ބޭނުން ވަނީ އަބަދުވެސް ފެންވަރު ރަނގަޅު މޮޅު އުފެއްދުންތަކުގައި މަސައްކަތް ކުރަން ކަމަށާއި ހަމަ އެކަނި ފައިސާގެ ބޭނުމުގައި އެކަން ގުރުބާން ނުކުރެވޭނެ ކަމަށް ބޮލީވުޑްގެ ކުޅަދާނަ އެކްޓަރު އާމިރް ހާން ބުނެފި އެވެ.
"މިސްޓަ ޕާފެކްޝަނިސްޓް" ގެ ނަމުން މަޝްހޫރު އުމުރުން 48 އަހަރުގެ އެކްޓަރު ބުނީ އޭނާ މިހާތަނަށް ހަމައެކަނި ފައިސާގެ ދަހިވެތި ކަމުގައި މަސައްކަތްކޮށްފައި ނުވާނެ ކަމަށެވެ.
އަދި އޭނާއަކީ ދުވަހަކު ވެސް ފައިސާއަކަށް ވިކޭނެ މީހެއް ނޫން ކަމަށް، ދެ ކައިވެންޏަކަށް ތިން ދަރިން ވެސް ލިބިފައިވާ އެކްޓަރު ބުންޏެވެ.
"މިހާތަނަށް އަހަރެން ނުހުންނާނެ ފައިސާގެ ބޭނުމުގައި މަސައްކަތްކޮށްފައި. އެއީ އަހަރެންގެ އެންމެ ވަރުގަދަކަމަކީ،" ބޮކްސް އޮފީހުގައި މިހާރު އާ ރެކޯޑްތަކެއް ވެސް ހަދަމުން އަންނަ "ދޫމް 3" ގައި ފުރަތަމަ ފަހަރަށް ނެގަޓިވް ރޯލެއް ކުޅުނު އާމިރް ބުންޏެވެ. "މީގެ މާނައަކީ އެއްގޮތަކަށް ވެސް ފައިސާގެ ބޭނުން އަހަންނަށް ނުޖެހޭ ވާހަކައެއް ނޫން. ދިރިއުޅުމަށް ކޮންމެ މީހަކު ވެސް ފައިސާ ބޭނުން ވާނެ. އެގޮތުން ބަލާ އިރު އަހަންނަކީ ދިރިއުޅެން ވަރަށް މަދު ފައިސާކޮޅެެއް ބޭނުންވާ މީހެއް. މިހާތަނަށް މަސައްކަތްކޮށްފައި ވެސް ހުންނާނީ އެގޮތަށް. އެކަން އެނގޭނެ އަހަންނާ އެއް ލެވެލެއްގައި މަސައްކަތް ކުރާ އެހެން މީހުންގެ އަގުތަކަށް ބަަލައިފި ނަމަ."
ފިލްމް "ގަޔާމަތު ސޭ ގަޔާމަތު ތަކް" އިން ބޮލީވުޑަށް ތައާރަފްވެ، ބޮލީވުޑްގައި މިހާރު 26 ވަނަ އަހަރު ހޭދަ ކުރަމުން އަންނަ އަދި މިހާރު ވެސް އެންމެ ނުފޫޒު ގަދަ ތަރިންގެ ތެރޭގައި ހިމެނޭ އާމިރް ބުނީ އޭނާގެ ފިލްމްތައް ބޮކްސް އޮފީހުގައި ބޮޑު އާމްދަނީއެއް، އާ ރެކޯޑްތަކެއް ހެދި ނަމަވެސް އެއީ އޭނާ އެހާ ބޮަޑަށް ސަމާލުކަން ދޭ ކަމެއް ނޫން ކަމަށެވެ.
"ފިލްމެއް ކުޅެ ނިންމާލުމުން އެކްޓަރުގެ ޒިންމާ އެ ހިސާބުން އޮންނާނީ ނިމިފައި. އަހަރެން މަސައްކަތް ކުރާނީ އަހަންނަށް ކަމުދާ ފެންވަރެއްގެ ސްކްރިޕްޓެއްގެ މައްޗަށް. އެ މައްސަލައެއް ނެތް ކޮންމެ ބަޔަކު އެ ފިލްމެއް ހެދިޔަސް،" ކާމިޔާބް ވަރަށް ގިނަ ފިލްމްތައް ކުޅެފައިވާ އާމިރް ބުންޏެވެ. "އެހެންވެ ފިލްމެއްގެ ސްކްރިޕްޓާއި އޭގައި އަހަރެން ކުޅެން ޖެހޭ ރޯލް ކަމުނުދާ ކަމަށް ވަންޏާ އެ ޕްރޮޖެކްޓެއް އަހަރެން ގަބޫލެއް ނުކުރާނަން. މާނައަކީ ފައިސާއަކަށް އަހަރެންގެ އިހުސާސްތައް ކޮމްޕްރަމައިޒެއް ނުކުރޭވޭނޭ."
އާމިރްގެ ފާހަގަކޮށްލެވޭ ބައެއް ފިލްމްތަކުގެ ތެރޭގައި "3 އިޑިއަޓްސް"، "ޖޯ ޖީތާ ވަހީ ސިކަންދަރު"، "ރާޖާ ހިންދުސްތާނީ"، "ސަރްފަރޯޝް"، "ތަލާޝް"، "ރަންގް ދެ ބަސަންތީ"، "ފަނާ" އަދި "ދިލް ހޭ ކި މާންތާ ނެހީ" ފަދަ ބޮޑެތި ބްލޮކްބަސްޓާތައް ހިމެނެ އެވެ.
އާމިރުގެ ކުރިއަށް ހުރި ފިލްމްތަކުގެ ތެރެއިން ދެން އެންމެ އަވަހަށް ރިލީޒް ވާނީ "ޕީކޭ" އެވެ.
ރާޖް ކުމާރު ހިރާނީ ޑައިރެކްޓް ކުރާ މި ފިލްމުގައި އާމިރް ފެނިގެން ދާނީ ޒުވާން ބަތަލާ އަނުޝްކާ ޝަރްމާ އާ އެކުގަ އެވެ.