ބަތަލާ ބިޕާޝާ ބާސޫ އާ ރައްޓެހިވެގެން 10 އަހަރު އުޅުމަށް ފަހު، އެ ގުޅުން ނިމުމަކަށް ދިޔަ އެކްޓަރު ޖޯން އަބްރަހަމް ލޯބިވެރިޔާ ޕްރިޔާ ރަންޗަލް އާ ކައިވެނިކޮށްފި އެވެ.
އެމެރިކާގެ ލޮސް އެންޖަލިސްގައި މި ދެ މީހުންގެ ކައިވެނީގެ ހަފުލާ ބޭއްވި އިރު، ދެ ފަރާތުގެ އާއިލާގެ މާ ގިނަ ބަޔަކު ބައިވެރި ނުވުމުގެ އިތުރަށް ބޮލީވުޑްގެ އެެއްވެސް ފަންނާނަކު ވެސް ހަފުލާގައި ބައިވެރިވެފައެއް ނުވެ އެވެ.
އަނެެއްކާ މި ހަފުލާ އަށް އެއްވެސް މީހަކަށް ދައުވަތެއް ވެސް ނުދެ އެވެ.
ބޮލީވުޑްގައި ހުރި އެންމެ ވަރުގަދަ އެއް ހަށިގަނޑުގެ ވެރިޔާ ޖޯން،41، އާއި ޕްރިޔާ ކައިވެނި ކުރިކަން ފަޅާ އަރާފައި މި ވަނީ ދެ މީހުންގެ ކައިވެނީގެ ވާހަކަތައް ދެކެވެމުންދާތާ ދުވަސްތަކެއް ފަހުންނެވެ.
މި ކައިވެންޏާ ބެހޭ ގޮތުން ޖޯންގެ ބައްޕަ އަދި އާކިޓެކްޓް އަބްރަހަމް ޖޯން "އިންޑިއަން އެކްސްޕްރެސް" އާ ވާހަކަ ދައްކަމުން ބުނީ ޖޯން އާއި ޕްރިޔާ ކައިވެނީ ކުރީ އެލްއޭގެ ކޯޓެއްގައި ކަމަށެވެ. އަދި ކައިވެނީ ރަސްމިއްޔާތުގައި ކުލަގަދަ އެއްވެސް ހަރަކާތެއް ނެތް ކަމަށް ވެސް އޭނާ ބުންޏެވެ.
އިންވެސްޓްމަންޓް ބޭންކަރެއްގެ ގޮތުގައި މަސައްކަތް ކުރާ، ޕްރިޔާ އާއި ޖޯން ކައިވެނި ކުރި އިރު، ޕްރިޔާ އަންނަނީ އެ ދާއިރާ އިން އެމެރިކާގައި މަތީ ތައުލީމް ވެސް ހާސިލް ކުރަމުންނެވެ.
މި ކަައިވެނީގެ އަޑުތައް ފެތުރުމާ އެކު ބޮލީވުޑްގެ ބައެއް ފަންނާނުން ވަނީ ޓްވިޓާ މެދުވެރިކޮށް ޖޯން އަށް ތަހުނިޔާ ވެސް ކިޔައިފަ އެވެ.
އޭގެ ތެރެއިން އެކަކީ "ޝޫޓް އައުޓް އެޓް ވަޑާލާ" ގައި ޖޯން އާ އެކު އައިޓަމް ލަވައެއްގައި ހަރަކާތްތެރިވި ސޯފީ ޗޯދަރީ އެވެ.
"މަރުހަބާ ޖޯން! ޖޯން އާއި ޕްރިޔާ އަށް ކައިވެނީގެ ހެޔޮއެދުންތައް ފޮނުވަން. އަދި ދެ މީހުންނަށް ވަރަށް އުފާވެރި ހަޔާތަކަށް އެދެން." ސޯފީގެ ޓްވީޓްގައި ވެ އެވެ.
ޖޯން އާ އަހަރުގެ ތަހުނިޔާ ފޮނުވަން މި މަހުގެ 2 ވަނަ ދުވަހު ކުރި ޓްވީޓްގައި އޭނާ ވަނީ ފުރަތަމަ ފަހަރަށް ޕްރިޔާ އަށް ޕްރިޔާ އަބްރަހަމްގެ ނަމުގައި މުހާތަބްކޮށްފަ އެވެ.
އަދި ޖޯން އެގޮތަށް ޓްވީޓް ކުރީ އޭނާ ކައިވެނި ކުރުމުން ކަމަށް އޭރު ވެސް ގިނަ ބަޔަކު ލަފާ ކުރި އެވެ.