އަމިއްލަ ފަރާތަކުން އައްޑޫ ސިޓީ ހިތަދޫގައި ބިނާކުރާ މިސްކިތެއްގެ ބިންގާ އެޅުމުގެ ރަސްމިއްޔާތު މިއަދު ހަވީރު ބާއްވަން ނިންމައިފިއެވެ.
300 މީހުންގެ ޖާގައިގެ މި މިސްކިތް ބިނާކުރެވިގެންދާނީ ހިތަދޫ އަވަށު ބަނދަރު ސަރަހައްދުގައި ހުންނަ ޕަބްލިކް ވޯކްސް ސައިޓާ އިންވެގެން ބަނދަރަށްވާ ގޮތަށް އޮތް ސަރަހައްދުގައެވެ. މިއަދުގެ ރަސްމިއްޔާތުގައި ހިތަދޫ އަވަށުގެ 6 ކައުންސިލަރުން ބައިވެރިވާގޮތަށް ވަނީ ހަމަޖެހިފައެވެ.
މި މިސްކިތުގެ މަސައްކަތްކުރުމަށް ހަވާލުކޮށްފައިވަނީ ހިތަދޫގެ ކުންފުންޏެއްކަމަށްވާ ސަންޝެލްސް ޕްރައިވެޓް ލިމިޓެޑާއެވެ. އަންނަ ރޯދަ މަހު މި މިސްކިތް ހުޅުވަން ނިންމާފައިވާއިރު، މިސްކިތް ހުޅުވުމާއެކު މިހާރު އެ ސަރަހައްދުގައި ހުރި 50 މީހުންގެ ޖާގައިގެ މިސްކިތް ބަންދުކުރުމަށް އައްޑޫ ސިޓީ ކައުންސިލުން ވަނީ ނިންމަވާފައެވެ.
ހިތަދޫ އަވަށުގައި މިހާރުވެސް ވިޔަފާރިވެރިޔަކު އަންނަނީ ޒަމާނީ ފެންވަރުގެ މިސްކިތެއް އެޅުމުގެ މަސައްކަތްކުރަމުންނެވެ. އައްޑޫ ލިންކް ރޯޑުން ހިތަދުއާ ވީކޮޅުން އޭ.އީ.އެޗް ހޮސްޕިޓަލަށް ދާން އޮންނަ ކަނބިހާ މަގުގެ އަރިމަތީގައި އަޅާ މި މިސްކިތްވެސް ކުރިއަށް އޮތް ރޯދަމަހަށް ނިމޭތޯ އަންނަނީ މަސައްކަތްކުރަމުންނެވެ.