫ އަރިވަރު އަލީ ޝަހީމް، ތުލުސްދޫ ދާއިރާގެ މިހާރުގެ މެމްބަރު ރޮޒައިނާ އާދަމް، މަރަދޫފޭދޫ ސަންޝައިން މުހައްމަދު ލިރާރުގެ އިތުރުން އެ ރަށު ސޯސަންވިލާ އަބްދުﷲ މިފުތާހެވެ.
އަންނަ މާޗް މަހު ބާއްވާ ރައްޔިތުންގެ މަޖިލީހުގެ އެމްޑީޕީ ޓިކެޓްގައި ވާދަ ކުރައްވާ ކެންޑިޑޭޓުންގެ ޕްރައިމެރީ މި މަހުގެ 24 ގައި ބާއްވާ ގޮތަށް ވަނީ ހަމަޖެހިފަ އެވެ.