ސ. ހިތަދޫ ދުވަސްވީ ތިން މީހަކު ދިރިއުޅޭ ގެއަކަށް ވަގުންތަކެއް މޫނު ނިވާކޮށް ވަދެ، ތޫނު އެއްޗެހިން އެ މީހުންނަށް ހަމަލާދީ ވައްކަންކޮށްފި އެވެ.
އިއްޔެ ރޭ ވަގުންގެ ގްރޫޕެއްގައި ހިމެނޭ ދެ ވަގަކު ވަދެ ތޫނު އެއްޗިހިން ހަމަލާދީ ވައްކަން ކުރަން އުޅުނީ އެ ރަށު މަދުރަސާދޮށުގެ އިންނެވެ.
އެ ގެއިން ވާހަކަ ދެއްކި މީނާޒް އަބްދުﷲ ނަސީރު، 61، މިއަދު ބުނީ އޭނާގެ މަންމަ އާއި ދައްތަ އުޅޭ ގެއަށް ވަގުން ވަނީ ގެ ތަޅުލައިގެން ތިއްބައި، ގޭގެ ތިން ދޮރެއްގެ ބިއްލޫރިތައް ތަޅާލައިގެން އިއްޔެ ރޭ 9:20 އެހާކަށްހާ އިރު ކަމަަށެވެ.
އަދި މީގެ ދެ ހަފުތާއެއްހާ ދުވަސް ކުރިން ވެސް އެގޭގެ ދޮރެއްގައި ޖަހާފައި ހުރި ތޭރިތައް ފެލާލައިގެން ވަދެ ވައްކަންކޮށްފައިވާ ކަމަށް ވެސް ނަސީރު ބުންޏެވެ.
އެ ފަހަރު އޭނާގެ ފޯނާއި ވޮލެޓާއި ހާޑްޑިސްކެއް ވެސް ވަގަށް ގެންގޮސްފައިވާ ކަމަށް ނަސީރު ބުންޏެވެ.
"އިއްޔެ ރޭ މި ގެއަށް ވަން ދެ މީހުން ތިބީ މޫނު ނިވާކޮށްގެން ތޫނު އެއްޗެހި ހިފައިގެން. އެ މީހުން ގެންގުޅުނު އެއްޗަކުން ދައްތަގެ އެއް އިނގިލި ވެސް ވަނީ ކަފަައިގެން ގޮސްފައި. އަދި މަންމަ އޮތް ކޮޓަރިއަށް ވަދެ މަންމަ އެނދުމަތިން ނަގައި ހޫރާލައި އަނިޔާ ވެސް ކުރި. އަދި އަހަރެންްގެ މޭގައި ވަޅި ޖައްސައި ލައިގެން އިން ފަޓްލޫނު ތިރިކޮށް އެއްކޮށް ބަރަހަނާކޮށްލައި ތިޖޫރީގެ ތަޅުދަނޑި ދޭން އެދެމުން ދިޔަ އެ މީހުން،" ނަސީރު ބުންޏެވެ. "އެހެން ނަމަވެސް ތަޅުދަނޑި ނެތް ކަމަށް ބުނެ އަހަރެން ހަޅޭއްލަވަމުން ދިޔައިން. އެ މީހުންނަށް އެކަން ކާމިޔާބުވާ ގޮތެއް ނުވި. އެކަމަކު ދައްތަގެ ފޯނު ވަގަށް ނަގައިގެން ފުލުހުން ވެސް އައިތަނާ އެ މީހުން ވަލުތެރެއަށް ވަދެ ފިލައިގެން ދިޔައީ."
ނަސީރު ބުނީ ގެއިން ވައްކަން ކުރަން ދެ ވަގުން ވަން ނަމަވެސް އެ ގްރޫޕްގެ އިތުރު ބަޔަކު ގެ ކައިރީ ހަރަކާތްތެރިވަމުން ދިޔަ ކަމަށް ލަފާ ކުރެވޭ ކަމަށެެވެ.
އަދި އޭނާގެ ދައްތަ ބޭރަށް ނިކުމެ އެހީއަކަށް އެދި ގޮވަމުން ދިޔަ ނަމަވެސް، އެ ހިސާބުގަނޑުގެ މަގުމަތީގައި ތިބި ބައެއް އާންމުންނަށް އެހީތެރިކަން ފޯރުކޮށް ދޭން ނުކުރެނުވީ ވެސް ވައްކަން ކުރަން އުޅުނު ގްރޫޕްގެ އިތުރު ބަޔަކު އެ ސަރަހައްދު މަގުމަތީަގއި ތިބުމުން ކަމަށް ގަބޫލް ކުރެވޭ ކަމަށް އޭނާ ބުންޏެވެ.
މި ހާދިސާ ހިނގި އިރު މަދުރަސާދޮށު ގޭގައި ރޭގަނޑު ޑިއުޓި އަށް ވޮަޗަރަކު ވެސް ހުރެ އެވެ.
ނަސީރު ބުނީ ވަގުން ވަނުމުން ވޮޗަރު ވެސް ބިރުން އެރޭ ދިޔައީ ކަމަށް ލަފާ ކުރެވޭ ކަމަށެވެ.
ފުލުހުން ބުނީ އެ ގެއަށް ވަން ކަމަށް ބެލެވޭ މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.