ރާއްޖޭގެ ހުރިހާ ކަންކޮޅުތަކެއްގައި މިއަދު ޓީޗަރުން ދުވަސް ފާހަގަކުރިއިރު އެކި ސިފަ ސިފައިގައި ދިޔައީ ޓީޗަރުންގެ އަގު ވަޒަންކުރުމުގެ ގޮތުން ހަދިޔާ ބަދިޔާ ބަދަލުކޮށްފައިވެ އެވެ. އޭގެ ތެރެއިންވެސް އައްޑޫ ސިޓީ އަންހެނުންގެ ތަރައްްގީއަށް މަސައްކަތްކުރާ ކޮމެޓީން ޓީޗަރުންގެ ދުވަސް ފާހަގަކުރީ މުޅިން ތަފާތު ގޮތަކަށެވެ. އައްޑޫގައި ސަރުކާރުން ހިންގާ 9 ސްކޫލަކަށް އައްޑޫ ޑަބްބިލިއުޑީީސީގެ ފަރާތުން ގެންދިޔައީ ބޮޑެތި މަލާފާތްތަކެކެވެ.
މިއީ އިހުގައި ސަރުކާރާއި ދައުލަތުގެ އިއްޒަތްތެރިންނާއި ޝަރަފުވެރިންނަށް ހާއްސަކޮށް އަރުވާ ވެދުމެކެވެ. އައްޑޫ ސީޓީ ޑަބްލިއުޑީސީގެ ނައިބު ރައީސް ނުއުމާ ވިދާޅުވީ ޓީޗަރުން ދުވަހާ ގުޅިގެން އެ ކޮމެޓީން ބޭނުންވީ ޓީޗަރުންނަށް ކޮންމެވެސް ހަދިޔާ ދޭށެވެ. ނަމަވެސް އާދައިގެ ކޭކެއް ނޫނީ ޕާރްސަލުން ފުއްދާލާކަށް ކޮމެޓީން ބޭނުން ނުވި ކަމަށް ނައުމާ ވިދާޅުވި އެވެ.
"ޓީޗަރުން ކުރައްވާ ބުރަ މަސައްކަތުގެ އަގު އަޅުގަނޑުމެނަކަށް އަދައެއް ނުކުރެވޭނެ. އެހެންވެ އެ މަސައްކަތުގެ އަގު ވަޒަންކުރުމުގެ ގޮތުން ކުރި ކަމެއް މިއީ،" ނުއުމާ ވިދާޅުވި އެވެ.
ބޮނޑިބަތާއި އިހުގައި ތައްޔާރުކޮށް އުޅުނު ފޮނިކާ ތަކެތި ހިމަނައިގެން ހަދާފައިވާ މި މަލާފަތް ޒީނަތްކޮށްފައިވަނީވެސް އިހުގެ މަލާފަތުގެ ހަނދާންތައް އާވާގޮތަށެވެ. އިހުގައި އިއްޒަތްތެރިންނަށް ވެދުކޮށް އުޅުނު މި މަލާފަތް ސްކޫލްތަކަށް ވެދުންކުރި ސަބަބު ވެސް ނައުމާ ކިޔާދިނެވެ.
"ގައުމު ބިނާކުރާ ބަޔަކީ ޓީޗަރުން. ހަގީގަތުގައި ގައުމު ބިނާކުރުމުގެ އެންމެ ވަރުގަދަ ރައުސުލްމާލަކީ ޓީޗަރުން. ޓީޗަރުންނަށް ނުދޭ ގަދަރެއް ދެން ކޮން ބަޔަކަށް ދޭންވީ." އާދައިގެ ހަދިޔާއެއް ދީގެން ޓީޗަރުންގެ ދުވަސް ފާހަގަކުރަން ބޭނުންނުވި ސަބަބާ ގުޅޭ ގޮތުން ނައުމާ ވިދާޅުވި އެވެ.
ޓީޗަރުންނަށް ވެސް މި ހަދިޔާ ވީ ވަރަށް ތަފާތު އިހްސާސްތަކެއް ކުރުވި އެއްޗަަކަށެވެ. އައްޑޫ ލައިވްއާ ވާހަކަ ދެއްކި ބައެއް ޓީޗަރުން ބުނީ އެމީހުންނަށް ފާއިތުވި ދުވަސްތަކުގައި ނުކުރެވޭހާ އުފާ އިހްސާސް މިއަދުވި ކަމަށެވެ. ބައެއް ސްކޫލްތަކަށް މި ވެދުންވީ ތަފާތު ސަޕްރައިޒަކަށެވެ.
"ވަރަށް އުފާވި. ހިތައް އެރި ޓީޗަރުންގެ އަގުވަޒަންވެސް ކުރާ މީހުން އެބަ ތިއްބޭ އެކި ތަންތަނުގައި. ވަރަށް ތަފާތު އިހްސާސެއް ކުރެވުނީ މިއަދު. ވަރަށް އުފާވި. ވަރަށް ސަޕްރައިޒްވެސް ވި،" ސ.އަތޮޅު މަދަރުސާގެ ލީޑިން ޓީޗަރ ތަވީލް އަބްދުލް މުސިހް ބުންޏެވެ.